Dr Vuningoma yakebuye abayobozi n’abahanzi bahohotera Ikinyarwanda

Yanditswe na Kanamugire Emmanuel
Kuya 20 Gashyantare 2016 saa 10:15
Yasuwe :
0 0

Mu gihe u Rwanda rwitegura kwifatanya n’ibindi bihugu kwizihiza umunsi mpuzamahanga w’ururimi kavukire, Umunyamabanga Nshingwabikorwa w’Inteko Nyarwanda y’Ururimi n’Umuco, Dr Vuningoma James yakebuye abahanzi n’abayobozi bavanga Ikinyarwanda n’izindi ndimi.

Abayobozi bakwiye kwirinda kuvanga indimi mu rwego rwo guha agaciro ururimi kavukire, abahanzi bakirinda gutoba Ikinyarwanda mu buhanzi bwabo.

Uyu munsi uzaba ufite insanganyamatsiko igira iti: “Ikinyarwanda kinoze, ishingiro ry’Uburere n’Ubumenyi ».

Ururimi kavukire, Ikinyarwanda cy’umwimerere cyakunze kumirwa n’izindi ndimi z’amahanga ugasanga hari ababangukirwa no kuvuga ijambo runaka mu ndimi z’amahanga kurusha mu Kinyarwanda,ururimi bonse.

Uwo muco kandi ugaragara mu bahanzi, yabakebuye mu kiganiro yagiranye na IGIHE.

Yagize ati “ Twirinde kuvanga indimi no gushyoma, kuko ari uguhohotera Ikinyarwanda.

Kimwe mu byakunze kuranga abahanzi harimo guhimba amagambo mashya ariko adashingiye ku Kinyarwanda cyangwa se kukigoreka n’ibindi.

Vuningoma ati “ Twirinde kugwa mu mutego w’ibigezweho, abahanzi nibirinde gutobanga Ikinyarwanda bumve ko nk’ururimi rufite umupaka ntarengwa.”

Mu gihe bagize ikibazo ku mvugo,Vuningoma yabemereye ko bajya babegera bakabasobanuza ku byo batumva, ariko bakirinda gutandukira mu bikorwa by’ivangandimi no kwihimbira.

Yakomeje agira ati “ Nibaze tujye inama duteze imbere ururimi rwacu.”

Umuyobozi w’ishami ry’Ururimi mu Nteko Nyarwanda y’Ururimi n’Umuco, Nsanzabaganwa Modeste yavuze ko igihe kigeze ngo ururimi kavukire rw’Abanyarwanda, aricyo Kinyarwanda gihabwe agaciro.

Aba mbere bazabigiramo uruhare ni abayobozi bageza imbwirwaruhame ku bantu benshi, bakwiye kwirinda kuvanga indimi no gukoresha imvugo zidakwiye. Baba aba Leta, ab’amadini n’abikorera bakangurirwa guharanira iterambere ry’Ikinyarwanda.

Yagize ati "Abo bayobozi b’ingeri zose, yewe n’ababyeyi ndetse n’abarimu ku mashuri, babe intangarugero mu kunoza Ikinyarwanda kuko ariyo ndangamuntu yacu.”

Umunsi Mpuzamahanga wahariwe kuzirikana indimi kavukire watangiwe n’ibikorwa bitandukanye birimo icy’imurika ry’ibitabo byanditse mu Kinyarwanda ndetse n’ibikoresho gakondo.

Umunsi nyir’izina uzizihirizwa kuri Sitade Amahoro ntoya ku Cyumweru tariki ya 21 Gashyantare 2016 guhera saa cyenda, ariko mbere yaho hateganyijwe ikiganiro ’Kubaza bitera kumenya’ buri wese yatangamo ibitekerezo ku iterambere n’inozwa ry’ikinyarwanda, kizaca kuri Radio na Televiziyo y’u Rwanda na radio z’abaturage zose guhera saa yine kugeza saa sita z’amanywa.

Umunyamabanga Nshingwabikorwa w’Inteko Nyarwanda y’Ururimi n’Umuco, Dr Vuningoma James

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza