“Umuco wo kwandika ibitabo no gusoma mu Rwanda uracumbagira”

Yanditswe na Emma-Marie Umurerwa
Kuya 13 Ukuboza 2017 saa 07:06
Yasuwe :
0 0

Umuco wo gusoma ibitabo ndetse n’uwo kubyandika mu Rwanda uracumbagira, ibi ariko si umwihariko warwo gusa kuko n’abo mu bindi bihugu byo mu Karere k’Ibiyaga Bigari bavuga ko iki kibazo bagifite.

Ibi ni bimwe mu byatangajwe mu nama Mpuzamahanga ihuje abanyabugeni, abarimu ba za kaminuza hamwe n’abanditsi b’ibitabo bo mu Karere k’Ibiyaga Bigari, kuri uyu wa 13 Ukuboza 2017.

Umwarimu muri Kaminuza y’u Rwanda ishami ry’Uburezi, akaba n’Umuyobozi w’Ihuriro ry’abarimu bo mu Karere k’Ibiyaga Bigari ryitwa ‘Sembura ferment littéraire’, Ahimana Emmanuel, avuga ko kwandika ibitabo no gusoma bicumbagira mu Rwanda.

Yagize ati “Bikunze kuvugwa ko abanyarwanda n’abatuye muri aka Karere badasoma, ahubwo bakunda gusoma agahiye aho gusoma inyuguti. Umuco wo kwandika mu Rwanda, uracumbagira kandi impamvu zishobora kugaragara. Hari abacibwa intege n’uko ibyo bandika batabona uburyo bwo kubitangaza. Ikindi ni ikijyanye no kwitinya ku rurimi.”

Ahimana yakomeje avuga ko mu rwego rwo kubaka amahoro arambye mu bihugu byo mu Karere k’Ibiyaga Bigari, ihuriro ‘Sembura ferment littéraire’ rimaze kwandika ibitabo bitatu, ubu bakaba bashyize ku mugaragaro ikitwa ‘Convergence positive l’autre’.

Ati «Ibyo bitabo byose tumaze kwandika bifite insanganyamatsiko iganisha ku kubaka amahoro, kubaka, ubumwe ku batuye aka karere ndetse n’abatuye isi. Ni umusanzu dutanga mu bijyanye n’uburezi no gutoza abakiri bato umuco wo gusoma.»

Umunyeshuri muri Kaminuza y’u Burundi, Egide Niyonsaba, yavuze ko kutagira amikoro yo gusohora inyandiko no kutagira amasomero bikoma mu nkokora urubyiruko.

Ati «Twebwe mu Burundi bakunze kuvuga ngo ushaka guhisha Umurundi ikintu uracyandika. Muri make Abarundi ntibasoma, ariko hari ikibazo cyo kubona amasomero n’ibitabo byo gusoma.»

Intebe y’Inteko Nyarwanda y’Ururimi n’Umuco, Niyomugabo Cyprien wo mu Nteko Nyarwanda y’Ururimi n’Umuco, avuga ko kugira ngo umuntu agire umuco wo gusoma ari uko abanza kwigishwa ururimi kavukire n’umuco akiri uruhinja.

Ati “Umuco wo kwandika ni umuco tutari dufite mu banyarwanda kuva kera ; ni umuco twazaniwe n’amahanga. Ikigomba gukorwa rero ni amarushanwa kandi abantu baratangiye no mu Turere tumwe na tumwe hari aho bafata abana bakabahuriza hamwe bakabigisha gusoma. Ibyo gusoma bibanze biboneke, inzu zandika ibitabo hamwe n’amazu y’ibitabo na byo biboneke.”

Akomeza avuga ko abandika na bo bagomba kwandika ibitabo bito kandi bakabishyira mu ikoranabuhanga kuko ari byo urubyiruko rukunze.

Abarimu ba za kaminuza bo mu bihugu byo mu Karere k'Ibiyaga Bigari bitabiriye iyi nama
Umusizi Nsanzabera ni umwe mu banditse b'ibitabo witabiriye iyi nama
Egide Niyonsaba, Umunyeshuri muri Kaminuza y' u Burundi
Intiti Niyomugabo Cyprien
Abarimu ba za kaminuza, abanyabugeni hamwe n'abanditsi b'ibitabo bitabiriye iyi nama

[email protected]


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza