Ikibariro cy’umushinga wo kubaka u Rwanda n’ibihe byawuranze

Yanditswe na Nsanzabera Jean de Dieu
Kuya 16 Gicurasi 2018 saa 06:42
Yasuwe :
0 0

Umushinga uwo ari wo wose ku isi ugira ikibariro kigizwe n’ibihe wanyuzemo kugira ngo ugere ahantu aha n’aha; uwo kubaka u Rwanda wo waranzwe n’ibihe birimo amashiraniro y’akataraboneka, ibirimo imbaraga n’umuhati ntagereranywa w’abawukotaniye.

Nk’uko tubikesha igitabo igitabo “Intwari z’imbanza, zubatse u Rwanda rugahamya igitinyiro, umutumba wa mbere” cy’amateka y’umushinga wo kubaka u Rwanda umaze imyaka isaga 926, cyanditswe n’Umusizi Nsanzabera Jean de Dieu, abawugizemo uruhare bose, bagiye barangwa n’urukundo, ubumwe no kwitanga gukomeye

Ibyo byageze haba ku bagomba kuwushyira mu bikorwa, abagenerwabikorwa mu buryo ubwo aribwo bwose, bwaba ubwubaka cyangwa se ubusenya.

Abubakaga bari babusangiye, abababaye ingaruzwamuheto zigaruriwe n’u Rwanda nabo bari babusangiye, ndetse n’abashenye ibyagezweho nabo barwanye ishyaka ritava mu bwenge ririmo imbaraga nyinshi n’ubufatanye bukomeye basenya ibyiza byagezweho.

Nubwo ibyo bihe byari bikomeye kandi byarimo ubucakura n’ingamba nyinshi zitandukanye, bishobora kubarwa no kwerekanwa hakurikijwe uko wagiye ushyirwa mu bikorwa.

Umushinga wo kubaka u Rwanda umaze imyaka isaga 927 [1091-2018] uriho kandi ukora, iyo myaka ikaba igabanyijemo ibice bine by’ingenzi, bikomoka mu nzira wanyuzemo ushyirwa mu bikorwa.

Igice cya Mbere: Kigizwe n’imyaka 221yakoreshejwe mu guhanga u Rwanda no kuruha imfatiro zikomeye kugira ngo ruzabashe guhama, no kuramba. Iyo myaka ikura ikibariro mu iyima rya Gihanga Ngomijana mu wa 1091, kugeza ku ndunduro y’Ingoma ya Nsoro Muhigi Samukondo mu wa 1312.

Igice cya Kabiri: Kigizwe n’imyaka 583 yakoreshejwe mu rugamba rwo kwagura igihugu no kugihuza ngo kirusheho guhamya igitinyito mu mahanga akizengurutse. Iyo myaka ikura ikibariro ku ngoma ya Ruganzu Bwimba mu wa 1312 kugeza ku ngoma ya Kigeli Rwabugili mu wa 1895.

Igice cya Gatatu: Kigizwe n’imyaka 99 y’abahirimbaniye gusenya ibyagezweho ibintu bigasubira irudubi, u Rwanda rugasenyuka bya cyane. Iyo myaka ikura ikibariro mu iyima rya Rutalindwa mu wa 1895, bigakomereza ku Ntambara yo ku Rucunshu mu rugaryi rwo mu wa 1896, kugeza kuri Jenoside yakorewe Abatutsi muri Mata 1994.

Igice cya Kane: Kigizwe n’imyaka 23, yakoreshejwemo imbaraga nyinshi ngo igihugu gikebanurwe cyongere kubaho, u Rwanda rukava ibuzimu rukajya ibuntu. Iyo myaka ikura ikibariro kuri Jenoside yakorewe Abatutsi muri Mata 1994, kugeza mu wa 2017, ubwo aya mateka yandikwaga. Ni igihe cyakozwemo ibikorwa byinshi by’indashyikirwa mu guteza igihugu imbere.

Iriya myaka yose yabayemo ibikorwa byinshi bigaragaza ubutwari bwo kubaka igihugu cy’u Rwanda ngo kibeho, bugaragarira mu bikorwa byinshi byagezweho, ntabwo ari ubugwirirano, ahubwo bufite inkomoko mu muco n’amateka y’Abanyarwanda.

Ni imyaka yagarajwemo ko n’abadakunda ibyiza abandi bagezeho bahari, aho bashenye ibikorwa byose by’umushinga, ntibasige n’ibuye rigeretse ku rindi.

Aha akaba ariho habaye inkomoko k’uwarukebanuye rwari rugeze ku mankumbukumbo rukongera kubaho nk’igihugu gihamye mu ruhando mpuzamahanga, gifite umutekano n’ubusugire bwa cyo.

Umwanditsi w'ibitabo Nzansabera Jean de Dieu

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza