Bulinga : Isaro Foundation mu rugamba rwo gushishikariza abato gusoma

Umuco wo gusoma no kwandika ukomeje gushyigikirwa n’abagize Isaro Foundation mu bikorwa byo gusura ibigo by’amashuri hirya no hino mu gihugu babagabira ibitabo.

Kuri uyu wa Gatandatu tariki ya 26 Gicurasi Isaro Foundation yasuye Ishuri ryisumbuye rya Bulinga inakanashyikiriza abanyeshuri 23 impano y’ibitabo n’amakaramu.

Abanyeshuri 11 batsinze abandi mu marushanwa yo gusoma no kwandika bahawe ibihembo.

Umuyobozi wa Isaro Foundation, Iragena Jean Léon yaboneyeho umwanya wo gukangurira abo banyeshuri kwitabira gusoma ibitabo no gutangira kwitabira kwandika inyandiko ngufi.

Iragena yabwiye abo banyeshuri ko iyo umuntu akunda gusoma ibitabo bituma n’imyumvire izamuka bityo n’ubumenyi bukiyongera.

Yakomeje abasaba kandi ko gusoma kwabo kutakagombye kugarukiriza ku masomo bahabwa n’abarimu ahubwo bakagira inyota yo kumenya aho isi igeze.

Muri icyo gikorwa kandi umuyobozi w’ishuri rya Bulinga yahawe impamyabushobozi ku bwo guteza imbere umuco wo gusoma ibitabo no kwandika mu banyeshuri ayobora.

Mu rwego rwo kwimenyereza kwandika mu ishuri ryisumbuye rya Bulinga, abanyeshuri basanganywe umuco wo kwibumbira mu matsinda mato mato bakandika inkuru ngufi, imivugo n’inkinamico.