’Nyanza Twataramye’, igitaramo cyongeye kugaragaza Nyanza nk’igicumbi cy’umuco

Yanditswe na

Karirima A. Ngarambe

Kuya 27 Ukuboza 2014 saa 11:30
Yasuwe :
0 0

Ku mugoroba wo ku itariki ya 26 Ukuboza 2014, mu nzu Ndangamurage y’u Rwanda iherereye mu Murenge wa Busasamana-Rwesero, Akarere ka Nyanza habereye igitaramo Ndangamuco Nyarwanda kizajya kiba buri mwaka cyiswe “Nyanza Twataramye”, gisiga ishusho y’uburyo abayobozi babanye n’abo bayobora.
Iki gitaramo ndangamuco nyarwanda cyateguwe n’ Akarere ka Nyanza ku bufatanye na Minisiteri ya Siporo n’Umuco (MINISPOC), Ikigo cy’Igihugu cy’Iterambere(RDB) n’Ikigo cy’Igihugu cy’Ingoro z’Umurage w’u (...)

Ku mugoroba wo ku itariki ya 26 Ukuboza 2014, mu nzu Ndangamurage y’u Rwanda iherereye mu Murenge wa Busasamana-Rwesero, Akarere ka Nyanza habereye igitaramo Ndangamuco Nyarwanda kizajya kiba buri mwaka cyiswe “Nyanza Twataramye”, gisiga ishusho y’uburyo abayobozi babanye n’abo bayobora.

Iki gitaramo ndangamuco nyarwanda cyateguwe n’ Akarere ka Nyanza ku bufatanye na Minisiteri ya Siporo n’Umuco (MINISPOC), Ikigo cy’Igihugu cy’Iterambere(RDB) n’Ikigo cy’Igihugu cy’Ingoro z’Umurage w’u Rwanda(NIMR).Igitaramo kitabiriwe n’abantu benshi cyane bingeri zitandukaye, abatuye i Nyanza, abaturutse hirya no hino mu gihugu n’abaturuka mu ntara bise iya 6 ariyo Diaspora Nyarwanda.

Ubuyobozi bw’Akarere ka Nyanza bwateguye iki gitaramo mu rwego rwo gusigasira Umuco no gukomeza gutoza Abanyarwanda kuwukunda no kuwigisha abakiri bato.

Mu kiganiro na Ange-Claude Kayigi, ushinzwe Urubyiruko, Sport n’Umuco mu karere ka Nyanza yagize ati: “Abantu benshi baza gusura Nyanza bakurikiye amateka n’Umuco Nyarwanda nk’ahantu hari igicumbi cy’umuco kuva kera, akaba ariho usanga ibimennyetso byinshi bitandukanye byaranze amateka y’u Rwanda kuva mbere y’umwaduko w’abazungu kugeza nyuma y’ubukoroni, akaba ariyo mpamvu twahisemo uburyo bwo kongera gushishikariza Abanyarwanda n’inshuti zabo gukunda umuco Nyarwanda, kubereka amahirwe n’uburyo bwo gushora imari cyane cyane mu bukerarugendo bushingiye ku muco nyarwanda.

Kayigi ukuriye umuco mu Karere ka Nyanza yabwiye IGIHE ko iki gitaramo kizajya gikorwa buri mwaka

Ange Claude Kayigi yakomeje avuga ati: “Ni muri urwo rwego hateguwe iki gitaramo Ndangamuco-Nyarwanda cyiswe "Nyanza twataramye!"., biteganyijwe ko kizaba ngarukamwaka. Muri icyo gitaramo nkuko byagaragaye kandi twabyifuzaga hahuriye abantu benshi bo mungeri zitandukanye kuva ku muturage usanzwe kugera ku bayobozi bo mu rwego rw’igihugu, Abanyarwanda baturutse mu ntara ya 6 ariyo Diapora n’inshuti z’u Rwanda, ibi bikaba bitanga ikizere kuko intego yo guteza imbere umuco no kuwumenyekanisha yagezweho kandi nizeye ko bizakomeza nkuko biteganyijwe.”

Abanyarwanda baca umugani ngo “utagera Ibwami abeshywa byinshi”, ni nako byari byifashe mu gitaramo “Nyanza Twataramye”. Mu buryo bwimbitse, amatorero n’abahanzi bataramiye abari aho bongeye kwerekana ko Abanyarwanda bakunda kandi bafite umuco ufite umuzi, umuco uvomwa ku isoko idakama.

Amatorero yari yitabiriye icyo gitaramo harimo: Gakondo group ihagarariwe na Masaba Intore, Nzayisenga Sophie (umugore ucuranga inanga), Itorero Ababeramuco rya Mushabizi JMV, Itorero Inyamibwa na Bizumuremyi Marcel (umuhanzi w’imivugo)

Gakondo Group niyo yafashe umwanya munini muri iki gitaramo kandi ihaserukana ishema n’isheja, mu ndirimbo nziza zitandukanye zaba iz’ingabo n’izirata ubutwari, zaba iz’urukundo, karahanyuze zitandukanye, umurishyo w’ingoma z’umwimerere, n’ibindi. Mu majwi akeye kandi aranguruye, aho Intore Masamba yakoze mu nganzo bigashyira kera aherekejwe na Jules Sentore Daniel Ngarukiye n’abandi baririmbana muri Gakondo group, ikindi cyaranze gakondo n’imyambaro nyarwanda ikeye aho wabonaga baberewe rwose kuburyo bugaragara.

Benshi twaganiriye bo muri Diaspora Nyarwanda batanze ubuhamya bemeza ko kuba baje muri iki gitaramo byongeye kubereka ubwiza bw’umuco Nyarwanda nkuko bisanzwe ariko ko byabaye akarusho ko kandi baboneyeho no kubona uko u Rwanda rutera imbere mu gutegura no kwakira abantu muri gahunda nkizo z’umuco mu rwego rwo gukora ubuvugizi bw’akarere ka Nyanza gaherereyemo Ingoro umwami yari atuyemo kandi kabitse amateka menshi y’u Rwanda rwo hambere.

Musanabera Wyns Gratias uturuka mu Bubiligi kandi uvuka i Nyanza, mu buhamya bwe yagize ati iki gitaramo cyari gikwiye kujya kibaho kenshi kuri ba mukerarugendo benshi baza gusura u Rwanda, aho bajya bajya gusura Ingagi n’ibindi byiza bitatse u Rwanda hanyuma bagasoreza i Nyanza berekwa n’igitaramo nk’iki gitanga isura nyayo y’amateka n’umuco Nyarwanda.

Musanabera n'umugabo we

Muri iki gitaramo kandi Ubuyobozi bw’Akarere ka Nyanza bwatumiye abaturage bose ngo baze bifatanye kunezerwa n’abashyitsi babagendereye baturutse kure, bose bahagurukira rimwe babyina bishimye ku buryo bunejeje bwerekana isura y’u Rwanda rwa none, n’ubusabane hagati y’abayobora n’abayoborwa, kandi hagati y’umuturage usanzwe n’abamuhagarariye mu nzego zitandukanye, muri rusange.

Abaturutse muri Diaspora Nyarwanda yo mu Bubiligi bo ntibifuzaga na gato gutaha, bari banyuzwe bihagije, bahuriza ku cyifuzo ko iki gitaramo nk’ ishusho nziza y’u Rwanda, cyakagombye kujya gitegurwa kenshi gashoboka i Nyanza.

Amatorero atandukanye yasusurukije iki gitaramo
Abahanzi bagize Gakondo Group bishimiwe cyane
Gakondo Group iyobowe na Masamba yari yabukereye
Mushabizi JMV na Nzayisenga Sophie bakirigita inanga
Cyari igitaramo gitaramo giteguwe mu buryo gakondo

[email protected]


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza