Igitabo cya Gaël Faye, “Petit Pays” (Agahugu gato) cyashyizwe mu Kinyarwanda

Yanditswe na Karirima A. Ngarambe
Kuya 23 Gashyantare 2017 saa 03:30
Yasuwe :
1 0

Igitabo cya Gaël Faye , “Petit Pays” (Agahugu gato), Kivuga ku buzima bw’umwana wavukiye i Burundi abyarwa n’umunyarwandakazi w’impunzi n’umuzungu w’umufaransa wakoreraga i Burundi. Hanyuma uwo mwana akavuga uko yabonaga ubuzima bumeze muri icyo gihe, ibibazo by’amoko, Hutu na Tutsi.

Uwo mwana ufite hagati y’imyaka 10 na 15, aba yibuka uburyo ubuto bwe bwaje kwicwa n’ibibazo bya politike zo muri aka karere. Anavuga ku kibazo cyo kuvuka ku babyeyi badahuje uruhu.

Nyuma yaje guhungishirizwa i Burayi, ari nabwo yaje kubona ko kuba imvange bigoye, kuko haba iI Birundi haba no mu Burayi, hose abantu baho bamufataga nk’umunyamahanga.

Amaze gukura yiyemeje kugaruka muri Afurika kuko niho byibuze yumvaga ari iwabo. Mu byatumye yumva yigaruriye icyizere ni ugukunda gusoma no kwandika.

Iki gitabo kivuga ku mateka yaranze u Burundi n’u Rwanda, mu myaka ya za 90 kugera na nyuma yaho, ni cyo umwanditsi wacyo, Gaël Faye, yifashishije abahanga mu by’indimi, gishyirwa mu Kinyarwanda.

Gaël Faye yifuje ko n'abazi ikinyarwanda gusa bamenya igitabo cye “Petit Pays” (Agahugu gato)

Mu kiganiro kirambuye na IGIHE, Gaël Faye n’abashyira icyo gitabo mu Kinyarwanda bagaragaje byinshi ku byerekeye uwo mushinga.

IGIHE : Igitabo cyawe watekereje ute kugishyira mu Kinyarwanda ?

Gaël Faye : Iki gitabo kikimara gusohoka mu Gifaransa, kigahindurwa no mu Gitaliyani nifuje ko cyajya no mu Kirundi n’Kinyarwanda nibwo mbiganiriyeho na Dorcy Rugamba, kuko ni umuntu nubaha ubwe no muri aka kazi k’ubuhanzi, kandi mfitiye icyizere ku buryo kumuha igitabo cyanjye ngo amfashe kugishyira mu rurimi we yumva, njye ntaramenya byasabaga icyizere.

IGIHE: Ugifitiye iyihe mishinga iri imbere ?

Hagati y’uyu mwaka wa 2017 kugeza 2018 kizaba kimaze gushyirwa mu ndimi 28 z’ivugwa ku Isi zirimo Ikinyarwanda, Ikirundi, Igifaransa, Icyarabu, Igishinwa, n’izindi.

IGIHE: Ubayeho ute nyuma yo kuba ikirangirire kubera iki gitabo?

Gayel Faye : Ni bintu byanshimishije, byamfunguriye imiryango henshi ntabashaga kugera, ariko igikuru muri byose ni uko bitagomba kumpindura uwo ntariwe, muri make sinzahinduka.

Ikindi kinshimisha ni uko gitabo cyajya gikoreshwa m nyandiko zigize ibice byacyo mu mashuri, kikanashyirwa mu majwi kugira ngo kigere kuri rubanda rwose rutabasha kugera ku bitabo biciye muri radio n’ahandi, kuko uyo urebye abanyarwanda bakunze gukurikira radio kurusha gusoma ibitabo mu giturage, niyo mpamvu twatekereje k’ubwo buryo bw’amajwi mu gitabo.

Aho bigeze gishyirwa mu Kinyarwanda

IGIHE: Igitabo cya Gaël Faye kimaze kumenyekana cyane, umushinga wo kugishyira mu rurimi rw’Ikinyarwanda mwawutangiye mute, ugeze he ?

Dorcy Rugamba : Uyu mushinga urimo urakorwa na « Rwanda Arts Initiative” n’ishyirahamwe nyobora rikorera mu Rwanda, rifite mu nshingano zaryo guteza imbere abahanzi n’ibihangano byabo muri rusange nta kurobanura, akaba ari muri urwo rwego tunakorana cyane n’abanditsi.

Ubu kandi turimo turashaka kwaguka tugakorana na César Nziza washinze ishyirahamwe ryitwa « Nilekast », uko twazakorana muri RAI ( Rwanda Arts Initiative) kugira ngo habeho isoko rya kinyarwanda ducishaho ibitabo mu Rwanda.

Dorcy Rugamba ufite umushinga wo gufasha abahanzi n'ibihangano byabo mu Rwanda

Mu by’ukuri u Rwanda ni igihugu cyanditsweho ibitabo byinshi cyane ariko iby’abanyarwanda ugasanga ni bike, atari ukuba bike gusa kuko n’abanyarwanda abenshi ahubwo ntibibageraho kandi ari amateka yabo. Ibi bibaca intege, aho usanga abanditsi b’ikinyarwanda mu bihe bishize bari benshi bagenda bagabanuka.

Ni muri urwo rwego twashyizeho gahunda yo gutera ingufu abanditsi b’abanyarwanda kandi ingufu zabo nyinshi ziri mu Rwanda kuko abanyarwanda nibo ba mbere bafite amatsiko yo kumva ibyo banditse n’ibibandikwaho. Mu gutangiza uyu mushinga w’inzu y’ibitabo twatangiriye ku gitabo cya Gaël Faye yise « Petit pays » (Agahugu gato), abanyarwanda batangiye kumenya cyane cyane abakiri bato, akaba ari umwanditsi n’umuririmbyi bikaba ari na byiza cyane kuko urubyiruko rumwibonamo byihuse.

Igitabo Petit pays cya Gaël Faye, kizakorwa mu buryo butatu, harimo igitabo gikozwe mu mpapuro bisanzwe, igitabo gisomerwa kuri internet, n’igitabo gishyzwe mu majwi ku buryo gica no ku maradiyo mu Rwanda.

Turashaka ko umunyarwanda uri mu cyaro ucitse imirimo nawe yumva ibitekerezo byo mu bitabo, bikazafasha n’abana bavukira hano mu maahanga kuzajya bagira imfashanyigisho mu kinyarwanda.

Ikindi ni uko ibi bitabo byandikwa bizajya bishyirwa mu kinyarwanda n’ibyandikwa mu kinyarwanda tukabishyira mu zindi ndimi z’amahanga.

Igitabo Petit pays (Agahugu gato) cyararangiye gushyirwa mu Kinyarwanda, kizajya hanze mu gihe kitarenze amezi atatu.

Iki gitabo nifuje ko twagishyira mu kinyarwanda nkimara kugisoma kuko mu by’ukuri kireba urubyiruko cyane, nkabona ari igitabo abakiri bato bashobora kwitabira bwangu cyane ko Gaël Faye benshi bari basanzwe bamuzi nk’umucuranzi, bishobora rero kubatera amatsiko yo gusoma ndetse bikabaviramo n’inyota yo gusoma n’ibindi bitabo bindi nyuma yaho.

Ikindi ni uko nta mpamvu inyandiko ya Gaël Faye yamenyekana mu mahanga, abanyarwanda ntibagereho. Kuyishyira mu kinyarwanda rero ni uburyo bwo kugirango n’abadasoma igifaransa yemwe n’abatarize gusoma no kwandika nabo ntibasigwe inyuma n’inyandiko z’abanditsi bacu.

Burya kugira abanditsi nabyo ni inkingi ikomeye mu burezi bw’igihugu kuko bungura ibitekerezo abasomyi bigatuma urubyiruko rutyaza ubwenge rukamenya gushishoza.

Ubundi kugira umwanditsi bitwara igihe, iyo ijuru rikunze rero rikibaruka umwanditsi mukuru kandi akandika ku buzima bw’iwabo, nta mpamvu ko twamurekera amahanga ngo abe ariyo avoma kuri iryo soko yonyine. Ibitekerezo biba bikubiyemo ahanini usanga abasomyi bacu aribo babikeneye kurusha.

IGIHE : Iki gitabo ni mwe ubwanyu mwagishyize mu Kinyarwanda ?

Dorcy Rugamba : Oya cyashyizwe mu Kinyarwanda na Olivier Bahizi Uwineza. Mu mpamvu zatumye mpitamo Bahizi kuba ari we ushyira mu Kinyarwanda iki gitabo ni uko hari hakenewe umwanditsi ubimenyereye kuko aka kazi ko kuvana igitabo ukijyana mu rundi rurimi bidahuje ntabwo bisaba gusemura gusa nabyo ubwabyo ni akazi k’ubwanditsi.

Olivier Bahizi, maze igihe kirenze imyaka 17 nkurikira inyandiko ze, ni umwe mu banditsi babahanga dufite kandi tukaba tugira Imana akandika mu kinyarwanda kuko ntitwazatahira ku banditsi bakuru twagize ngo turekere aho hakenewe n’abusa ikivi, nkaba mbona Bahizi ari umwe muri abo banditsi dutezeho byinshi.

Uretse n’ibitabo no kuramira ururimi kuko birazwi ururimi rutagira abisi ntirugire abasizi n’abanditsi rurazimira cyangwa rugacika intege, rugahinduka urwo gusaba amazi no kuranga inzira gusa ariko ntirwongere kuba ururimi rw’ ibitekerezo bihanitse cyangwa rw’inganzo ifukuye.

IGIHE: Wakiriye ute gukora aka kazi ko guhindura igitabo cya Gaël Faye “Petit Pays”, Agahugu gato mu Kinyarwanda?

Olivier Uwineza Bahizi : Icyo nabonye ni uko uy’umushinga wari ukenewe kuko abenshi bandika mu ndimi z’amahanga bakibagirwa ko abo bireba bwa mbere ari abavuga ikinyarwanda, ni byiza ko amahanga yamenya amateka y’iwacu ariko na banyiri ubwite bakayamenya kandi yanditse ku buryo bushobora kugera ku ngeri z’abanyarwanda bose, bidasabye ko abize baminuje aribo basoma bonyinye.

Imvugo yoroheye buri wese, ariko itica ururimi n’inganzo y’umwanditsi. Ndashimira Gaël Faye wadufunguriye umutima, na Dorcy Rugamba wangiriye icyizere ampa uwo mwanya wo gukora ku gitabo cyiza nka kiriya.

Kuko gukora ku mushinga mwiza nk’uyu ukorana n’abanyamwuga bo ku rwego nka ruriya nabyo ubwabyo ni mpano ni ukwiga no gutyaza ubumenyi.

Biteganyijwe ko kuwa 14 Werurwe 2017, i Bruxelles mu Bubiligi, ari ho hazabera igitaramo cya Gaël Faye, akamurika n’ umushinga w’igitabo cy’ ’"Agahugu gato” ( Petit pays).

Ku bifuza igitabo mu kinyarwanda, cyane cyane abo muri Diaspora bashobora kuzakigura kuri Amazone, i Tunes no kuri Nilekast.

Olivier Bahizi, umwanditsi w'umuhanga witabajwe mu gushyira mu Kinyarwanda igitabo “Petit Pays"

[email protected]


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza