Hagiye gusohoka ibitabo by’amateka y’umushinga wo kubaka u Rwanda

Yanditswe na Evariste Nsengimana
Kuya 1 Gicurasi 2018 saa 08:37
Yasuwe :
0 0

Nyuma yo kwandika ibitabo bitandukanye ku mateka y’u Rwanda harimo nk’icyitwa ‘’Imizi y’u Rwanda’’ kiyavuga kuva mu wa 300 kugeza mu 1900 inzobere y’umuhanzi w’umusizi, umwanditsi n’umunyamateka Nsanzabera Jean de Dieu, agiye gushyira ahagaragara ibitabo bibiri, bikubiyemo amateka y’umushinga wo kubaka u Rwanda, umaze imyaka 926 [1091-2017] uriho.

Kimwe cyitwa “Intwari z’Imbanza Zubatse u Rwanda rugahamya igitinyiro’’ ikindi cyitwa “Intwari y’Izahabu”, yakebanuye u Rwanda rukongera kubaho”

Mu kiganiro yagiranye na IGIHE, Nsanzabera yasobanuye ko impamvu nyamukuru yahisemo kubyandika harimo kugaragaza imbaraga abakurambere bakoresheje bahanga u Rwanda.

Yagize ati “Impamvu nyamukuru ni ukugaragaza imbaraga abakurambere bakoresheje bubaka igihugu, kugeza ubwo kibaye u Rwanda twese tuganjemo bityo ubutwari bwabaranze tukaba dukwiye kubwimakaza duhereye ku mfatiro basize bashyizeho.”

Uyu mwanditsi akaba n’umusizi w’inzobere avuga ko ari amateka agaragaza ko abanyarwanda ntacyo bari babuze ngo biyubake uretse ko baje kuvangirwa n’abakoloni, ko umurage wa Gihanga utigeze usoza inzozi zawo, kandi ariwo soko ikwiye kuvomwaho ibihe byose kugira ngo abanyarwanda bubake u Rwanda bifuza.

Kimwe yacyanditse kuri Perezida w’u Rwanda, Kagame Paul, wakebanuye igihugu kigeze aharindimuka, kikongera kubaho, akakigeza aheza abakunda ibyiza bishimira.

Asobanura impamvu yanditse kuri Kagame, yagize ati “Ni uko ari umutabazi w’umucunguzi Imana y’u Rwanda yihereye abana bayo, ibigwi bye n’ibirindiro bikaba kwiye kuvugwa akiriho nawe akishimira ibyiza yagejeje ku banyarwanda bikamutera n’imbaduko yo kwatanya ajya mbere kuko iyimijwe n’ikaramu ntiramburura.”

Ibi bitabo byombi ni imbikamakuru n’imbazwamakuru ku Rwanda, muri make bikubiyemo amakuru yose washaka kumenya ku Rwanda.

Bikubiyemo imyumvire n’imitekerereze y’abakurambere mpanga-Rwanda yarangwaga no guhirimbanira ibyiza, kutagamburuzwa n’amakuba, gukorera ku ntego no guharanira intsinzi z’ibihe byose bakabikorana umuco w’ubumana n’ubumuntu.

Umushinga wo kubaka u Rwanda ukubiye mu bitabo bibiri bya Paji 1200, wahanzwe na Gihanga I Ngomijana, ari nawe mutekereza w’ikirenga mu guhanga igihugu cy’i Gasabo cyaje kwaguka kikaba u Rwanda, agashyiraho imfatiro z’ibihe byose, ukazubakirwaho n’igihe azaba atakiriho kuko yasize awuraze abana be, abanyarwanda bose bawugira uwabo, na n’ubu ishyirwa mu bikorwa ryawo riracyarimbanyije.

Bigaragaza neza ko u Rwanda rwavutse, uko rwubatswe, uko rwapfuye n’uko rwazutse rukongera kubaho.

Ibyo bitabo bikaba bizatangazwa ku mugaragaro ku wa 3 Gicurasi 2018, mu muhango uzabera muri Kigali Convention Centre kuva saa munani z’amanywa.

Umwanditsi Nsanzabera Jean de Dieu

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza