Sinemera Imana ishobora byose, ihoraho, yaremye Isanzure-Umwanditsi Eng. Nzirabatinya

Yanditswe na Kanamugire Emmanuel
Kuya 1 Mutarama 2017 saa 01:34
Yasuwe :
0 0

Mu gitabo yanditse cyashyizwe ahagaragara mu 2014, Umwanditsi Nzirabatinya Zephyrin yagaragaje ibitekerezo bye ku bintu bitandukanye birimo imwe mu myambarire y’abagore n’abakobwa, uburinganire bw’umugabo n’umugore, Iyobokamana, inkoko ya muntu n’ibindi.

Iki gitabo cyanditswe mu rurimi rw’Igifaransa cyiswe ‘Conversations entre citoyens du monde’ kikaba cyarasohokeye mu Bufaransa.

Muri iki gitabo avuga ko hifashishijwe internet abantu bashobora guhura bakaganira bakaba inshuti ndetse bagasangira ubumenyi.

Uku ni ko yahuye n’Umunya- Perou, Monika Gonzales, ibiganiro bagiranye bikaba biri mu byamufashije kwandika iki gitabo.

Uko Nzirabatinya abona imwe mu myitwarire ishingiye ku myambarire y’abagore

Ibijyanye n’imwe mu myifatire y’abagore n’abakobwa Nzirabatinya uvuga ko ari ‘umuturage w’isi’ (urenga imbibi z’igihugu cye, ibara ry’uruhu, ururimi n’ibindi bimutandukanya n’abandi), yabigaragaje ubwo yabazwaga imiterere y’umugore akunda.

Aracyari ingaragu ariko yavuze ko yahitamo umugore utiyambura imiterere ye.Ati “Nahitamo umugore ufite umusatsi kamere kandi ukunda kwambara amakanzu aho kwambara amapantalo.Bisa nk’aho abakobwa bambara amapantalo kenshi baba bashaka kwigana abagabo bagerageza kwiyambura imitere y’igitsina gore(refuser la feminité).”

“Tekereza abagabo bose baramutse badukanye ibyo kwambara amakanzu no kugendana indabo z’amabara atandukanye. Ryaba ari iherezo ry’inyokomuntu.”

“Ntangazwa no kubona abakobwa badefiriza imisatsi yabo; ahari baba bashaka kugira imiterere nk’iy’abazungu babona mu binyamakuru nyamara imisatsi yabo ya kamere ibabera.”

Kuri jye iby’uburinganire bw’umugabo n’umugore bisa n’ibitagira injyana

Eng. Nzibatinya avuga ko umugore n’umugabo batandukanye muri kamere yabo bityo akaba yashyigikira ubwuzuzanye bwa bombi aho kuba uburinganire.

Ati “Kuba uwaremye abantu yarahisemo ko umugabo aganza umugore mu mbaraga ntibyaturutse ku busa.

Kuva igihe umuntu yabereyeho kugeza none umugabo yabagaho ubuzima bugoye aho yabaga afite inshingano zo kurinda umuryango ibiwuhungabanya, kuwushakira ibiwutunga, kwibaza ibisubizo by’ibibazo bitandukanye biwugarije na ho umugore akita ku bana n’ibigendanye n’urugo.”

Akomeza agira ati “Kuva hambere mu ntambara zinyuranye zagendaga ziba ku Isi, umuntu wagombaga gutabara ni ufite ingufu z’umubiri, ari na we wajyaga guhiga n’ibindi.”

Yongeraho ko ku isi hose abagore bajya mu gisirikare ari bake ugereranyije n’abagabo nubwo uyu munsi birimo bihinduka, iki na cyo kikaba kiri mu bigaragaza itandukaniro ry’umugabo n’umugore.

Sinemera Imana ishobora byose, itagaragara, ihoraho, yaremye Isanzure

“Sinjya nsenga, buri gihe iyo ngize ikibazo ngerageza gushaka igisubizo cyacyo aho cyaturuka hose n’igihe byansaba. Sinemera Imana ishobora byose, itagaragara, ihoraho, yaremye Isanzure. Ndi uwo abantu bita ‘athée’(umuhakanyi).

Ubuhakanyi bwanjye ntiburi ku rwego rw’utemera ikintu na kimwe ariko mbyemera gutyo kugira ngo noroshye ubuzima.”

“Uko mbibona nta kintu na kimwe gihoraho iteka ryose, kuko n’isanzure yaravutse, irakura ndetse irapfa mu gihe runaka.”

Ku bijyanye n’amadini, Nzirabatinya avuga ko Abazungu ari bo bayazanye mu Rwanda no muri Afurika muri rusange bitavuze ko Abanyarwanda batari bazi Imana ahubwo bagerageje kuzimanganya imyemerere babasanganye.

Ikindi ni uko ngo ayo madini ashingiye ku kwemera kutari ukwabo (Abazungu) kuko bayavomye mu Misiri ya kera bayajyana iwabo barayiyitirira.

Urugero atanga ni uko mu mitekerereze y’Abanyamisiri ba kera ngo ikintu cyose cyabaga kibafatiye runini ku buryo utabona ikindi ugisimbuza cyazamurwaga mu rwego rw’imana, aha twavuga nk’uruzi rwa Nil, ukwezi, izuba n’ibindi nk’uko mu gihe cy’ubu amafaranga ari imwe mu imana twimitse tukanazubakira ingoro zirimo ambanki, ibigo by’imari n’inzu z’ubucuruzi.”

Ibi byaba ari byo abazungu bashingiyeho nyamara kuba atari ibyabo, Nzirabatinya asanga ari yo mpamvu ubu mu bihugu byinshi by’u Burayi amadini yahindutse ibikoresho bya politiki n’ubukungu kuko abaturage batibona mu myumvire y’ibidafatika.(Ibijyanye n’imyemerere mu by’Imana).

Hamwe n’ikoranabuhanga abantu bashobora kuzarema abandi

“Nyuma y’ibyo twize mu ishuri n’ibyo nasomye mu bitabo icyo nabonye ni uko abantu bari ku isi twaremwe uko tumeze ubu ndetse ni nako bimeze ku bindi binyabuzima byose.

Dushobora kuba twararemwe n’abandi bantu bafite uburyo bw’imibereho butandukanye n’ubwo kuri uyu mubumbe.

Abahanga muri siyansi bagaragaza ko mu bihe biri imbere abantu bashobora kurema abandi bifashishije ibikoresho by’ibanze biri ku butaka, kuko ubuvumbuzi busa n’aho butangiye nubwo hari abavuga ko hamwe n’iterambere ry’inganda n’ikorabanuhanga nta gishya gisigaye kuvumburwa.

Hari abantu benshi bamaze kumva ko twe abantu twaremwe n’ibiremwa bifite ubwenge buruta ubwacu ariko dutekereza ko atari byo byaremye isanzure kuko na byo ubwabyo biri mu birigize.”

“Ni abantu bavuka bagakura kandi bagapfa kimwe natwe nubwo baba bakoresha ikoranabuhanga rikataje. Ibyo tuzabyemera neza igihe abahanga muri siyansi bazaba batangiye kurema abantu bahereye ku bintu bidafite ubuzima bigaragara ku butaka.

Nta kinyabutabire na kimwe mu bigize imibiri y’ibifite ubuzima tudasanga mu kirere no ku butaka bwo ku mubumbe wacu. Ibyo bivuze ko ufite siyansi ihagije warema ibinyabuzima kuko ibikenewe byose birahari.”

Zephyrin Nzirabatinya ni umushakashatsi wigenga mu byerekeye ubumenyi n’ikoranabuhanga. Yatangiye kwandika mu 1999 ubwo yari arangije amashuri yisumbuye muri Lycée de Kigali mu ishami ry’imibare n’ubugenge, uretse ko inyandiko ze atazitangaje.

Yakomereje amasomo ye mu yahoze ari KIST akaba ari injenyeri mu mashanyarazi n’ubukanishi. Akunda gushaka inkomoko y’ibibera ku isi, akibanda ku bumenyi rusange, ikoranabuhanga n’amateka.

Amaze kwandika ibitabo bine yitegura gushyira ahagaragara.

Eng. Nzirabatinya Zephyrin

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza


Warning: mysqli_query(): (HY000/1194): Table 'spip_jobs' is marked as crashed and should be repaired in /home/lex94/public_html/ecrire/req/mysql.php on line 244