Mu gitaramo cyiswe “Ziraganje”, Inshongore z’urukaka zashimiye Intwari zabohoye u Rwanda

Yanditswe na

Philbert H

Kuya 8 Nyakanga 2015 saa 02:03
Yasuwe :
0 0

Mu kwizihiza ku nshuro ya 21 Umunsi wo Kwibohora, ribicishije mu gitaramo cyiswe “ziraganje”, Itorero Inshongore z’Urukaka ryashimiye Intwari z’u Rwanda zabohoye igihugu, rinashishikariza urubyiruko kwigira kuri ubwo butwari mu kubaka igihugu.

Icyo gitaramo cyizihijwe ku munsi nyirizina hizihizwaho umunsi ingabo zari iza RPA (ubu zahindutse RDF) zabohoyeho igihugu, zihagarika jenoside yari imaze guhitana imbaga y’abasaga miliyoni.

Aganira na IGIHE, Rutazigwa Theodore, Umuyobozi w’Itorero Inshongore z’Urukaka yatangaje ko icyo gitaramo bagiteguye mu rwego rwo gushimira Intwari zabohoye igihugu cyane ko na zo zabikoze ari urubyiruko.

Ati “Twateguye iki gitaramo mu rwego rwo gushimira intwari zabohoye igihugu, kuko na zo zari urubyiruko nkatwe, ariko mu kubashimira tuba dushaka no gyutanga ubutumwa ku banyarwanda b’urubyiruko, ko za mbaraga zakoreshejwe mu kubohora igihugu, tugomba kuzikoresha duteza imbere igihugu, intego bari bafite natwe tukayikomeza.”

ABari aho banyuzwe n'umuhamirizo w'Intore z'Inshongore z'Urukaka

Rutazigwa yakomeje asaba abanyarwanda kujya barushaho kwitabira ibitaramo nka Ziraganje, kuko biba biryoheye amaso kandi birimo n’ubutumwa butangwa hifashishijwe umuco nyarwanda, cyane ko n’ababohoye igihugu bari barangajwe imbere na wo.

Bamwe mu bitabiriye iki gitaramo bo batashye banezerewe, ndetse bo bakavuga ko bitakiri ngombwa ko hatumizwa abahanzi bo mu mahanga cyangwa kwifashisha abahanzi baririmba iby’imico y’ahandi kandi hizihizwa umunsi wo Kwibohora, kandi ibyizihizwa ari igikorwa cy’abanyarwanda bakoze mu ndangagaciro z’Umunyarwanda.

Umwe muri bo utarashatse ko amazina ye atangazwa yagize ati “Jye ndanezerewe, iki gitaramo cyiyongereye ku byo numvaga nk’amateka y’urugamba rwo kubohora igihugu none bimpaye ishusho nyayo y’uko byari bimeze icyo gihe.”

Yakomeje agira ati “Igitaramo cyo kwizihiza ubutwari bw’Abanyarwanda rwose ntibikwiye ko tujya kureba abadususurutsa baturutse mu mahanga cyangwa abaturirimbira iby’abanyamahanga. Ni yo mpamvu jye nsanga abaterankunga bari nakwiye kwerekeza amaboko yabo ku bitaramo bya Kinyarwanda nk’iki, ubutaha bikazaba bishyushye kurusha ubu.”

Ibi kandi uyu abihurizaho na Rutazigwa, Umuyobozi w’Inshongore z’Urukaka, usaba ko abaterankunga n’abafatanyabikorwa batajya bahera mu bitaramo by’indirimbo zitwa izigezweho zo mu njyana mva mahanga, kuko mu bitaramo bya Kinyarwanda nka “Ziraganje” na ho babakeneye.

“Ziraganje” ni igitaramo ngarukamwaka, icy’uyu mwaka kikaba cyarakorwaga ku nshuro yacyo ya ya kabiri nyuma y’icyari cyabaye mu mwaka ushize wa 2014.

Igitaramo cyaritabiriwe ahateguwe haruzura
Abicishije mu buhanzi bwe, Niyitegeka Gratien uzwi nka Sekaganda, yagerageje kwereka abari aho imiterere y'urugamba rwo kubohora igihugu
Ibihangano bya Kinyarwanda birimo indirimbo nyarwanda n'ibyivugo ni byo byaranze Ziraganje

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza