Ijambo ‘Lavabo’ ni rimwe mu ashobora kubonerwa Ikinyarwanda

Yanditswe na Bayingana Bonfils
Kuya 4 Werurwe 2016 saa 07:02
Yasuwe :
0 0

Ijambo ‘lavabo’ risobanura igikoresho bakarabiramo rikomoka ku kilatini ‘Lavare’ bisobanura gukaraba, birashoboka ko Abanyarwanda barihindura ubwogero cyangwa ‘urukarabiro’ kandi bigahama.

Abanyarwanda baratangaje bitegereje ‘Computer’ uburyo yifitemo ubuhanga yahawe na muntu maze mu bushishozi bati ni ‘Mudasobwa’. Kimwe ndetse na ‘Internet’ bamwe bise ‘Murandasi’ bahereye uko uruyuzi rurandaranda.

Ubusanzwe umurimo wo guha inyito nshya ibintu bitandukanye ugomba kugirwamo uruhare n’Inteko Nyarwanda y’Ururimi n’Umuco, mu rugamba yatangiye ndetse izerekana n’umusaruro warwo. Iyo Nteko izifashisha abenegihugu mu byiciro byose mu kurengera ururimi rw’Ikinyarwanda kugira ngo rwe gukomeza kuzongwa n’amazina y’amatirano.

Ni muri urwo rwego iyo Nteko igiye gushyira ahabona urutonde rw’amuuga (amagambo akoreshwa mu myuga) asaga ibihumbi 87 yamaze gukusanya asigaje gushyirwa mu ngeri zayo.

Mu kiganiro IGIHE yagiranye n’Umuyobozi w’Ishami rishinzwe ururimi rw’Ikinyarwanda, Ubushakashatsi no kuruteza imbere mu Nteko Nyarwanda y’Ururimi n’Umuco, Nsanzabaganwa Modeste, yavuze ko ururimi rugiye kurindwa ubwinshi bw’amagambo y’amatirano.

Yagize ati “Twakoze ubushakashatsi tubona amagambo (amuuga) asaga ibihumbi 87 atarashyirwa mu ngeri zitandukanye, arimo gushyirwamo, vuba aha hakazasohoka ibitabo birimo amagambo yashyizwe mu ngeri y’umuntu n’ibimera."

Nsanzabaganwa yavuze ko ayabonetse yashyizwe mu kigega cy’amagambo kizagenda gishyirwamo n’andi, igihe runaka akaba yakwifashishwa mu rwego rwo gukumira itira rya hato na hato.

Amagambo yo mu ngeri y’umuntu n’ibimera azasohoka muri Kamena 2016, nyuma hakazakurikiraho ayo mu ngeri y’imiyoborere, irimo amagambo nka perezida, demokarasi, repubulika n’ayandi.

Ayo magambo ngo ni ayagiye azanwa n’ubukoroni bwashyize imbere imvugo z’amahanga, nyamara Abanyarwanda bari bafite ubuhanga bwo guhanga amagambo mu mwimerewe w’Ikinyarwanda. Ubukoroni bwasanze ibintu byose bifite amazina yavuye muri gakondo y’Abanyarwanda.

Ayo magambo azaba asobanuye mu gifaransa no mu cyongereza, ku buryo buzorohera uwari usanzwe ayakoresha mu zindi ndimi kuyamenya.

Yatanze urugero ko, niba umutu yari asanzwe avuga ko runaka yagize imvune muri ‘cheville’, ijambo ry’ikinyarwanda rizahimbwa nyuma uwari usanzwe akoresha iry’igifaransa agenzure ko bihuye, atavuze ikindi.

Amagambo mashya azahimbwa afatiye ku Kinyarwanda n’indimi-shami zacyo nk’igikiga, ikirere, n’izindi, zibyazwemo amagambo yajya asobanura inyito zikifashisha amagambo y’amatirano.

Ubwo buryo ntibuvuze ko buzaca burundu gukoresha amagambo y’amatirano, ariko ngo buzayagabanya ku buryo bugaragara, nubwo hakiri inzitizi z’amagambo y’amatirano asa n’ayahamye ku buryo kuyashyingura bigoranye, ndetse n’ayoroshye gukoresha ku buryo mu Kinyarwanda ashobora kuba asobanurwa n’amagambo menshi.

Urugero, ni aho umuntu ashobora gukandagira undi atabishaka akavuga ati “Sorry”, mu gihe uwisegura yakoresha ngo umbabarire sinabishaka, nabyo bigaragara ko amagambo yabaye menshi.

Ayo magambo namara guhangwa, Abanyarwanda bazashishikarizwa kuyakoresha biciye mu bufatanye n’ibigo bitandukanye birimo ibya Leta n’iby’abikorera, ku buryo nk’ibigo by’itumanaho bizajya biyakoresha abantu bakayamenyera. Abanyeshuri bakayakoresha, ndetse n’abayobozi bakayakoresha ku buryo abaturage batazatinda kuyamenya no kuyamenyera.

Mu gihe cya vuba ijambo ‘Lavabo’ hamwe n'andi asaga ibihumbi 87 araza kubonerwa inyito y'Ikinyarwanda

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza