Umutambagiro w’Umuganura i Kigali waranzwe n’udushya twinshi(Amafoto)

Yanditswe na Dusabimana Aimable
Kuya 21 Kanama 2017 saa 08:55
Yasuwe :
0 0

Ababyinnyi, abakina b’imikino ngororamubiri n’abahanga mu kwerekana ubufindo butandukanye, bazengurutse Umujyi wa Kigali bashimisha abaturage ku mihanda mu mutambagiro wo gutangiza icyumweru kibimburira ibirori by’Umuganura mu Rwanda.

Umuganura ni kimwe mu bikorwa bihuza Abanyarwanda bagasabana bishimira ibyagezweho, mu gihe cyo hambere wizihizwaga mu kwishimira umusaruro w’ibiribwa bitandukanye mu gihugu ariko muri iki gihe waragutse uba uwo kwishimira ibyejwejwe n’andi majyambere y’u Rwanda atibagiranye.

Umutambagiro wo gutangiza icyumweru cyahariwe ibikorwa by’Umuganura mu Rwanda, wabaye guhera ku gicamunsi cyo kuri uyu wa Mbere, tariki 21 Kanama 2017.

Iki gikorwa cyateguwe n’Inteko Nyarwanda y’Ururimi n’Umuco cyatangijwe ku mugaragaro i Nyamirambo kuri Club Rafiki, gikomereza mu Mujyi wa Kigali rwagati nyuma kigera ku Gisimenti n’i Remera kuri Chez-Lando, gisorezwa muri IPRC Kicukiro ahakorewe ibirori byasusurujkijwe n’abahanzi.

Mu itangizwa ry’uyu mutambagiro, Umunyamabanga Nshingwabikorwa w’Inteko Nyarwanda y’Ururimi n’Umuco, Vuningoma James, yagize ati "Umuganura mu mateka y’u Rwanda ni igikorwa gikomeye, impamvu z’uyu mutambagiro ni ukwereka Abanyarwanda ko hari ibyo bagezeho n’ibyo bageraho byo kwishimirwa kandi hanategurwa uburyo bwo gukomeza gukoresha imbaraga n’umuvuduko mu iterambere dufite."

Igikorwa cy’umutambagiro wo gutangiza icyumweru cy’Umuganura cyaranzwe n’ubwitabire buri ku kigero cyo hejuru ndetse wasangaga mu duce tumwe na tumwe tw’Umujyi wa Kigali abaturage bashagaye ababyinnyi n’abakinnyi b’imikino ngororamubiri bagaragaje ubuhanga budasanzwe n’udushya.

Uyu mutambagiro wabaye mu mahoro n’umutekano ndetse abawitabiriye bashaka kugendana n’abasusurutsaga abantu mu mihanda, bari bashyiriweho imodoka zibatwara zikabageza ahaberaga imyiyerekano itandukanye yakurikiwe cyane n’urubyiruko.

Igikorwa cy’Umuganura muri 2017 cyahawe insanganyamatsiko igira iti "Umuganura, isoko y’ubumwe n’ishingiro ryo kwigira", cyizizihizwa ku rwego rw’igihugu, ku Cyumweru, tariki ya 27 Kanama mu Karere ka Nyanza mu . Uyu muhango na wo uzabanzirizwa n’igitaramo ngarukamwaka cyitwa ’I Nyanza Twataramye’.

Igikorwa cyo kwizihiza Umuganura kizaba guhera ku rwego rw’Umudugudu kugeza ku rwego rw’igihugu na za Ambasade z’u Rwanda n’Imiryango y’Abanyarwanda baba mu mahanga.

Ubusanzwe Umuganura wizihizwa buri mwaka ku wa Gatanu wa mbere muri Kanama, gusa muri uyu mwaka ibi birori byigijwe inyuma bishyirwa mu gihe gitandukanye n’uko byari bisanzwe kuko wahuriranye n’itariki ya 4 Kanama ubwo Abanyarwanda bose bitabiraga igikorwa cyo gutora Perezida wa Repubulika y’u Rwanda.

Abana bafite ubuhanga mu gutwara igare rirerire ry'ipine rimwe bashagawe i Nyamirambo

Ibyo wamenya ku birori by’Umuganura byizihizwa buri mwaka

Mu mateka y’u Rwanda, Umuganura wari umunsi mukuru ngarukamwaka wubahwaga kandi ugahabwa agaciro mu muryango w’ Abanyarwanda. Watangiye kwizihizwa ahagana mu kinyejana cya cyenda, uza kongera guhabwa imbaraga n’Umwami Ruganzu II Ndoli (1510-1543) ubwo yabohoraga u Rwanda nyuma y’imyaka irenga 10 ruri mu maboko y’abanyamahanga (Abanyabungo).

Umuganura wizihizwaga mu buryo bubiri, ku rwego rw’Igihugu wayoborwaga n’Umwami afashijwe n’abanyamihango bawo. Imihango y’ibwami yari iyo guhuza Imana n’Igihugu, bagahuza ibikorwa by’idini n’imigenzo gakondo hamwe n’imirimo y’ubuhinzi n’ubworozi. Ku rwego rw’umuryango, wayoborwaga n’umukuru w’umuryango.

Mu miryango abana basabanaga n’ababyeyi, hakabaho kwishimira ibyagezweho cyane cyane mu musaruro. Mu wa 1925, kwizihiza Umuganura byaciwe n’abakoloni, umwiru mukuru mu bawuyoboraga, Gashamura ka Rukangirashyamba aciribwa mu Burundi. Nyuma y’uko u Rwanda rubonye ubwigenge, abantu bakomeje kwizihiza Umuganura mu miryango yabo.

Kwizihiza Umuganura muri iki gihe byarenze imbibi zo kwita ku musaruro w’ubuhinzi n’ubworozi gusa, bigera no mu zindi nzego zireba ubuzima n’iterambere by’Abanyarwanda hagamijwe kugaragaza urugendo Abanyarwanda barimo baharanira kwigira no kwibohora nyako bifashisha umuco wabo.

Umuganura w’ubu wizihizwa hishimirwa umusaruro wagezweho mu nzego zitandukanye zirimo ubuzima, uburezi, ikoranabuhanga, imikino n’imyadagaduro, ubucuruzi, ubucukuzi bw’amabuye y’agaciro, ibikorwaremezo, inganda ndangamuco, ubukerarugendo n’ibindi. Usibye kwishimira ibyagezweho hanafatwa ingamba zo kugera ku mihigo itandukanye iba yaratekerejwe muri buri rwego.

Umunyamabanga Nshingwabikorwa w'Inteko Nyarwanda y'Ururimi n'Umuco, Dr. Vuningoma James, atangiza umutambagiro w'Umuganura i Kigali
Urukerereza rwari rwabukereye mu mutambagiro w'Umuganura
Ubufindo bwo kugenda ku igare rirerire bwakorewe n'iruhande rwa Kigali City Tower
Uyu musore yerekanye ubuhanga budasanzwe mu gufatisha amacupa umwuko n'amenyo
Abakina imikino ngororamubiri beretse abatuye i Nyamirambo ko umubiri wabo ushobora byinshi
Umutambagiro wanyuze mu bice byitegeye Kigali Convention Centre
Umutambagiro wo gutangiza icyumweru cy'Umuganura wanyuze henshi i Kigali
Itorero Urukerereza ryasusurukije benshi muri uyu mutambagiro
Abamotari b'i Kigali nabo basusurukije umutambagiro
Abashakaga kugendana n'uyu mutambagiro bari bateguriwe imodoka zo kugendamo nyinshi
Abashinzwe umutekano bari maso ngo umutambagiro ugende neza
Abasore bagaragaje ubuhanga
I Remera ababyinnyi b'Urukerereza bashimisha abanyakigali
Ibirori byakomereje ku Kicukiro muri IPRC ahabera igitaramo gitangiza icyumweru cy'Umuganura

Amafoto: Mahoro Luqman


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza