Umwana w’imyaka ine amaze gusoma ibitabo 1000

Yanditswe na Mukaneza M.Ange
Kuya 16 Mutarama 2017 saa 08:31
Yasuwe :
0 0

Umwana w’imyaka ine witwa Daliyah Marie Arana yatangaje abantu kubera ubuhanga afite mu gusoma aho kugeza ubu amaze gusoma ibitabo bisaga 1000.

Ababyeyi ba Arana batuye muri Leta ya Florida mu Mujyi wa Gainesville muri Leta Zunze Ubumwe za Amerika bavuga batangiye kumosomera ibitabo akiri mu nda ndetse na nyuma yo kuvuka musaza we akaba yarasomaga cyane kugira ngo yumve.

Mu kiganiro na Washington Post, umubyeyi we witwa Haleema Arana yavuze ko ku mwaka n’igice, yari amaze kumenya amagambo atandukanye ari mu bitabo yakundaga kumusomera.

Yakomeje avuga ko uko yakomezaga kumenya amagambo menshi ariko yarushagaho kugira umuhate wo gusoma. Ku myaka ibiri n’amezi 11 nibwo Arana yabashije kwisomera igitabo ku giti cye arakirangiza.

Mbere yo gutangira ishuri ry’inshuke, nyina yagize igitekerezo cyo gutangira kubara umubare w’ibitabo agenda asoma, kuri ubu akaba yarasomye ibirenga 1000.

Uyu mwana kandi yanatangaje Umuyobozi w’isomero ry’igihugu rifite mu nshingano gukora ubushakashatsi, Library of Congress, Carla Hayden nyuma yo kumutumira undi agasoma nta gihunga.

Arana afite ikarita ye bwite imwemerera kwinjira mu isomero ryo mu gace atuyemo, yihaye intego yo kuba yamaze gusoma ibitabo 1500 muri Nzeri 2017 ndetse agatangira no kubishishikariza abana bagenzi be.

Nubwo bataragenzura neze aho ubushobozi bwe bwo gusoma bugarukira, Arana abasha gusoma ibitabo abavandimwe be bari hagati y’imyaka 10-12 baba bakuye ku ishuri.

Arana wagizwe umusomyi w’umunsi mu isomero ryo mu mujyi atuyemo yahembwe kuzasubiramo imbwirwaruhame ya Martin Luther King Jr “I Have a dream” mu birori byo kumwibuka.

Amafoto ya Daliyah Marie Arana yakiriwe n’Umuyobozi wa Library of Congress,Carla Hayden

[email protected]


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza