Umushinga wo kubaka u Rwanda: Igihangano cya Gihanga

Yanditswe na Nsanzabera Jean de Dieu
Kuya 12 Gicurasi 2018 saa 05:33
Yasuwe :
0 0

Umushinga wo guhanga no kubaka u Rwanda rukabaho, ni amateka maremare, ni umwe mu yo ku rwego rw’Isi umaze igihe kirekire nk’uko bishimangirwa n’indanguruzi y’amateka.

Mu gitabo “Intwari z’imbanza, zubatse u Rwanda rugahamya igitinyiro, umutumba wa mbere’’ cy’amateka y’umushinga wo kubaka u Rwanda umaze imyaka isaga 926, cyanditswe n’Umusizi Nsanzabera Jean de Dieu, hakubiyemo iby’igenzi byose muri uwo mushinga umaze igihe kitari gito.

U Rwanda ni igihugu cyahanzwe na Gihanga, na n’ubu umushinga wo kucyubaka ukaba ukirimbanyije utaragera n’igati! Gihanga niwe mutekereza w’ikirenga w’umushinga wo kubaka u Rwanda. Yawuhaye icyerekezo kirekire ku buryo washoboraga gukomera no kugira ubuzima nyuma y’imyaka amagana n’amagana atakiriho.

Umushinga wo kubaka u Rwanda waranzwe n’ibihe birimo amashiraniro y’akataraboneka, imbaraga, kwitanga n’umuhate ntagereranywa w’abari bawurimo.

Abari muri uyu mushinga kuva mu 1091 kugeza ubu ukaba uriho kandi ukora, bagiye barangwa n’urukundo, ubumwe no kwitanga gukomeye.

Mbere y’uko umushinga wo kubaka u Rwanda utangira gushyirwa mu bikorwa, Gihanga I Ngomijana yahanze igihugu cy’i Gasabo bimugoye cyane, kuko aho yagihanze hari ibisigara by’ibindi bihugu bisaga 29 byari kuri ubu butaka dufite ubu ng’ubu bwitwa Rwanda.

Icyo gihugu yahanze cyari kigizwe n’imirenge itandatu [Nduba, Bumbogo, Rutunga, Gikomero, Ndera na Rusororo] kuri ubu iboneka mu Karere ka Gasabo n’undi umwe wa Fumbwe wo mu Karere ka Rwamagana.

Gihanga amaze gushyitsa umutima mu nda kuko yari amaze kubona igihugu nka gakondo y’ibihe byose, bakishimira ko bakuwe mu busembere bw’Abazigaba bo mu Rweya, yatangiye gutekereza uburyo burunduye buzamufasha kucyubaka no kucyagura kuko cyari gito.

Ibyo yatekereje gukora byose ngo yubake icyo gihugu cye gishya, nibyo byabumbiwe hamwe mu cyiswe “Amateka y’umushinga wo kubaka u Rwanda’’.

Mbere y’itangira ry’umushinga wo kubaka u Rwanda, byari ngombwa ko Gihanga abanza gushaka icyicaro cy’umushinga we, kugira ngo ubashe kugira ishyikizo muri bene wo kuko uzaba ufite aho uganje hadatsimburwa. Ni muri ubwo buryo yabanje guhanga igihugu nk’icyicaro cy’umushinga cy’aho ubarizwa n’aho azajya uhagurutswa no kuwushyira mu bikorwa.

Gihanga yagennye imiterere y’uwo mushinga, ateganya ibizawugendaho byose, uburyo uzashyirwa mu bikorwa n’intego izagerwaho uko imyaka izashira indi igataha. Igitangaje cy’uyu mushinga, ni uko umurongo ngenderwaho yawuhaye ubwo yawuhangaga, utigeze uhinduka mu myaka isaga 927 yari ishize ubwo aya mateka yawo yandikwaga.

Ibitekerezo biwubatse n’ibitekerezo biwushyira mu bikorwa byagiye byogoga abuzukuruza n’ubuvivagiza bw’ibisekuruza byinshi by’abanyarwanda, ugiye gusaza akawuraga abe.

Uko tuzagenda turushaho gusesengura amateka y’uyu mushinga, niko tuzarushaho no gusobanukirwa n’ibyo wagezeho ndetse n’umugambi w’ibihe byose yari afitiye abazamukomokaho n’abanyarwanda muri rusange.

Mu gitabo “Intwari z’imbanza, zubatse u Rwanda rugahamya igitinyiro, umutumba wa mbere’’ cy’amateka y’umushinga wo kubaka u Rwanda umaze imyaka isaga 926, cyanditswe n’Umusizi Nsanzabera Jean de Dieu, hakubiyemo iby’igenzi byose muri uwo mushinga umaze igihe kitari gito

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza