Igitaramo cy’itorero "Inganzo Ngari" cyarangiye abitabiriye batabishaka

Yanditswe na

Patrick Munyentwari

Kuya 11 Ugushyingo 2013 saa 08:33
Yasuwe :
0 0

Byari ibyishimo byinshi mu gitaramo, “Inzira ya bene gihanga”, cyateguwe n’itorero Inganzo Ngari cyabereye muri Serena Hotel, ku mugoroba wo ku cyumweru tariki 10 Ugushyingo 2013, aho berekanye inzira u Rwanda rwanyuzemo, haba mbere y’ubukoloni, mu gihe cy’ubukoloni na nyuma yabwo, ubwo u Rwanda rwagwaga mu icuraburindi.
Mu masaha agera kuri atatu, iki gitaramo cyamaze cyari cyinganjemo imikino n’imbyino biranga umuco w’u Rwanda wo mu bihe byo ha mbere, aho bakanguriraga abanyarwanda kumenya (...)

Byari ibyishimo byinshi mu gitaramo, “Inzira ya bene gihanga”, cyateguwe n’itorero Inganzo Ngari cyabereye muri Serena Hotel, ku mugoroba wo ku cyumweru tariki 10 Ugushyingo 2013, aho berekanye inzira u Rwanda rwanyuzemo, haba mbere y’ubukoloni, mu gihe cy’ubukoloni na nyuma yabwo, ubwo u Rwanda rwagwaga mu icuraburindi.

Mu masaha agera kuri atatu, iki gitaramo cyamaze cyari cyinganjemo imikino n’imbyino biranga umuco w’u Rwanda wo mu bihe byo ha mbere, aho bakanguriraga abanyarwanda kumenya bimwe mu byaranze amateka y’umuco nyarwanda, benshi barimo urubyiruko kuri ubu batamenye.

Iyi mikino yakinwaga n’Inganzo Ngari, ikubiyemo ibiranga ubumwe abanyarwanda bahoranye, aho mbere y’ubukoloni, bagaharanira kugera ku kintu kimwe kandi bashyirwa bakigezeho.

Uretse imbyino ziranga umuco gakondo w’u Rwanda, ababyinnyi b’itorero Inganzo Ngali, bagaragaye mu mikino igaragaza uburyo u Rwanda rwo ha mbere, mbere y’umwaduko w’abazungu rwari rumeze ariko bakaza gucibwamo ibice n’abakoloni badutse, bamwe bakabyemera ariko abandi ntibabyihanganire nyamara bakabura imbaraga zihagije zo kubirwanya.

Hageragejwe kugaragazwa uburyo abantu bose batumvaga ibintu kimwe, bikabatera gucibwamo ibice bishingiye ku moko, ndetse banerekanye aho u Rwanda rwegeze mu icuraburindi ariko rukaza kuryikuramo kugeza aho rugeze ubu ku mahoro n’iterambere birambye, ruri mu muryango wa Afurika y’Uburasirazuba.

Mitali Protais, Minisitiri w’umuco na siporo, mu ijambo rye yashimiye cyane abagize itorero “Inganzo Ngari” kubwo gusigasira cyane umuco w’u Rwanda kandi ari urubyiruko, ndetse bagashishikarira kwibutsa Abanyarwanda bimwe mu bihe bikomeye banyuzemo.

Ati: “Igihugu kitagira umuco cyirazima cyikibagirana. Kuba mushyigikira umuco mukabinyuza mu mikino yerekana aho u Rwanda rwanyuze hagoye, kugeza aho rwiyubaka, ibi bihuye na gahunda ya “Ndi Umunyarwanda” dushishikarizwa kwiyumvamo nk’abanyarwanda.”

Igitaramo nk’iki cyateguwe n’itorero “Inganzo ngali” kibaye ku nshuro ya gatanu.

Nahimana Serge, umutoza w’imbyino z’intore mu itorero “Inganzo Ngari”, yabwiye igihe ko kwibutsa no kumenyesha abanyarwanda barimo urubyiruko, ari gahunda bihaye mu bitaramo nk’ibi bagenda bategura.

Ati: “Nta cyiza nko kubona urubyiruko rwumva rugasobanukirwa n’umuco nyarwanda n’ibyawuranze. Kandi rwose banyuzwe. Kuko bababajwe no kubona igitaramo kirangiye batabishaka, amasaha yari yakuze, ariko turategura ikindi gitaramo bose bazisangamo, kuko birumvikana byari biteye amatsiko gukomeza kubireba, kandi binaryoheye ijisho.”

Yakomeje ashishikariza urubyiruko kuri iki gihe, gushishikarira kumva no kumenya ibyaranze umuco nyarwanda bakawusigasira kuko ari bo bazatuma umenyekana mu mahanga, bigatuma utanazima.

Iki gitaramo cyagaragayemo ibyino n’indirimbo zabyinwaga mu gihe cyo ha mbere mu Rwanda, nka “Benimana” n’izindi nyinshi zo mu bihe byo ha mbere zaririmbirwaga ndetse zikabyinirwa umwami w’u Rwanda, mu bitaramo n’indi minsi mikuru yabaga mu muco nyarwanda.

Hanabyinwe kandi n’izindi mbyino nshya za Kinyarwanda zirimo ubuhanga, aho babyinaga basa nk’abahangana ariko bagamije gushimisha abantu.


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza