Hari ababyeyi badakozwa ibyo kwigisha abana babo Ikinyarwanda

Yanditswe na Ferdinand Maniraguha
Kuya 27 Gashyantare 2016 saa 04:18
Yasuwe :
0 0

Kwigisha Ikinyarwanda mu mashuri yose na za Kaminuza ni umwe mu myanzuro yafatiwe mu nama ya 13 y’umushyikirano hagamijwe gusigasira ururimi kavukire rushobora gutakaza umwimerere hatagize igikorwa.

Mu nama y’Igihugu y’umushyikirano ku nshuro ya 13, Perezida wa Repubulika Paul Kagame, yagaragaje ko bamwe mu Banyarwanda basigaye basohoka mu ishuri batazi Ikinyarwanda, avuga ko kukiga bidakwiye kugarukira ku wahisemo kwiga indimi gusa ahubwo gikwiye kongerwamo ingufu kikagera ku banyeshuri bose.

Iki gitekerezo yagitanze ubwo umushumba wa Diyoseze Gatulika ya Byumba, Musenyeri Servelien Nzakamwita yari atanze icyifuzo ko ururimi rw’Ikinyarwanda rukwiye kwigwa rukaminuzwa, cyane ko mu burezi bw’u Rwanda kidahabwa agaciro gikwiye kandi ari yo soko y’iterambere ry’u Rwanda abantu bakwiye kumenya no gukomeraho.

Asubiza kuri iki gitekerezo, Minisitiri w’Uburezi, Musafiri Papias yavuze ko hari integanyanyigisho ivuguruye izatangira gushyirwa mu bikorwa mu mwaka wa 2016, yemeza ko inyigisho zijyanye n’Ikinyarwanda zahawe umwanya uhangije.

Minisitiri Musafiri yavuze ko kugera mu mwaka wa gatatu w’amashuri abanza bazajya biga mu rurimi rw’Ikinyarwanda, naho mu wa kane w’abanza bakiga mu Cyongereza ariko bagasigarana iri somo rifite amasaha menshi kuruta ayo ryari rifite.

Hari ababyeyi batabikozwa

Bamwe mu babyeyi baganiriye na IGIHE bavuga ko kwigisha abana Ikinyarwanda guhera mu kiburamwaka kugera mu mwaka wa gatatu, bizatuma bazamuka batazi indimi z’amahanga.

Hari n’abavuga ko uyu mwanzuro nushyirwa mu bikorwa bazajyana abana babo kwiga mu bihugu bihana imbibi n’u Rwanda.

Mutamba Josephine, utuye mu Karere Kicukiro yagize ati “Umwana iyo ahereye hasi yiga indimi z’amahanga bituma azimenya kuko ubwonko bwe buba bufite ubushobozi bwo gufata cyane. Ikinyarwanda kigishwe nk’isomo ariko andi masomo akomeze yigishwe mu Cyongereza nk’uko bisanzwe.”

Bugingo Daniel, atuye mu Karere ka Rubavu, avuga ko guhindagura integanyanyigisho bigira ingaruka ku bana.

Yagize ati “Amambere bakuyeho Igifaransa, bucyeye bati turakigaruye, none ngo abana bagiye kujya bigishwa amasomo yose mu Kinyarwanda. Ibi bigira ingaruka ku bana bacu kuko usanga umukuru wagafashije murumuna we gusubiramo amasomo abura aho ahera, natwe ababyeyi biratubangamira cyane... Nibaramuka babishyize mu bikorwa abana banjye bazajya kwiga mu bihugu duhana imbibi.”

‘Ababyeyi ntibakwiye kugira impungenge’

Mu kiganiro yagiranye na IGIHE, Umuyobozi w’ Ikigo cy’Igihugu cy’Uburezi (REB), Gasana Janvier yavuze ko kwigisha umwana ururimi kavukire akiri muto bitamubuza kumenya indimi z’amahanga.

Yagize ati “Kwigisha abana Ikinyarwanda bakiri bato ntibibabuza kumenya no kuvuga indimi z’amahanga. Nubwo bigishwa mu Kinyarwanda, biga n’izindi ndimi z’amahanga nk’isomo.Burya guhera mu mwaka wa kane umwana aba akiri muto ku buryo bitamubuza kumenya neza indimi z’amahanga, nubwo yaba atarazigishijwe mu myaka yo hasi.”

Yakomeje avuga ko ubushakashatsi butandukanye burimo n’ubwakozwe na UNESCO, bugaragaza ko iyo umwana yigishijwe mu ndimi z’amahanga akiri muto, bishobora kumugiraho ingaruka zitandukanye zirimo kutumva neza ibyo yigishijwe, gukura yisanisha n’abene izo ndimi (abanyamahanga) ndetse akagera aho we ubwe yumva yiyambuye ubweneguhugu bwe.

Gasana agira inama ababyeyi yo kwakira iki cyemezo neza, bakitandukanya n’imyumvire yo kumva ko kuba abana babo bavuga cyangwa biga indimi z’amahanga ari ishema, kuko ahubwo bishobora kugira ingaruka ku gihugu haramutse hadafashwe ingamba zihamye.

U Rwanda ni kimwe mu bihugu bifite amahirwe yo kugira ururimi rumwe ruhuza abenegihugu bose, ariko hakaba hari ikibazo cy’uko bamwe mu Banyarwanda batarukoresha uko bikwiye.

Hashyizweho Inteko Nyarwanda y’Ururimi n’Umuco ngo irengere kandi iteze imbere imikoreshereze y’ururimi rw’Ikinyarwanda.

Gasana Janvier, Umuyobozi w'Ikigo cy'Igihugu cy'Uburezi, REB

[email protected]


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza