Minisitiri Uwacu yasobanuye ko mu rurimi rw’Ikinyarwanda hahishemo ubukungu

Yanditswe na Ferdinand Maniraguha
Kuya 22 Gashyantare 2016 saa 06:32
Yasuwe :
0 0

Ibihugu byateye imbere kurusha ibindi bibikesha ururimi kavukire byarwo.Abahanga n’inzobere babayeho mu mateka ni abakuze bakoresha ururimi rwabo kavukire.Mu Rwanda birashoboka mu gihe ururimi kavukire, Ikinyarwanda gikomoka kuri Gihanga Ngomijana wahanze u Rwanda cyahabwa agaciro.

Umwana ukiri ku nda yumva ururimi kavukire ndetse na nyuma y’igihe gito avutse agatangira gukoresha urwo rurimi ahamagara ababyeyi be.

Urwo rurimi nirwo umwana aherwamo ubumenyi bwa mbere bukamufasha kugenda amenya ibintu bitandukanye bimukikije. Nirwo kandi rumufasha kumenya umuco n’amateka by’igihugu cye.

Ku mugoroba wo ku Cyumweru tariki ya 21 Gashyantare 2016 ku munsi mpuzamahanga wahariwe ururimi kavukire, Abanyarwanda n’abanyamahanga bahuriye mu gitaramo, bizihiza uwo munsi mu Rwanda wari ufite insanganyamatsiko igira iti “Ikinyarwanda kinoze, ishingiro ry’uburere n’ubumenyi.”

Minisitiri wa Siporo n’Umuco Uwacu Julienne yashimangiye ko kwigisha Abanyarwanda ururimi rwabo gakondo bakarunononsora bizabageza ku rugero nk’urw’ibindi bihugu byahereye ku ndimi gakondo zaho bigatera imbere.

Yagize ati “Gusirimuka, kumenya indimi z’amahanga ntabwo bigomba kutuvana kuri gakondo yacu. Ibihugu byose byateye imbere hirya no hino ku Isi bikaba bifite ubukungu bukomeye, bikaba bifite abayobozi bakomeye n’abahanzi bakomeye, ni abubakiye ku ndangagaciro z’umuco w’ibyo bihugu ugaragara mu rurimi kavukire.”

Yakomeje agira ati “Abanyarwanda twahisemo kubakira ku muco wacu tuzirikana ko nta terambere rirambye dushobora kugeraho igihe umuco wacu utabaye igicumbi cy’iryo terambere nyakuri.”

Yasabye abarezi gukomeza gutanga ubumenyi bwiza bubereye umwana w’u Rwanda, ariko bakazirikana ko badashingiye ku muco baba bata inyuma ya Huye.

Yagize ati “ Abarezi mu mashuri tuzirikane neza ko imibare, ubutabire n’ibinyabuzima n’ibindi byose twigisha abanyeshuri, bitubakiye ku muco wubakiye kuri rwa rurimi kavukire ntacyo byazamarira igihugu.”

Muri rusange ngo kwiga ururimi kavukire bifasha kumenya n’izindi ndimi z’amahanga zifasha mu gusabana n’abandi no kuzikoresha mu bikorwa bitandukanye, ariko ngo iyo utamenye ururimi kavukire ari narwo rwa mbere umuntu atekerezamo, ntagera ku rwego rwo kumenya izindi neza.

Umuyobozi w’Inteko Nyarwanda y’ururimi n’umuco, Dr Niyomugabo Cyprien yatangaje ko mu rwego rwo gukomeza guharanira ko Ikinyarwanda gitezwa imbere kandi kigakomeza guhabwa agaciro,barimo guhanga amuga(amagambo) asobanura amagambo y’amavamahanga akomeje gukoreshwa mu Rwanda, ariko akazaba ari ay’umwimerere ndetse no gushaka uburyo inkoranyamagambo y’Ikinyarwanda yashyirwa kuri interineti no kuri telefoni.

Leta y’u Rwanda yahaye agaciro Ikinyarwanda ikigira ururimi rwigwamo amasomo yose kugeza mu mwaka wa gatatu w’amashuri abanza.

Ururimi rw’Ikinyarwanda ruvugwa mu ndirimbo yubahiriza igihugu ko ruhuza Abanyarwanda, ndetse rukanemezwa n’Itegeko Nshinga nk’ururimi rukoreshwa mu butegetsi.

Itegeko Nshinga ryo mu mwaka wa 2003 kugeza uko ryavuguruwe kugeza ubu ryishyiraho Inteko Nyarwanda y’Ururimi n’Umuco ari na yo ishinzwe kurengera urwo rurimi.

Abahanzi basabwe gukoresha Ikinyarwanda kinoze
Abanyamahanga bari bitabiriye Umunsi Mpuzamahanga w'Ururimi kavukire
Abanyeshuri bo mu mashuri yisumbuye bitabiriye uwo munsi ari benshi
Abayobozi batandukanye bitabiriye iyizihizwa ry'Umunsi Mpuzamahanga w'Ururimi Kavukire
Amatorero na yo yasusurukije abari aho

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza