Dr .Bishop Masengo agiye kumurika igitabo amaze imyaka ibiri yandika

Yanditswe na Munyengabe Murungi Sabin
Kuya 29 Mata 2016 saa 03:15
Yasuwe :
0 0

Umuyobozi w’Itorero Foursquare Rwanda, Dr.Bishop Fidèle Masengo agiye gushyira ku mugaragaro igitabo yise Intimacy with God mu birori bikomeye bizaba ku Cyumweru tariki ya 1 Gicurasi 2016.

Intimacy with God ni igitabo cya gikirisitu gikubiyemo ubutumwa buvuga ku busabane hagati y’abemera n’Imana. Cyanditswe na Dr .Bishop Masengo, kizajya hanze mu gitaramo kizanitabirwa n’abahanzi bakomeye barimo Patient Bizimana, Aline Gahongayire, Alarme Ministries na Healing Ministries.

Dr.Masengo avuga ko hari impamvu nyinshi zishobora gutuma abantu batagirana ubusabane n’Imana bitewe n’uburangare n’ibindi bishuko bica intege abatuye Isi ari nabyo bituma benshi bitwa abakirisitu ku izina gusa.

Yagize ati “ Burya muri iyi si dutuye usanga hari impamvu nyinshi zishobora gutuma abantu batagirana ubusabane n’Imana. Harimo kurangazwa na byinshi dukura mu ikoranabuhanga , gushaka imibereho n’ubuzima buhenze. Kubera izi mpamvu, biroroshye ko umuntu yitwa umukirisito ku izina ariko ubugingo bwe butabanye neza n’Imana.”

Dr .Bishop Masengo yavuze ko yacyanditse mu Cyongereza kugirango kizagere kuri benshi mu bihugu bitandukanye azagicuruzamo ndetse ngo yizeye ko ubutumwa burimo buzatanga inyigisho ku bazagisoma.

Yasobuyeko iki gitabo gifite akamaro ku bantu bose haba abemera Imana n’abatari abakirisitu kuko kirimo ubuhanga n’amasomo akomeye.

Ati “Iki gitabo kizahindura ubuzima bwa buri munsi ku bazagisoma. Iki gitabo kirareba abantu bose barimo abatarakira agakiza n’abakijijwe. By’umwihariko kirareba abantu bakora imirimo inyuranye ya gikirisito. Kirimo ibyanditswe, ubusobanuro bwabyo, ingero zifatika ziva mu buzima bwa buri munsi ndetse n’ubuhamya bunyuranye.”

Iki gitabo kizashyirwa ku mugaragaro mu birori bikomeye bizaba ku Cyumweru tariki ya 1 Gicurasi 2016 guhera saa munani zo ku gicamunsi. Umuhango wo kukimurika uzabera ku Kimironko ku cyicaro gikuru cy’Itorero Foursquare Rwanda.


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza


Warning: mysqli_query(): (HY000/1194): Table 'spip_jobs' is marked as crashed and should be repaired in /home/lex94/public_html/ecrire/req/mysql.php on line 244