Ku myaka 28, impano yo “Kuyobora ubukwe” yamuhinduriye ubuzima

Yanditswe na

Richard Irakoze

Kuya 27 Kanama 2014 saa 06:53
Yasuwe :
0 0

Nsengeyukuri Jean Damascene afite imyaka 28, ni umusore ushinguye, muremure bitari cyane kandi w’igikara. Umureba ubona asa n’umusore uceceka cyane kandi utuje. Uyu musore uyobora imihango y’ubukwe ikaryoha, iyo ari muri aka kazi ubona asa n’uhindutseho gato; noneho aba agaragara nk’umugabo w’igikwerere w’inararibonye uvuga ijambo rijyanye n’iririkurikiye kandi mu buryo bunogeye amatwi mu mudundo ugiye umujya umwe.
Umubonye agenda ntiwakwemera ko ari we mwahurira mu bukwe ayoboye ibirori (...)

Nsengeyukuri Jean Damascene afite imyaka 28, ni umusore ushinguye, muremure bitari cyane kandi w’igikara. Umureba ubona asa n’umusore uceceka cyane kandi utuje. Uyu musore uyobora imihango y’ubukwe ikaryoha, iyo ari muri aka kazi ubona asa n’uhindutseho gato; noneho aba agaragara nk’umugabo w’igikwerere w’inararibonye uvuga ijambo rijyanye n’iririkurikiye kandi mu buryo bunogeye amatwi mu mudundo ugiye umujya umwe.

Umubonye agenda ntiwakwemera ko ari we mwahurira mu bukwe ayoboye ibirori ukamuyoberwa ushidikanya niba koko kuri iyi myaka ye ari we waba uri kuvugana ubuhanga amagambo yimbitsemo Ikinyarwanda cy’umwimerere. Iyo utashye ubukwe yabayemo utanga amagambo (Mc), uhita wemera ko koko afite impano yo kuyobora ubukwe yifashishije gutebya mu magambo meza y’Ikinyarwanda nyacyo ayunguruye.

Ku myaka 28 arusha imbaga nini y'abakuze kuyobora imihango y'ubukwe

Nsengeyukuri bakunze kwita akazina ka Mc Philos yize ibijyanye n’ubuganga mu cyahoze ari Kaminuza nkuru y’u Rwanda. Mu minsi isanzwe aba yambaye itaburiya y’umweru akora akazi ko gutanga imiti n’ubujyanama ku barwayi muri “Pharmacie Alliance” ikorera mu Mujyi wa Kigali.

Muganira utungurwa n’uko amaze imyaka Ine atunzwe no gukoresha iyi mu nganzo ye akayobora imihango y’ubukwe nk’umwuga. Avuga ko benshi mu bantu ayoborera ubukwe bamuhamagara nyuma yo kumubona mu bukwe bundi aba yayoboye. Avuga ko amaze kugira ubunararibonye ku buryo abantu benshi bamwumvise mu bukwe bishimira ko ari we ubuyoboye.

Avuga kandi ko kuri ubu ateganya gukomeza kuyobora ubukwe bundi, ku buryo mu Rwanda bazavumbura ko hari impano zinyuranye, harimo n’iyi ye yo avuga ko yifuza kuzaraga abakiri bato.

IGIHE yagiranye na we ikiganiro arangije kuyobora umuhangoo w’ubukwe abazwa aho akomora iyi mpano, n’inzozi ze, uko abona kuyobora ubukwe bimutunze n’ibindi bibazo asubiza mu buryoo bukurikira:

IGIHE: Ubikomora he ibyo kuyobora ubukwe?

MC Philos: Kuva na kera ncyiga mu mashuri abanza nakuze nkunda cyane ibintu by’umuco. Abantu bo mu muryango wanjye rero nagize amahirwe yo gukurana n’abantu bazi iby’amateka kandi bagiye bamfasha kumenya ururimi.

Ngiye mu mashuri yisumbuye i Nyanza naho nahakuye ubumenyi bwinshi mu by’umuco kandi ngira amahirwe yo kuba umuyobozi kenshi, bityo ntangira kwinjira mu bijyanye no kuyobora ibitaramo, ubukwe, mbikuye aho hose. Naganiye cyane n’abasanza nka Mushabizi kandi mbigiraho. Ikindi mu gutaha ubukwe bwinshi nagiye mbona hari abantu babuyobora neza nuko muri ubwo buvanganzo bwanjye ntangira gutyo ibyo kuyobora ubukwe.

IGIHE: Ni gute washinze iri tsinda rivuga Amazina y’Inka ricuranga inanga na gitari nabonye mukorana?

MC Philos: Ryashinzwe na Phn Albert Niyonsaba ni nawe uriyobora. Ni umuhanzi uririmba indirimbo z’ubukwe akaba anacuranga cyane gitari mu rusengero. Kuko twakuranye twiganye muri Kaminuza, yaje kubona ko mfite iyi mpano nuko ansaba ko twakora itsinda. Ubu turi kumwe turi bane; njyewe na we hamwe n’abandi basore babiri ari bo Munyakazi Deo na Habimana Emmanuel nabo bavuga amazina y’inka banacuranga ibikoresho bya kera harimo inanga n’imiduri ku buryo bishimisha ababa bitabiriye ubukwe benshi.

IGIHE: Umaze kuyobora ubukwe bungahe ?

MC Philos: Ni bwinshi pe ! Kuko nk’ubu hari igihe nyobora ubukwe bugeze kuri 5 ku munsi ngiye mbara ubwo nyoboramo imihango ijyanye no gusaba no gukwa (dotte) gusa, hakaba ubwo nyoboyemo ibijyanye n’ibirori byo kwakira abashyitsi (reception) cyangwa se ibyo gutwikurura. Ariko muri rusange ngereranyije maze kuyobora ubukwe buri hagati ya 100 na 120.

IGIHE: Ubu mu cyumweru kimwe ushobora kuyobora nk’ubukwe bungahe?

MC Philos: Mu cyumweru nkunze kuyobora ubukwe 3; kuwa Kane hari aho nyobora imihango yo gusaba no gukwa, kuwa Gatandatu mu gitondo nkayobora ubundi mu mihango yo gusaba no gukwa nanone, nimugoroba nabwo ndi buyobore ubundi bukwe bwo gusaba, ngasoreza no ku bundi bwo kwiyakira nimugoroba. Hari igihe no ku Cyumweru njya nyuzamo nkaba nabwo mfite ubundi bukwe nasabwe kuyoboramo ibirori byo kwiyakira (reception) yewe n’ubu no kuwa 31 nzayobora ubukwe bubiri nyuma ya saa sita.

IGIHE: Bigutunze gute ?

MC Philos: Abantu nkorera ubukwe bose baranyishyura nibura ibihumbi 50 kuri buri birori, kandi ayo mafaranga ashobora no kwiyongera; urumva ko iyo mbonye ubukwe bwinshi bimfasha cyane mu mibereho myiza. Ubu ndihira mukuru wanjye muri Kaminuza i Burundi hari n’abandi bantu bo mu miryango mfasha mvanye ubushobozi muri ubu buhanzi bwanjye.

IGIHE: Iyo abantu bakubwiye ko bakunze uko wayoboye ubukwe, bakubwira ko ari iki bagukundiye ahanini?

MC Philos: Abenshi bambwira ko bishimiye uko nkoresha Ikinyarwanda cyiza cy’amagambo aryoshye. Bakunze kumbwira ko ibyo bintu bibanyura. Hari abambwira ko bishimira uko nyobora ibirori byo gusaba kuko hari abasaza bamwe na bamwe uba usanga badaheruka iby’iyi mihango nkabafasha cyane mu kubahererekanya amagambo neza ntasobwa. Hari nk’inkundarubyino zimbwira ko mba nambaye neza, abandi bakavuga ko nkunda kwihutisha gahunda bikarangira abantu bishimye batarambiwe cyangwa se ngo mbakereze.

IGIHE: Ufite izihe nzozi (wifuza kugera kuki)?

MC Philos: Nifuza ko abantu mu Rwanda bamenya impano niftemo nkaba nanjye natangira kuyobora n’ibindi birori birimo za Rwanda Day, Inama y’Igihugu y’umushyikirano, Inama y’Urubyiruko n’ibindi bitaramo bikomeye ku rwego rw’igihugu.

Izindi nzozi zanjye ni uko mu minsi iri imbere nanjye nazaba ndi umuntu wigisha abandi ibijyanye n’umuco, nk’uko tujya twumva abandi batumirwa nk’abajyanama bakuru batanga ibitekerezo bifite ireme biteza imbere igihugu kuko nanjye mbyiyumvamo kandi nkunda igihugu cyanjye cyane.


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza