Amateka y’u Rwanda, intandaro yo gupfa k’ururimi rw’Ikinyarwanda

Yanditswe na Rene Anthere Rwanyange
Kuya 5 Gicurasi 2013 saa 05:14
Yasuwe : XX
0

Amateka atari meza yaranze u Rwanda yavukije bamwe mu banyarwanda amahirwe yo gukura bavuga Ikinyarwanda nk’ururimi kavukire, bituma aho baboneye urubuga rwo kuruvuga barugoreka.
Nk’uko amateka y’u Rwanda abigaragaza Abanyarwanda benshi batangiye guhunga igihugu cyababyaye bagana mu bihugu birukikije ndetse no mu mahanga ya kure kuva mu mwaka wa 1959, bitewe n’ubwicanyi n’itotezwa byakorerwaga Abatutsi nyuma byaje no kubyara Jenoside yakorewe Abatutsi mu 1994.
Mu guhungira mu mahanga, (...)

Amateka atari meza yaranze u Rwanda yavukije bamwe mu banyarwanda amahirwe yo gukura bavuga Ikinyarwanda nk’ururimi kavukire, bituma aho baboneye urubuga rwo kuruvuga barugoreka.

Nk’uko amateka y’u Rwanda abigaragaza Abanyarwanda benshi batangiye guhunga igihugu cyababyaye bagana mu bihugu birukikije ndetse no mu mahanga ya kure kuva mu mwaka wa 1959, bitewe n’ubwicanyi n’itotezwa byakorerwaga Abatutsi nyuma byaje no kubyara Jenoside yakorewe Abatutsi mu 1994.

Mu guhungira mu mahanga, Abanyarwanda bavukiyeyo, bakahakurira, byabaye ngombwa ko bakoresha indimi zaho kugira ngo bashobore kubaho. Ibyo byatumye Ikinyarwanda gisigara gikoreshwa iyo babaga bari mu miryango iwabo gusa, bituma batabashaga kwiga imyandikire n’ikibonezamvugo byacyo.

Umwe mu banyarwanda utarashatse ko izina rye ritangazwa, wakuriye muri Uganda yatangarije IGIHE ko impamvu agoreka ikinyarwanda ari uko kimugora kukivuga neza ndetse no kucyandika. Agira ati “Nakuze nkivanga n’ikigande bitewe n’uko navukiye muri Uganda. Nahigiye amashuri abanza kandi nta Kinyarwanda twahuraga na cyo. Nyuma tugarutse mu Rwanda, nakomereje amashuri yisumbuye. Ni ho nigiye bike mu byo mbasha kuvuga no kwandika neza.”

Yakomeje atangaza ko n’ubwo ababyeyi be bageragezaga kumwigisha Ikinyarwanda mu gihe babaga Uganda, bitamworoheraga kubimenya neza kuko yakomezaga kukivanga n’Ikigande yakoreshaga ku ishuri.

Niyomugabo Cyprien, Intebe y’Inteko Nyarwanda y’Ururimi n’Umuco yagize icyo abitangazaho, agaragaza ko amateka adakwiye kuba intandaro yo gupfa k’ururimi, ahubwo ko buri munyarwanda wese akwiye gukora uko ashoboye, akagira umuhate n’inyota byo kumenya neza ururimi rwe kavukire kuko ari ishema ry’umunyarwanda wese.

Nk’uko Inteko Nyarwanda y’Ururimi n’Umuco idahwema kubivuga, abanyarwanda bose bakaba bashishikarizwa guharanira icyateza imbere ururimi rwabo, bakirinda icyatuma rusaza ndetse runavangirwa kuko ari rwo ndangamuntu yabo ya mbere.


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza