Imitako ya Kinyarwanda yatanzweho impano mu isangira ry’abayobozi ba Rotary (Amafoto)

Yanditswe na Ishimwe Israel
Kuya 20 Gicurasi 2019 saa 04:09
Yasuwe :
0 0

Abayobozi bakuru mu Muryango udaharanira inyungu wa Rotary muri Afurika bahawe impano y’imitako ya Kinyarwanda mu gikorwa cyabereye mu isangira ryasoje uruzinduko rwabo mu gihugu.

Itsinda ry’aba bayobozi 50 ku wa 17-18 Gicurasi 2019 bateraniye mu Mujyi wa Kigali mu mahugurwa yagarutse ku iterambere rya Rotary muri Afurika.

Bayasoje bakirwa mu nkera y’igitaramo cya Kinyarwanda aho basangijwe umuco Nyarwanda binyuze mu mbyino n’indirimbo zo hambere; cyabereye muri Marriott Hotel ku mugoroba wo ku wa 18 Gicurasi 2019.

Rotary yo mu Rwanda yari ihagarariwe n’abayobozi b’ama-clubs yayo atandatu n’abandi banyamuryango, banashimiwe umuhate mu migendekere myiza y’icyo gikorwa.

Barimo Perezida wa Rotary Club Kigali Doyen, Eddy Kimenyi Sebera; uwa Kigali Mont Jali, Kabandana Aimé; uwa Kigali Virunga, Saudah Nalule n’uwa Kigali Gasabo, Stella Kalisa. Biyongeraho Ndoba Mugunga na Birungi Paul Masterjerb babaye abayobozi bungirije Guverineri wa Rotary District 9150 ibarizwamo ibihugu 10 birimo n’u Rwanda.

Abitabiriye igitaramo bizihiwe no gutaramana n’Itorero Inyamibwa ryaserutse mu mbyino gakondo n’umudiho w’intore ugaragaza umuco gakondo.

Ababyinnyi bagisesekara imbere y’abayobozi muri Rotary, abenshi bahise bazamura telefoni, batangira gutafa amafoto n’amashusho y’urwibutso rw’imbyino zaherekeje ibihe byiza bagiriye i Kigali.

Buri ndirimbo yasozwaga, bayiherekesha amashyi agaragaza kunyurwa, ndetse ab’inkwakuzi bafatanyije n’ababyinnyi kubyina, banisunga intore barataraka.

Umuyobozi wungirije Guverineri wa Rotary Club mu Karere ka 9150 kagizwe n’ibihugu 10 birimo n’u Rwanda, Rugera Jeannette, yavuze ko bishimiye kwakira aba bayobozi.

Yagize ati “Badufashije kumenya byimbitse imikorere ya Rotary kuko bafite ubunararibonye. Ni abantu bayimazemo imyaka myinshi kandi bakoze amahugurwa kenshi.’’

Yakomeje avuga ko “Hari ibyo twasogongeye, byatugiriye akamaro, batweretse uko twashaka abanyamuryango bashya, batwigishije uko twashaka inkunga zidufasha gukora imishinga n’ibindi.’’

Muri uyu muhango kandi aba bayobozi bahawe imitako n’ibihangano byakozwe n’abanyabugeni b’Abanyarwanda birimo inigi, imigongo n’ibindi bikoresho byifashishwaga hambere.

Rugera yabwiye IGIHE ko “Impano zatanzwe nk’uburyo bwo guteza imbere ibikorerwa mu Rwanda. Inkunga yakusanyijwe izatangwa muri Rotary Foundation, ifasha ama-clubs yose ku Isi gukora imishinga itandukanye.”

Mu bihangano byatangiwe muri ibi birori kimwe kizoherezwa mu biro Afurika ihuriraho n’u Burayi. Igihangano cyakorewe mu Rwanda kizaba icya mbere kigaragaza umuco wa Afurika kihagejejwe.

Rugera yavuze ko “Ni ishema ku Rwanda kuba ari igihangano cya mbere kigiye kujya mu biro bya Rotary International. Bizatuma barushaho kumenya u Rwanda. Bizabatera amatsiko bavuge bati ‘iki gihangano cyavuye he?’”

Rugera Jeannette yavuze ko basigaranye impamba izabafasha kunoza imikorere ya Rotary y'u Rwanda

Rotary International ifite icyicaro muri Amerika ariko agace gahuriyemo Afurika n’ibihugu byo mu Majyepfo y’u Burayi gafite ibiro i Zurich mu Busuwisi.

Visi Perezida wa Rotary International, Yinka Babalola, yavuze ko igihangano cyavuye mu Rwanda kizoherezwa muri ibyo biro guhagararira umuco wa Afurika.

Yagize ati “Nk’Umuyobozi wa Afurika nifuza ko ibiro byacu bigira ibiranga umugabane. Buri gihe niyemeje kuzajya mpa umuyobozi ubikoreramo igihangano giturutse muri Afurika.’’

Yashimye urugwiro beretswe n’abanyamuryango ba Rotary muri Kigali. Ati “Bagenzi banjye twaganiriye biyumvisemo ikaze hano i Kigali. Mwatumye twumva turi mu rugo, Kigali yaduhaye byose twifuzaga.”

Yavuze ko bahisemo gukorera amahugurwa mu Rwanda kuko kurugeramo byoroshye.

Ati “Twaturutse mu bihugu 15 bya Afurika, twashakaga ahantu hadahenze kandi horoshye kuhagera. Ikindi ni uko ari ahantu hashobora kuboneka abantu bavuga Igifaransa n’Icyongereza ku buryo abanyamuryango ba Rotary bahisanga.”

Rotary ishaka umuti w’ibibazo birimo kurwanya ubujiji n’ubukene, kwegereza ubuvuzi kuri bose, kunoza imitangire y’amazi meza, kurwanya ibyorezo, guhashya indwara y’imbasa no gufasha abababaye.

Masterjerb Paul Birungi wabaye Guverineri wungirije muri District 9150 ibarizwamo u Rwanda, yavuze ko Rotary ifata inkingi zose z’iterambere.

Yagize ati “Turateganya gukorana na Minisante, mu gushinga club y’abaganga gusa, kuko batabona umwanya uhagije ariko tuzafatanya ku buryo ibitekerezo byabo tubyohereze mu bindi bihugu.”

Yavuze ko Rotary atari umuryango w’abakire mu mufuka ahubwo ni ‘abakire mu bitekerezo no mu mitima.’

Rotary Clubs y’u Rwanda igizwe n’ama-clubs atandatu abarizwamo abanyamuryango 102. Buri wese ahabwa inshingano zo kwinjiza nibura umunyamuryango umwe mu mwaka.

Rotary International ibarizwamo abanyamuryango miliyoni 1.22 mu ma Rotary Clubs 35, 000 mu bihugu n’uduce birenga 220.

Perezida wa Rotary Club Kigali Virunga, Saudah Nalule, yitabiriye uyu mugoroba w'isangira ryahuje abayobozi bakuru muri Rotary ya Afurika
Nta nyota yari ihari! Abitabiriye ibi birori bazimanirwaga icyo kunywa
Ni ibirori byahuje abantu bari mu ngeri zitandukanye
Wabaye umwanya mwiza wo kuganira no kungurana ibitekerezo
Wari umunsi w'ibyishimo ku banyamuryango ba Rotary Club mu Rwanda
Mu muco wa Rotary y'u Rwanda yakira abashyitsi bayigana
Itorero Inyamibwa niryo ryasusurukije abitabiriye iri sangira
Umwe mu bayobozi bakuru ba Rotary muri Afurika, yafashijwe arahaguruka ajya gucinya akadiho
Masterjerb Paul Birungi wabaye Guverineri wungirije muri District 9150 ibarizwamo u Rwanda, yavuze ko Rotary imikorere y'uyu muryango ifata inkingi zose z’iterambere
Ndoba Mugunga wabaye Umuyobozi wungirije Guverineri mu Karere u Rwanda rubarizwamo yashimwe uko yitanze mu kwakira abayobozi bavuye mu bice bitandukanye bya Afurika
Imitako ya Kinyarwanda yatanzweho impano mu isangira ry’abayobozi ba Rotary muri Afurika
Perezida wa Rotary Club Kigali Doyen, Eddy Kimenyi Sebera, ni we wayoboye uyu muhango. Aha yerekanaga igihangano kigaragaza imigongo
Abayobozi 50 bafite imyanya ikomeye mu Muryango udaharanira Inyungu wa Rotary, basoje amahugurwa bagiriye mu Rwanda bakirwa mu isangira
Visi Perezida wa Rotary International, Yinka Babalola, yavuze ko iki gihangano kizoherezwa mu biro ngo kizajye kigaragaza ko Afurika ihagarariwe
Perezida wa Rotary Club Kigali Gasabo, Stella Kalisa yari afite akanyamuneza nyuma yo gushimirwa ubwitange mu kwakira abayobozi bakuru b'uyu muryango muri Afurika
Yinka Babalola ashyikiriza uwari uhagarariye Rotary International igihangano cyakorewe mu Rwanda
Visi Perezida wa Rotary International, Yinka Babalola, yashimye urugwiro beretswe mu Rwanda
Perezida wa Rotary Club Kigali Mont Jali, Kabandana Aimé
Umuyobozi wa Rotary Club mu Rwanda, Rugera Jeannette n'umugabo we Dr Muderevu Alexis na we usanzwe ari umunyamuryango wa Rotary
Visi Perezida wa Rotary International, Yinka Babalola n'Umuyobozi wa Rotary Club mu Rwanda, Rugera Jeannette bari bafite akanyamuneza

Amafoto: Niyonzima Moïse

Video: Salomo George


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza