Kubandwa Imana: Urumuri n’umukiro wa Benimana

Yanditswe na Dusabimana Aimable
Kuya 13 Kamena 2018 saa 07:10
Yasuwe :
0 0

Abantu benshi bakunze gutsitsuranira ku bintu byinshi bijyanye n’imyemerere y’ubumenya-Mana bw’Abanyarwanda n’imihango bakoraga ihamya ko babana n’Imana kandi ko baziranye na yo nk’ikiremwa yaremye kiyihesheje icyubahiro mu ishusho yayo.

- Kubandwa byari bivuze iki ku Banyarwanda

- Byakorwaga gute?

- Uko Abanyamadini b’Abakoloni bigannye imigenzo yakorwaga mu Kubandwa

- Abanyarwanda ntibigeze ibigirwamana

- Kubandwa byavuyeho cyangwa birakomeje?

Ibyo byose abantu bakomeje gutsitsuranira benshi bakanabiburira n’umwanzuro, habamo n’umuhango wahuzaga benshi mu Icyeza-Mana witwaga “Kubandwa”. Umwanditsi w’Umusizi Nsanzabera Jean de Dieu yatanze amashirakinyoma yabyo mu gitabo cy’umutumba munini yanditse cyitwa “Umuco mu Buvanganzo.”

Niho yavuye imuzi agera imuzingo amara amatsiko abakunda ibyiza byo kumenya umuco n’amateka y’u Rwanda.

Mu mahame nyoboragihugu Gihanga yaraze umuryango nyarwanda mu mushinga w’iyubaka ry’igihugu, harimo n’ihame ryo gukunda Imana yaremye u Rwanda n’Abanyarwanda, ikabaha igihugu nka gakondo y’ibihe byose, ikabakura mu busembere bw’igihe kirekire barimo mu ngoma y’u Rweya rw’Abazigaba.

Uwo murage ntiwigeze utakara inyuma ya Huye, Abanyarwanda bakomeje kuwubahiriza no kuwushyira mu bikorwa uko bwije n’uko bukeye, kugeza n’ubwo bashyizeho umuhango ukomeye wabahuzaga mu Icyeza-Mana, bawita “Kubandwa”.

Kubandwa mu Rwanda rwo ha mbere

Kubandwa ni umuhango wari ukomeye cyane mu mateka y’imyemerere mu muco w’Abanyarwanda. Usibye ko mu gihe cy’umwaduko w’abakoloni bavugaga ijambo rimwe gusa ryitwa “Kubandwa,” mu rwego rwo gushyira abantu mu rujijo rw’ijambo rya kera ridasobanutse, ariko umwimerere waryo wari ugizwe n’amuga abiri ariyo “Kubandwa Imana” bishaka kuvuga “Kwizera Imana, kuyemera no komatana na yo nka magara ntunsige.”

Kubandwa ni ijambo rikomoka ku nshinga “Kubanda” bivuga “Komatana n’ikintu cyangwa umuntu mukaba mahwane. Bivuga kandi kwizera no kwemera kutajegajega, ikimenyimenyi ni uko hari amazina Abanyarwanda bacyita abana babo kandi yanahozeho kera asanisha n’icyo gikorwa.

Urugero rw’ayo mazina ni nka: Kabanda (Kayemera), Kayibanda (Kayizere, cyangwa Kayisenga) ba Mbanda n’ayandi.

Kubandwa Imana ni umuhango watangiye mu wa 1510 mu ntango y’Ingoma ya Ruganzu II Ndoli, akaba ari umuhango wahurizaga hamwe Abanyarwanda mu Icyeza-Mana, icyo gihe ni ho hahanzwe idini y’Abanyarwanda yiswe “Imandwa” akaba ari naryo zina rusange ry’abari bibumbiye muri uwo muryango.

Umuhango wo Kubandwa watangijwe na Ryangombe rya Babinga mwene Nyundo ukomoka mu Bufumbira muri Uganda, akaba yarakomokaga mu bwoko bw’Abanyoro mu nzu y’Abakonjo. Yari umupfumu w’icyamamare uzwi muri aka karere.

Igihe cyarageze aza gupfa, ariko abantu benshi barimo abo yaraguriye, abaturanyi be, abo mu bwoko bwe, abari bamuzi bose ku bw’ubuhangange bwe, ntabwo bigeze bemera ko yapfuye. Barabwiranaga bati “Ryangombe ntabwo yapfuye, ahubwo afite ikindi gihugu yagiyemo.”

Yarapfuye asiga abamukomokaho n’inshuti ze, bakomeza kujya babandwa, bakamwibuka bakamuterekera bamuramutsa nubwo yapfuye, kuko yari igihangange n’umunyabwenge. Kubandwa, bitangira bityo, Ryangombe umuntu yamugereranya nk’umuhanuzi w’agace yari atuyemo cyane cyane mu Ngoma y’u Burera kuko imigenzo ye ntiyakorwaga mu gihugu cyose cy’Abanyarwanda.

Ryangombe ni umuntu nk’abandi watangije idini ry’imandwa mu Rwanda, nk’uko n’abanyaburayi bayatangije muri Afurika maze abantu baramuyoboka, bakajya bakoresha idini rye bambaza Imana. Icyakosorwa ku bazi amateka nabi, ntabwo Abanyarwanda basengaga Ryangombe, ahubwo bamufataga nk’umuhuza wabo n’Imana, bakamwibuka nk’Intwari yahurije abantu mu rukundo rucyeza Imana y’i Rwanda, kuko yo bari bayizi mbere y’uko abahuriza hamwe mu idini ry’Imandwa.

Imigenzo y’idini rya Ryangombe usanga hari aho abanyamadini b’ubu bagiye bayinakira

Imihango imwe mu yo mu idini Gatolika ifite aho ihuriye neza neza n’iyo mu Rwanda rwo hambere, bakoraga ikimenyetso cy’umusaraba nk’uko gikorwa ubu, aho bagira bati “Ndi indangahangarwa n’umwanzi, mu gituza ngatura u Rwanda, ku rutugu nkabegera igihugu.”

Abandi bagiraga bati “Mana y’i Rwanda, urampe ubwenge n’ubushishozi (ku gahanga), urampe impagarike n’ubugingo (mu gituza) ngire imbaraga n’ubudahangarwa (ku rutugu rw’ibumoso) mbashe gukorera igihugu cyanjye (ku rutugu rw’iburyo).

Ibyo bigereranywa n’ikimenyetso cy’umusaraba gikorwa na bamwe mu bihaye Imana y’amadini muri iki gihe.

Imandwa nkuru yabaga yaragabiwe gusimbura Ryangombe, yagiraga uko yambaraga imyenda y’ubutware, ikambara uruhu rw’ingwe, ikambara inkweto, igahabwa inkota y’icyubahiro, ikicara ku ntebe abandi bakicara hasi.

Mu idini rya Ryangombe, barabatizaga ari byo bitaga Kwatuza. Mbere y’uwo muhango no kubandisha barabanzaga bakaraguriza uwabaga agiye kubandishwa, zakwera bakamubandisha. Ni we wadukanye imigenzo yo kubandwa no kwatuza. Ibyo byari umubatizo w’icyo gihe nk’umuhango w’iyinjiradini ry’Imandwa.

Uko kubandwa byakorwaga

Iyo imandwa zateranaga, zabaga zifite amarwa avugirwaho amagambo batongeraga uwo bagiye kubandisha. Yashyirwaga mu kabindi gato kandi nta musemburo bashyiragamo kuko yabaga agenewe uwo muhango gusa. Iyo bajyaga mu mihango yabo, birukanaga abatarabanzwe, bakabita “Inzigo”.

Ubandishwa, bamutongeraga bamwereka ukwezi, bakamubwira ngo nakumanure, akababwira ko atabishoboye, bakongera bati “Uko bikunaniye ari na ko uzananirwa kumena ibanga.” Iyo babandishaga umuntu, yagiraga umubyara mu mandwa, yabaga ari nk’umubyeyi wa Batisimu nk’uko bimeze ku madini amwe n’amwe ya Gikirisitu.

Imandwa zarakomezaga (gukomeza gusubirayo), iyo hashiraga igihe bongeraga gukorera imihango uwabanzwe, akaba na we ashobora kubandisha abandi. Uwabanzwe bwa mbere bamwitaga “Uruzingo” utarabanzwe bakamwita “Inzigo”. Kubyara uwabandishijwe, cyangwa kumubandisha bwa mbere babyitaga “Kumwatuza”.

Nyuma yo kumwatuza, yashoboraga kubyara undi mu mandwa. Uwabandishwaga ari umwana, yabaga angana n’uwabandishijwe ari mukuru, uwabaga akiza mu mandwa, yabaga angana n’ubisaziyemo, kuko babwirwaga amabanga amwe n’imiziririzo ikaba imwe.

Mu mandwa iyo baganiraga bakoreshaga ururimi rwabo rw’ibanga, bitaga “Urukonjo” rwahinduraga izina ry’ikintu cyangwa se umuntu rukamuvuga ukundi, kugira ngo ab’inzigo (abatabanzwe) batabyumva.

Ingero z’amwe mu magambo y’Ururimi rw’Urukonjo

Ihene (Ishubebe), Inka (Inkoroga) , Umugore (Umukari) , Umugabo (Umurabo) n’ayandi.

Imandwa zifite uko zavugaga ibisabisho, ari ryo sengesho ry’iki gihe, iyo basabaga bagiraga bati “Seka, gororoka Mana y’i Rwanda, urampe kubyara, urampe guheka, nzagutereka intango umunsi Kamena yamennye ijuru.

Impamvu bavugaga ngo “umunsi Kamena yamennye ijuru” ni uko ari bwo amasaka yabaga yeze, maze bakenga bagahamagara abaturanyi bakanywa. Ariko babwiye Imana mu itanga ko bahiguye umuhigo = Kurangiza amasezerano, ari byo twakwita isengesho ry’ituro ryo gushima ibyo Imana yatugejejeho, bikorwa n’Abizera Yezu Kirisitu.

Kubandwa byari bifite ikihe gisobanuro n’akahe kamaro?

Abantu benshi, bibaza umumaro nyawo wo kubandwa no guterekera, byakorwaga mu Rwanda rwo hambere. Imandwa nizo zari zishyigikiye idini gakondo, kubandwa kwari ukugaragaza ikimenyetso cy’ubuyoboke, hakabamo imigenzo ihuza abantu n’Imana, abantu bakumva ko hari icyo bagomba kwizera. Nk’uko kubatizwa by’iki gihe, na byo ari ukugaragaza ubuyoboke mu idini wahisemo.

Kubandwa byahuzaga umuryango mu kwizera Imana, havagamo ubucuti, kuko utarabanzwe bamwitaga inzigo, uko abayoboke bagendaga babyemera, nk’uko mu madini y’iki gihe bimeze. Wasangaga rubanda rwo hasi ari bo babyara abakire n’abatunzi mu mandwa, bikabahuza na bo kandi nta busumbane bwabagaho.

Ab’icyo gihe barabikundaga nk’uko ab’ubu bakunda kuyoboka amadini. Ababijyagamo, barabyubahaga, nk’uko ab’ubu bubaha amadini yabo n’imigenzo iyabamo.

Harimo Imigenzo n’imiziririzo myinshi itinyisha abantu gukora ibibi, iyo umukuru yarahiraga ko avugishije ukuri yagiraga ati “Ndakicwa n’imandwa ya Ryangombe.” Ab’ubu bo bagira bati “Ndagasubiza Yezu ku musaraba,” “Imana impane,” “Ni ukuri kw’Imana” n’izindi ndahiro zitandukanye.

Iyo usuzumye neza, imigenzereze y’iyo mihango, imyinshi ihura n’iy’abayishenye (Abanyamadini b’abakoloni).

Aho bitandukanira ni ugusirimuka k’ubu no guhurira kuri Yezu umucunguzi w’Isi ndetse na Muhammad ku ba Islam. Muri rusange isi yose ihurira ku kwambaza Imana imwe.

Si hano mu Rwanda byahindutse gusa, buri gihugu cyagiraga uko gisenga n’uko cyambaza.

Icyo Abanyarwanda turusha abandi, ni uko twemeraga Imana itaboneka nk’umuhuza wacu, naho mu bindi bihugu bo bakagira ibigirwamana, Abanyarwanda mu mibereho yabo no mu mateka yabo, ntibigeze bagira ibigirwamana ngo babyimike muri bo.

Ariko ku bijyanye no guhuriza abantu mu rukundo, imandwa zarushaga abayoboke b’amadini b’iki gihe, kuko habagamo igihango gikomeye kirinda abantu kugirirana nabi. Batinyaga gupfa, kwandura ibibi ku mibiri yabo n’ibyago.

Igihango cyari gikomeye, ni uko harimo imigenzo n’imiziririzo yazirikaga Abanyarwanda mu rukundo. Abavuye mu mahanga n’abamamazabutumwa, ntibadufashije kurobanura ibyiza n’ibibi ngo tubireke, ahubwo batwigishije ko ibyacu ari ibishenzi n’ibishitani gusa, bakagenda baca isano y’Abanyarwanda bahereye ku migenzo, imiziro n’imiziririzo yabahuzaga.

Ni na ko bigenda iyo umuntu ashaka gukomeza ibye, asenya iby’undi. Ariko na none ntiwashimishwa n’uwaza iwawe akavuga ko nta cyiza na kimwe ugira. Nyamara nibyo abakoloni n’abanyamadini badukoreye.

Mu gusoza igice cy’aya mateka, twabibutsa ko Ryangombe ari umuntu wabayeho, ntabwo ari igishitani nk’uko bamwe babivuga. Kandi ntabwo Abanyarwanda bamusengaga nk’uko benshi babizi, ahubwo yari umuhanuzi n’umuhuza w’Abanyarwanda n’Imana, bakamuterekera bamwibuka bakanaziririza igiti cy’umuko yaguyemo amanitswe n’imbogo, ari cyo bakunze kwita umurinzi.

Nk’uko byabayeho kuva na kera, hagati y’Imana haba harimo undi muntu, ari nawe muhuza w’abantu na yo.

Ukurikiranye uburyo twabonyemo imyizerere y’Abanyarwanda bo hambere, ntabwo twasoza iki gice tudasuzumye neza, imyizerere y’icyo gihe n’iy’ubu ijyanye n’iyogezabutumwa ryadukanywe n’abanyamadini, kugira ngo twinjire mu mwanzuro neza, twahera ku kibazo kigira kiti “Ese imyizerere y’icyeza-Mana y’Abanyarwanda ba kera, yaba yaravuyeho?” Igisubizo natanga aha ngaha, ni uko nasubiza nti “Oya ntabwo yavuyeho” Ahubwo yahinduye isura, ihindura n’inyito, reka tubisesengure neza.

Kubandwa byavuyeho cyangwa byakomeje mu yindi sura?

Ese uburyo bambazaga Imana bwari ubupagani, nk’uko benshi babivuga?
Duhereye ku bijyanye no kubandwa, na byo byari imyizerere y’ab’icyo gihe, ariko bikagaragaza ko Abanyarwanda bari bazi Imana, kubandwa no guterekera ntibyavuyeho, nta n’ubwo bikorwa rwihishwa, ahubwo byahinduye isura n’inyito hakurikijwe umusirimuko w’Abanyarwanda, ugendanye n’umuco w’iyogezabutumwa ry’abanyamadini.

Kubandwa se bivuga iki? Byakorwaga bite? Kubandwa byari nk’umubatizo w’Abanyarwanda n’imihango y’iyoboka-dini y’icyo gihe, iyo wabaga utarabanzwe, ntiwashakanaga n’uwabanzwe, kuko witwaga “Inzigo” twabigereranya n’uko mu banyamadini b’ubu bavuga ko umuntu utarabatizwa ngo abe umukirisitu aba yitwa “Umupagani”.

Nk’uko habaho guhazwa cyangwa se kurya ku ifunguro ryera, ni na ko no hambere babikoraga, bafataga amarwa adasembuye, bakayashyira mu kabindi, bakenda n’umutsima w’uburo cyangwa se amasaka, hanyuma bagasangirira hamwe nk’imandwa, ari byo byitwaga “kwimakaza ubumwe n’urukundo mu babanzwe”

None, ibyo guhazwa by’ubu bitaniye hehe no gusangira kw’imandwa? Umuco wo kubandwa, wagize iterambere mu mvugo byitwa “kubatizwa, guhazwa, n’indi mihango yose ikorwa mu buyoboke bw’idini iri n’iri.

Kera mu mandwa, babatirishaga amaraso y’imfizi y’ihene, baminjagiraga ku gahanga, ariko ubu turabatizwa mu mazi menshi! Icyo nicyo bita ko kubandwa byagize iterambere, ntabwo byacitse, kuko ubuyoboke mu myemerere na n’ubu buracyariho.

Imandwa, zafataga icyuhagiro kirimo ingwa y’inono (Ingwa yera de) bakakiminjira k’uwo barimo kubandisha bagira bati “Nk’uko iyi ngwa yera, nawe were ku mutima…” Murumva ko ntaho bitaniye na ya mazi y’umugisha.

Nk’uko habagaho imandwa nkuru n’izisanzwe, ni na ko hariho “Padiri, Pasiteri, Musenyeri, Apôtre, Reverand n’abandi bayobozi b’amadini batandukanye n’abayoboke babo.

Abanyarwanda babakuyemo guterekera abazimu b’iwabo babatoza guterekeza abazimu b’abanyaburayi batazi inkomoko, niba hari n’imiziro bafite yatuma baterekerwa ntawari uyizi. Badutoje kuramya no kwemera imana z’amahanga, Imana y’i Rwanda turayimura. Umunsi ibyo byabaye, u Rwanda rwatashywe n’umwijima, inzangano ziraganza, ubukene bubona icyanzu, inzara na yo iranuma.

Indwara z’ibyorezo zabonye icyicaro, abanyarwanda batangira gupfa umusubirizo bishwe na zo kuko umuco wo kwiyitaho no kwirwanaho wari waragiye nka nyomberi.

Imihango yose abenegihugu bakoresha mu Icyeza-Mana, ntaho itandukanira na rimwe n’umuco w’igihugu, kwemera Imana no komatana na yo ni mahwane n’umuco w’igihugu. Niyo mpamvu abayoboke benshi b’amadini, bakwiye kumenya neza ko Icyeza-Mana ryabo igihe ritazashingira ku muco w’igihugu, nta na kimwe bazubaka ngo gihame, kuko haba hari indangagaciro ziba zarirengagijwe hakimakazwa imico y’ahandi.

Imigenzo n’imihango ya buri muntu mu ishyirwa mu bikorwa ry’ikintu iki n’iki, ntijya inyuranya n’uko abakurambere ba buri gihugu babigennye n’uko babitekereje bakanabishyira mu bikorwa.

Umuco w’u Rwanda nusagambe ukomeze kurangaza imbere bene wo mu Icyeza- Mana y’i Rwanda. Kwimika imana-bintu, imana-hantu, imana-muntu, ntibikwiye guhabwa intebe mu Rwanda rwa Benimana.

Umwanditsi w’Umusizi, Nsanzabera Jean de Dieu, yavuye imuzi amateka y'umuco nyarwanda mu gitabo cy’umutumba munini yanditse cyitwa 'Umuco mu Buvanganzo'

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza