U Rwanda rwungutse umuhanga mu mateka

Yanditswe na Karirima A. Ngarambe
Kuya 14 Mutarama 2017 saa 12:31
Yasuwe :
0 0

Dr Philbert Gakwenzire wari umaze imyaka ine muri Kaminuza yigenga y’i Buruseli mu Bubiligi ULB (Université Libre de Bruxelles), yasoje amasomo ku wa 11 Mutarama 2017, aho yakoreraga impamyabumenyi y’ikirenga mu mateka.

Imbere y’akanama k’abakemurampaka kagizwe na Prof. Marie-Soleil Frère, Prof. Jean Philippe Schreiber,Prof. Pieter Lagrou, Prof. Stéphane Audoin-Rouzeau na Prof. Paul Rutayisire waturutse muri Kaminuza y’u Rwanda, Dr Gakwenzire yerekanye ubushakashatsi bukubiye mu gitabo yanditse ku itotezwa n’ubwicanyi bwakorewe abatutsi mu yahoze ari Komini Gikomero na Rubungo.

Iki gitabo cyiswe ‘Les politiques de discrimination, persécutions et génocide des Tutsi en communes de Rubungo et de Gikomero (1960-1994)’ bivuze ivangura itotezwa na Jenoside yakorewe Abatutsi muri Komine ya Rubungo na Gikomero (1960-1994), aharanira guhabwa Impamyabumenyi y’ikirenga mu Mateka.

Gakwenzire yabonye impamyabushobozi ya mbere mu mateka yakuye muri kaminuza y’u Rwanda, aba umwarimu muri Kaminuza ya Kibungo, ari na ho yavuye ajya gukomeza gukorera impamyabumenyi y’ikirenga kuva mu 2012.

Avuga ko yagiye akora ubushakashatsi, bwakomeje kumufasha gutyaza ubumenyi akaba yarishimiye kurangiza amasomo yo kuri uru rwego.

Ati “Iyo umuntu atangiye ikivi akakigeza ku musozo biramunezeza, ariko cyane iyo n’abandi babishimye; nk’abarimu bashimishijwe n’ubushakashatsi bwavuyemo.”

“Nahisemo gukora ubushakashatsi mbwita ‘Ivangura, itotezwa na Jenoside yakorewe Abatutsi muri Komine Rubungo na Gikomero’ kuko bigenda bigaragara ko mbere y’uko abantu barimburwa babanje gukorerwa ibikorwa byinshi byo kubatoteza. Nafashe ahantu hato kugira ngo menye neza ibyahabereye guhera mu 1960 mu gihe u Rwanda rwarimo rushyiraho inzego z’ubutegetsi nshya zagiye zikurikirana, kugeza mu 1994.”

Dr Gakwenzire avuga ko nta nzitizi yahuye na zo kuko yari azi igihugu cye, umuryango, byumvikana ko yari yarabitekerejeho, akaba ahubwo yarashimishwaga no kubona ibisubizo by’ibibazo yibazaga bikamuha imbaraga zo gukomeza akazi ke.

Ashishikariza abazagera ikirenge mu cye kwiga amateka u Rwanda rwanyuzemo bashyizeho umwete, kuko ari ingenzi agakangurira abafata ibyemezo mu buyobozi gushyiraho ingamba n’ubushobozi kugira ngo abato bakomeze bayanononsore.

Nyuma yo gusoza amasomo, Dr Gakwenzire yatangaje ko ubushakashatsi yakoze ateganya kuzabushyira ahagaragara yabishobora akandika n’ibitabo byinshi kuko mu bushakashatsi bw’imyaka ine haba harimo byinshi wakwandikaho mu buryo bwihariye ku Rwanda.

Arateganya gukomeza akazi ke muri Kaminuza ya Kibungo agafatanya na bagenzi be kubaka igihugu cyamubyaye.

Dr Gakwenzire amurika ubushakashatsi yakoze ashaka impamyabumenyi y'Ikirenga mu mateka
Dr Gakwenzire ashyira umukono ku nyandiko yemeza ko abonye impamyabumenyi y'Ikirenga
Abari bagize akanama k'abakemurampaka
Bamwe mu bitabiriye uyu muhango
Dr Gakwenzire mu ifoto y'urwibutso n'abari bagize kanama nkemurampaka

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza