Abantu miliyoni 40 bavuga ururimi rw’Ikinyarwanda mu Karere

Abantu miliyoni 40 bavuga ururimi rw’Ikinyarwanda mu Karere


Yanditswe kuya 20-02-2012 - Saa 14:18'

Miliyoni 40 z’Abaturage muri aka karere k’Ibiyaga Bigari bavuga ururimi rw’Ikinyarwanda, ibi byatangajwe na Minisitiri w’Umuco na Siporo, Protais Mitali mu gihe isi yose kuri uyu wa 21 Gashyantare yizihiza umunsi mpuzamahanga w’ururimi gakondo.

Mu kiganiro cyihariye IGIHE.com yagiranye na Minisitiri Mitali yavuze ko abantu miliyoni 40 bumva kandi bakavuga Ikinyarwanda mu Karere k’Ibiyaga Bigari.

Yanavuze ko atari byiza ko abantu batandukanye mu Rwanda bakomeza kujya bavanga indimi z’amahanga n’Ikinyarwanda, yemeza ko ibi ari bibi kuko byica umuco ; yagize ati : “Ni bibi kuko umuco uhatakarira cyane”.

Umuyobozi w’Agashami k’Indimi zigizweho akaba n’Umwarimu muri Kaminuza Nkuru y’u Rwanda, Mbonankira Gregoire, yavuze ko Ikinyarwanda kivugwa cyane muri aka Karere bivuye ku mateka aho ibice by’u Rwanda byatwawe bigasigara mu bindi bihugu birimo Repubulika Iharanira Demokarasi ya Congo, Uganda na Tanzaniya.

Mbonankira yagize ati : “Ikinyarwanda kivugwa n’abantu benshi kuko ku Ngoma ya Cyami u Rwanda rwari rwagutse ariko bakaza kugabanya kuri ibi bice ariko Ikinyarwanda cyakomeje kuvugwa no kumwva n’abatuye muri ibyo bice.”

Yongeyeho ati : “I Masaka muri Uganda bumva Ikinyarwanda kariya gace kose kera kari ku Rwanda, ndetse no muri Congo i Masisi naho baracyumva neza wongeyeho n’agace ka Buha muri Tanzaniya naho baracyumva neza”.

Abaturage batandukanye bo mu Rwanda banenga uburyo hakomejwe kuvangwa indimi z’amahanga mu Kinyarwanda, bemeza ko bidatanga isura nziza.

Umwe mu baganiriye na IGIHE.com utuye mu Mujyi wa Kigali yagize ati : “Kenshi hakunze kugaragara abantu bavanga Ikinyarwanda n’izindi ndimi zo mu mahanga usanga babikora bashaka kwerekana ko bajijutse, njyewe inama nabagira ni uko bajya bakoresha ururimi rumwe”.

Minisitiri Mitali yavuze ko u Rwanda rushyize imbere ko Ikinyarwanda cyatera imbere, akaba ari muri urwo rwego hashyizweho Inteko y’Umuco n’Ururimi ; mu bizakorwa harimo gukangurira ababyeyi kuganiriza abana babo mu rurimo rw’Ikinyarwanda.

Ariko yongeyeho ko nta kibazo ko indimi z’amahanga zakomeza kwinjira mu Rwanda ariko zikaba zavugwa mu gihe cyacyo ; yagize ati : “Buri wese wavanga izi ndimi aba akwiye kumenya kubikora neza atari ukubigira ngo abe umusirimu”.

Abayobozi nibafate iya mbere mu guhesha ishema Ikinyarwanda

Umwarimu muri Kaminuza Nkuru y’u Rwanda, Mbonankira yavuze ko kenshi hari abayobozi badakoresha ingufu mu gusakaza ururimi rw’Ikinyarwanda, yagize ati : “Hari abayobozi bavuga imbwirwaruhame mu Cyongereza, aho abaturage benshi basaba ko ibyo bavuze bihindurwa mu Kinyarwanda, byaba byiza bihatiye kuvuga mu rurimi rw’Ikinyarwanda”.

Mu bindi Mitali yavuze ko hashobora kuzashyirwaho uburyo bw’uko hatangwa amasomo yihariye y’ururimi rw’Ikinyarwanda nk’uko higishwa izindi ndimi.

Ikinyarwanda gifite umwanya ukomeye mu mibereho y’Abanyarwanda. Ni rwo rurimi ruha Abanyarwanda ubushobozi bwo kuranga isi, kugaragaza imbamutima, gushyikirana baganira, bungurana ibitekerezo, bagezanyaho ubutumwa kandi Ururimi rw’Ikinyarwanda rufite uruhare rukomeye mu guhamya Umunyarwanda udafite isoni n’ubwoba by’umuco we kandi utisuzugura.

Ishami ry’Umuryango w’Abibumbye ryita ku Burezi, Ubumenyi n’Umuco (UNESCO) mu 1999, wahyizeho itariki ya 21 Gashyantare nk’umunsi mpuzamahanga wo gusigasira ururimi gakondo.

UNESCO ivuga ko umuco w’amahoro ushobora gushingira ku bantu bose bakoresha indimi zabo gakondo mu bwisanzure mu buzima bwabo bwose.

TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!

IBITEKEREZO