Hasohotse igitabo cyitezweho gukuraho urujijo rw’abagoreka amateka y’u Rwanda

Yanditswe na Prudence Kwizera
Kuya 25 Mutarama 2018 saa 08:59
Yasuwe :
0 0

Komisiyo y’Igihugu y’Ubumwe n’Ubwiyunge (NURC) yasohoye igitabo ivuga ko kizafasha abantu kumenya neza amateka nyakuri y’u Rwanda, nta kuyagoreka.

Ni igitabo cy’amapaji 726 cyashyikirijwe Ingoro z’Igihugu z’Umurage w’u Rwanda mu masezerano yasinyanye na NURC yo kugikwirakwiza no kukimenyekanisha mu Rwanda no mu mahanga, i Huye ku wa 25 Mutarama 2017.

Umunyamabanga Mukuru wa NURC, Ndayisaba Fidèle, yavuze ko icyo gitabo gikubiyemo ibyavuye mu bushakashatsi bwakozwe n’abahanga, bityo bacyitezeho umusaruro mu gukomeza kunga abanyarwanda no kubabanisha neza.

Yagize ati “Ni ubushakashatsi bwakoreshejwe na Komisiyo y’Igihugu y’Ubumwe n’Ubwiyunge ku mateka y’u Rwanda kugira ngo haboneke icyegeranyo kigaragaza iby’ingenzi byaranze amateka y’u Rwanda kuva mbere y’ubukoloni, mu gihe cy’ubukoloni, muri Repubulika ya mbere n’iya kabiri, mu gihe cy’urugamba rwo kubohora u Rwanda kugera muri 1994, no kuva mu 1994 kugera muri 2003 ubwo twavaga mu nzibacyuho hatorwa Umukuru w’Igihugu.”

Igitabo kiri mu ndimi eshatu, Ikinyarwanda, Igifaransa n’Icyongereza, kitezweho gukuraho ibihuha n’urujijo byagaragara mu mateka y’u Rwanda kuko hari abayagoreka.

Yashimangiye ko cyanditswe kugira ngo abantu babone amakuru y’amateka nyakuri kubera ko hari ibyagiye bigorekwa n’ibitavugwaho rumwe kubera ibitabo byinshi byagiye bisohoka bikandikwa ku mpamvu za politike n’iyamamazamatwara (Propaganda) bikajijisha abantu.

Ahamya ko kuyavuga uko atari byagize ingaruka zikomeye cyane “ku banyarwanda mu gusenya ubumwe bwabo no gushegesha ubunyarwanda.”

Umunyamabanga Mukuru wa NURC, Ndayisaba Fidèle, yasonanuye ko icyo gitabo kirimo ukuri kose kujyanye n’amateka y’u Rwanda haba mu bijyanye n’imibereho, ubukungu, politike, n’imibanire y’abanyarwanda kuva u Rwanda rwabaho kugeza muri 2003 ubwo habaga amatora y’Umukuru w’Igihugu.

Ati “Hari ibitabo byari byaragiye byandikwa ku mateka y’u Rwanda ariko bikandikwa biyagoreka, ku buryo abasomyi cyangwa umuntu wese ushaka kumenya amateka y’u Rwanda bari bakeneye aho bavana amateka nyakuri atagoretse, atarimo amarangamutima.”

Igitabo cyatwaye ingufu

Komisiyo y’Igihugu y’Ubumwe n’Ubwiyunge yagaragaje ko mu kwandika icyo gitabo cy’amateka y’u Rwanda habanje gukorwa ubushakashatsi kuva mu mwaka wa 2005 kugeza muri 2010, kiranonosorwa gishyirwa mu ndimi z’amahanga (Igifaransa n’Icyongereza) bitwara amafaranga y’u Rwanda arenga miliyoni 100.

Umuyobozi Mukuru w’Ingoro Ndangamurage z’u Rwanda, Amb. Masozera Robert, yavuze ko icyo gitabo kigiye gushyirwa mu ngoro zose z’u Rwanda uko ari umunani ndetse no mu nzu zigurisha ibitabo kugira ngo kigere ku bagishaka bose.

Yagize ati “ Ni byiza ko iki gitabo kije kuko kirunganira ibyo Ingoro z’Umurage zisanzwe zimurika.”

Igitabo kizagezwa mu mashuri

Umunyamabanga Mukuru wa NURC, Fidèle Ndayisaba, yavuze ko icyo gitabo bagihaye n’Ikigo cy’ Igihugu gishinzwe uburezi (REB) kugira ngo kizagezwe mu mashuri abanza, ayisumbuye na kaminuza ndetse n’abayobozi ku nzego z’ibanze bazashishikarizwa kugisoma kugira ngo bagikundishe abaturage.

NURC yavuze ko mu bushakashatsi yakoze hagati y’umwaka wa 2010 na 2015, abanyarwanda bagera kuri 91.7% bayigaragarije ko uko amateka yigishijwe mbere ya 1994 byagize uruhare mu gusenya ubumwe bwabo naho abagera kuri 95.3% bavuga ko amateka yagiye asobanurwa nyuma ya Jenoside yakorewe Abatutsi byagiye bigira uruhare runini mu kubunga no kubabanisha neza.

Byasobanuwe ko ushaka kugura icyo gitabo azajya akibona ku mafaranga atarenze ibihumbi 10.

Umunyamabanga Mukuru wa NURC, Fidèle Ndayisaba n'Umuyobozi Mukuru w’Ikigo cy'Ingoro Ndangamurage z'u Rwanda, Amb. Masozera Robert mu gusinya amasezera yo gukwiza igitabo cy'amateka y'u Rwanda
Ikigo cy'Ingoro Ndangamurage z'u Rwanda kiyemeje kuzakwirakwiza igitabo cy'amateka y'u Rwanda

[email protected]


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza