Kwamamaza

Ibyo wamenya kuri Padiri Jacob, utabarutse yaranditse Inkoranyamagambo y’Ikinyarwanda

Yanditswe kuya 13-10-2016 saa 15:57' na Prudence Kwizera


Padiri Irénée Jacob ukomoka muri Canada yari amaze imyaka igera kuri 51 mu Rwanda akora umurimo w’Imana nka Padiri muri Paruwasi zitandukanye, yitabye Imana taliki ya 11 Ukwakira 2016 azize uburwayi, afite imyaka 78 y’amavuko.

Uyu mupadiri afite amateka akomeye mu Rwanda, kuko ni umwe mu bahanga bakomeye bakoze ubushakashatsi ku rurimi rw’Ikinyarwanda aza no kwandika Inkoranyamagambo (Dictionaire) y’ikinyarwanda.

Padiri Irénée Jacob, yageze mu Rwanda mu 1965, ubwo yari afite imyaka 27 y’amavuko.

Musenyeri Philippe Rukamba, Umushumba wa Diyoseze ya Butare akaba na Perezida w’Inama Nkuru y’Abepisikopi mu Rwanda, yabwiye IGIHE ko Padiri Irenée Jacob yitabye Imana azize uburwayi.

Musenyeri Rukamba ati “Yari arwaye, ni ubusaza kuko yari amaze gukura kuko bashatse no kumwohereza iwabo kwivuza, ariko ni indwara z’ubusaza zisanzwe yari arwaye.”

Yavuze ko Kiliziya Gatolika yahombye umuntu w’ingirakamaro kuko yatanze umusanzu ukomeye mu kubaka Sosiyete Nyarwanda ndetse no kwigisha ijambo ry’Imana.

Biteganyijwe ko Padiri Irénée Jacob ashyingurwa kuri uyu wa 13 Ukwakira 2016, mu irimbi ry’i Ndera, naho Misa yo kumusezeraho ibere kuri Sainte Famille.

Mu kiganiro yigeze kugirana n’umunyamakuru wa Radiyo Salus mu 2011, yasobanuye uburyo akigera mu Rwanda yagowe n’Ururimi rw’Ikinyarwanda, n’uko yafashe umwanzuro wo kukiga mu mashuri abanza.

Padiri Irénée Jacob yari umuhanga mu kinyarwanda

Padiri Irénée yagize ati “Nkigera mu Rwanda byarangoye gushyikirana n’abantu, kandi ngomba kubashyikiriza inkuru nziza (Ivanjiri), mfata icyemezo rero cyo kwigana Ikinyarwanda n’abana bo mu mashuri abanza, hari muri Paruwasi ya Cyahinda (kuri ubu ni mu murenge wa Cyahinda, Akarere ka Nyaruguru).”

Yakomeje asobanura uko yize Ikinyarwanda mu gihe cy’imyaka itatu n’uburyo abandi Bapadiri bamutangariraga.

Ati “Umwaka wa mbere nawize ukwezi kumwe, uwa kabiri nawize ukundi kwezi, uwa gatatu nawo ukwezi n’uko mba ndangije umwaka wa gatatu, abandi bapadiri bagenzi banjye byarabatangazaga cyane ndetse bikanabasetsa iyo barebaga ukuntu nateraga imbere bishimishije."

Padiri Irénée abamuzi neza bemeza ko yari azi kuvuga neza Ikinyarwanda kandi azi no guca imigani y’imigenurano, gusa ngo mu mivigire ye (Prononciation) wumvaga ko atakivuga nk’umunyarwanda kavukire.

Kumenya kuvuga Ikinyarwanda byamusabye ishyaka n’umuhate

Padiri Irénée Jacob ataritaba Imana yasobanuye ko yifuzaga kumenya kuvuga neza ururimi rw’ikinyarwanda bituma akoresha uburyo bwose bushoboka ngo amenye kukivuga no kucyandika.

Ati “Uko nigaga rero naganiraga n’abana bikampa kumenya amagambo atari make n’uburyo bwo kuyavuga. Ikindi cyamfashije mu mibereho isanzwe ni ugusura abaturage iwabo mu ngo, tukaganira bakanyereka ibikoresho binyuranye, najyaga no mu minsi mikuru yabo tugasangira inzoga mbese tugasabana.”

Akigera mu Rwanda yahuye n’ingorane

Padiri Irénée yavuze ko akigera mu Rwanda, uretse kugorwa n’ururimi rw’Ikinyarwanda, ngo yahuye n’imbogamizi y’uko yari ageze mu gihugu gikennye kidafite amazi meza n’umuriro w’amashanyarazi nkuko iwabo byari bimeze.

Ati “Ingorane ya mbere nahuye nayo yari ukumva ururimi rw’Abanyarwanda rwiganjemo inshoberamahanga n’imigani y’imigenurano. Indi ngorane ni uko nari nturutse mu gihugu gikize nka Canada cyateye imbere mu buryo bugaragara, nkaza kuba mu gihugu gikennye, amazi, umuriro, isuku nke n’ibindi, mbese ntibyari binyoroheye.”

Yakomeje asobanura ko ingorane zose yahuraga nazo yageragezaga guhangana nazo ntacike intege kubera ishyaka yari afite ryo kwamamaza inkuru nziza ya Yezu kirisitu (Ivanjiri), n’urukundo yumvaga afitiye Abanyarwanda.

Ikirere cy’u Rwanda cyamuguye neza

N’ubwo akigera mu Rwanda yahuye n’ingorane zitandukanye, Padiri Irénée yashimangiye ko ikirere cy’u Rwanda cyamuguye neza kandi ari cyiza ugereranyije n’ahandi.

Yagize ati “Ikirere cy’u Rwanda nk’uko namwe mubizi ni cyiza cyane, iyo tugize Imana imvura n’umucyo birabisikana, ubushyuhe n’ubukonje biri mu rugero, nabyo byamfashaga kubaho nezerewe.”

Igitekerezo cyo kwandika Inkoranyamagambo y’Ikinyarwanda cyavuye he?

Padiri Irénée ni umwe mu bakoze ubushakashatsi ku Kinyarwanda ndetse yandika n’Inkoranyamagambo y’Ikinyarwanda, abisabwe n’Abamisiyoneri ba Afurika bitewe n’ishyaka bamubonanaga, kugira ngo afashe bagenzi be b’abazungu kumenya Ikinyarwanda.

Gusa ngo bitewe n’uburyo yumvaga akunze ururimi rw’Ikinyarwanda ndetse n’Abanyarwanda, byabaye nko korosora uwabyugaka.

Ati “Mu by’ukuri icyo gitekerezo cy’ubushakashatsi sinari ngifite mbere hose, ahubwo abakuru b’umuryango wanjye b’Abamisiyoneri ba Afurika, babonye inyota nari mfite yo kumenya Ikinyarwanda ndetse n’uburyo nateraga imbere mu gukoresha urwo rurimi, bansaba kugira icyo nakora cyafasha bagenzi banjye bandi, biba nko korosora uwabyukaga.”

Uko Inkoranyamagambo y’Ikinyarwanda yabashije kuyandika

Bitewe n’ishyaka yari afite, Padiri Irénée Jacob ngo yasuye ibigo bitandukanye mu Rwanda birimo Ikigo cy’Igihugu gishinzwe Ubushakashatsi i Butare, cyitwaga Institut National de Recherches Scientifique (INRS), kugira ngo ashake uko azandika Inkoranyamagambo y’ikinyarwanda.

Icyo gihe yahasanze abashakashatsi barimo Cyprien Rugamba, n’abandi nka Simeon Bizimana, abagezaho umushinga yari afite wo kwandika Inkoranyamagambo y’Ikinyarwanda, maze barawushima.

Ati “Banyakiriye neza cyane, mbese bishimiye gufasha uwo muzungu ushimishijwe no kumenya ururimi rwabo, akanarukoraho ubushakashatsi.”

Mu bandi bahanga yagishije inama kugira ngo umushinga we awushyire mu bikorwa, barimo Musenyeri Alexis Kagame, icyo gihe wari igisonga cya Musenyeri Jean Baptiste Gahamanyi, akaba n’umwarimu muri Kaminuza Nkuru y’u Rwanda.

Yanditse ibitabo bitatu mu myaka itandatu

Padiri Irénée Jacob yavuze ko yanditse ibitabo bitatu mu gihe cy’imyaka itandatu, kuko buri gitabo cyamutwaraga igihe cy’imyaka ibiri.

Ibi bitabo bifite umutwe uri mu rurimi rw’Igifaransa ugira uti “Dictionnaire Rwandais-Français en 3 volumes".

Yavuze ko nyuma yo kurangiza kwandika ibi bitabo bitatu, abantu babyakiriye mu buryo butandukanye kuko hari ababyishimiye n’abandi babyamaganiye kure.

Ati “Bamwe barabishimye bavuga ko umuzungu nkanjye byibuze mbashije kurangiza ibyo bitabo mu gihe gito nyamara bo byarabananiye. Ariko na none hari n’abandi babigayaga bavuga ko ari ubushimusi.”

Nyuma yo kwandika Inkoranyamagambo y’Ikinyarwanda, Padiri Irénée Jacob yasabwe n’abakuru bo mu muryango w’Abamisiyoneri ba Afurika kujya yigisha Ikinyarwanda abandi ba Misiyoneri b’Abazungu babaga mu Rwanda.

Icyo gihe ngo yarabikoze ndetse abonye n’uburyo bahuraga n’ingorane zo kumenya Ikinyarwanda bituma yandika n’ikindi gitabo yise “Twige Ikinyarwanda, cyafashije abo bazungu kwiga Ikinyarwanda.”

Padiri Irénée Jacob yabaye muri Diyoseze na Paruwasi zitandukanye hirya no hino mu Rwanda, yari amaze imyaka 10 muri Diyoseze ya Butare.

Padiri Irénée Jacob (ibumoso) yize Ikinyarwanda ndetse acyandika mu nkoranyamagambo
Inkoranyamagambo y'ikinyarwanda n'Igifaransa yanditswe na Padiri Irénée Jacob

[email protected]


Kwamamaza

Kwamamaza
IZINDI NKURU WASOMA
TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!
ANDIKA ICYO UTEKEREZA KURI IYI NKURU
Kwamamaza
IBITEKEREZO
Join Us

Socialize with Us
Contacts

Marketing
4546
Editor
078 827 26 21
Management
0788 74 29 08 / 0788 49 69 15

Emails: [email protected], [email protected]

Website Developped by

Uru Rubuga Ruheruka Gushyirwaho Amakuru Thursday 8 Ukuboza 2016
Copyright © 2009 -2014 - IGIHE Ltd - All Rights Reserved