Impinyuza zagize igitaramo cyiza by’akataraboneka imvura iba kidobya

Yanditswe na
Kuya 25 Ugushyingo 2013 saa 09:53
Yasuwe :
0 0

Mu gitaramo kiryoheye ijisho, kinyuze umutima, kinakundisha umuco nyarwanda, cy’itorerero “Impinyuza” abitabiriye bari mbarwa, bitewe n’imvura, ariko bake bacyitabiriye baranyuzwe
Nubwo igitaramo cyiswe “Gira Ubuntu” cyari cyateguwe neza cyane n’itorero “Impinyuza” abantu ntibitabiriye bigaragarira amaso ariko ntibyakibujije kubaho.
Iki gitaramo cyabayeho ku Cyumweru tariki 24 Ugushyingo 2013, cyatangiriye igihe cyagenwe i Saa 18h30 muri Serena Hotel, kitabiriwe n’abantu mbarwa ku buryo bicaye ku (...)

Mu gitaramo kiryoheye ijisho, kinyuze umutima, kinakundisha umuco nyarwanda, cy’itorerero “Impinyuza” abitabiriye bari mbarwa, bitewe n’imvura, ariko bake bacyitabiriye baranyuzwe

Nubwo igitaramo cyiswe “Gira Ubuntu” cyari cyateguwe neza cyane n’itorero “Impinyuza” abantu ntibitabiriye bigaragarira amaso ariko ntibyakibujije kubaho.

Iki gitaramo cyabayeho ku Cyumweru tariki 24 Ugushyingo 2013, cyatangiriye igihe cyagenwe i Saa 18h30 muri Serena Hotel, kitabiriwe n’abantu mbarwa ku buryo bicaye ku murongo w’intebe esheshatu za mbere gusa, mu nzu ubusanzwe yakwicarwamo n’abantu basaga igihumbi (1000).

Iki gitaramo cyari cyitabiriwe n’abayobozi barimo Minisitiri w’umuco na Siporo, abayobozi batandukanye n’abandi babyina mu matorero atandukanye, bari baje kwigira ku gitaramo cy’itorero “Impinyuza” ndetse n’abanyamahanga.

“Impinyuza” batangiye igitaramo bifashishisha imbyino zisobanura insanganyamatsiko y’igitaramo “Gira Ubuntu” aho umwami ahetswe mu ngobyi yatemberaga, yava mu ngobyi akaza kubona umwana wigunze akamujyana i we akamurera akazaba umuntu w’umugabo, aha babijyanishaga n’indirimbo igira iti “Uburere buruta ubuvuke.”

Iki gitaramo kandi cyaranzwe n’umwimere w’imbyino z’umuco nyarwanda nk’Ikinyemera, umuhamirizo w’ikotaniro n’izindi zakunzwe cyane mu bihe byo hambere nko mu bihe by’abami, inanga no guhogoza bya Kinyarwanda n’ibindi.

Minisitiri Mitali Protais, mu ijambo rye yashimiye abakomeje gushyigikira umuco cyane cyane amatorero amaze iminsi yereka abanyarwanda bimwe mu biranga umuco w’u Rwanda kuri ubu bitakigarara henshi.

Ati: “Kandi burya uretse no gusigasira umuco, kuba mu matorero birafasha cyane kuko ari na siporo, umuntu uba mu itorero, ubyina arakura ariko ntasaza ahubwo ahora akomeye.”

Yakomeje asaba abagize amatorero gutegura ibitaramo kenshi cyane mu minsi y’ikiruhuko (Week-ends), ku buryo n’umunyamahanga cyangwa Umunyarwanda, bajye bifuza kwidagadura mu mbyino nyarwanda babona aho bidagadurira, kuko hari bamwe mu banyamahanga babyifuza ariko bakabura aho bidagadurira.

Yasabye kandi ko bakwiye kuwukomeraho kuko n’abanyamahanga batangiye gukunda umuco w’u Rwanda cyane bishingiye ku mbyino, kuko bamwe batangiye kujya bitabira ibitaramo bya Kinyarwanda, ndetse abandi babyina mu matorero abyina yo mu Rwanda .

Itorero “Impinyuza” ryagaragayemo agashya ko kubyinana n’umwera wagaragaje ubuhanga bwo kubyina Ikinyarwanda, akamenya kwikunda n’ibindi bisabwa kugira ngo imbyino nyarwanda zinyure abazireba.

IGIHE yegereye uyu munyamahanga, witwa “Babla” ukomoka muri Repubulika ya Czech (Czech Republic/ République Tchéque) imubaza uko abona umuco Nyarwanda n’icyamuteye kwinjira mu itorero ribyina Ikinyarwanda, asobanura ko byatewe nuko yabikunze akimenya ko bizabaho, ndetse ngo azazana n’abandi.

Ati: “Nabonye babyina ubwo hamamazwaga iki gitaramo kuri televiziyo, nshaka nimero zabo, ngize amahirwe ndazibona, turavugana njya aho bitoreza ndeba uko bitoza, habura iminsi ine gusa ngo iki gitaramo kibe nanjye nitozanyije nabo, kuko mbikunda cyane nahise mbifata vuba, none ubu twabyinanye ndishimye kandi nzazana n’abandi.”

Babla avuga ko ari mu Rwanda mu rwego rwo kuruhuka, ariko ko igihe cyose azaba ari mu Rwanda azakomeza kubyina muri iri torero kuko akunda imbyino nyarwanda.

Ndayizeye Emmanuel, umwe mu bari bitabiriye iki gitaramo, ubyina mu itorero Inganzo Ngari yatangarije IGIHE uko yabonye igitaramo cya mbere nk’iki cy’itorero “Impinyuza”

Ati: “Ni byiza biragaragara ko bashyize hamwe, cyane ko ari itorero rimaze imyaka ibiri gusa ritangiye. Bafite imbere heza nibakomeza gushyiramo imbaraga hari byinshi bazamenya.”

Ku bijyanye no kuba igitaramo kititabiriwe uko bikwiye, umuyobozi w’itorero “Impinyuza” Bazirete Alice, yagize ati: “Twabiteguye neza kandi twatanze n’amatangazo, ariko kuba abantu batitabiriye cyane nkeka ko byatewe no kuba ari ubwa mbere duteguye igitaramo nk’iki, ndetse turi n’itorero ritarama igihe kinini ribyina imbyino za kinyarwanda, kandi imvura yaguye nayo yabigizemo uruhare, kuko yaguye umwanya. Gusa imbere hacu ni heza kuko iyi ari intangiriro kuri twe.”

Igitaramo nk’iki kibaye nyuma y’icyateguwe n’itorero Inganzo Ngari, giherutse kuba tariki 10 Ugushyingo muri Serena Hotel. Amatorero atandukanye akaba akomeje gutegura ibitaramo bitandukanye, hirya no hino mu Rwanda ndetse no mu mahanga nko muri Kenya n’ahandi.


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza