Perezida Kagame yashimiwe umusanzu we mu guteza imbere Ikinyarwanda

Yanditswe na Philbert Girinema
Kuya 21 Gashyantare 2016 saa 02:57
Yasuwe :
0 0

Perezida Paul Kagame yabayeho mu mateka agoranye y’ubuhunzi, yashoboraga gutuma yibagirwa ururimi rw’Ikinyarwanda ariko arukoresha mu buryo budafite amakemwa, urugero rwagombye kwigisha benshi batwawe n’ivangandimi.

Mu buzima bwe, Perezida Kagame yabaye imyaka myinshi mu bihugu birimo Uganda ndetse na Leta Zunze Ubumwe za Amerika aho bakoreshaga icyongereza mu kigwi cy’Ikinyarwanda.

Nubwo yakuriye muri iyo mico, ntibimubuza gukoresha Ikinyarwanda cyiza gitomoye mu butumwa ageza ku baturage hirya no hino mu gihugu no mu mahanga. Akarusho karimo ni ku minsi mikuru itandukanye aho ubutumwa bwe abugeza ku Banyarwanda abicishe mu Kinyarwanda gitomoye, yagera ku banyamahanga akabubagezaho mu ndimi bumva.

Hari ariko bamwe mu bayobozi usanga hari igihe bajya gusura abaturage bakabagezaho ubutumwa ariko ntibagire icyo bavanamo kubera ivangandimi rikunda kubaranga.

Urugero rwa hafi ni umuyobozi umwe mu bagombaga kugeza ubutumwa bukomeye ku baturage mu mpera z’umwaka ushize, watangiye kubagezaho ijambo mu Cyongereza abaturage bagasa n’abakomeera ariko agakomeza akarisoza ntihagire n’usobanurira abaturage ibyo yavugaga, ariko yaganira n’abanyamakuru bagakoresha Ikinyarwanda.

Mu minsi yashize hari ijambo ry’umwe mu bayobozi bakomeye mu Rwanda nawe wakoresheje Icyongereza mu ijambo ry’ikinyarwanda yagezaga ku baturage, ryanenzwe na benshi.

Umuyobozi w’Inteko Nyarwanda y’ururimi n’umuco, Niyomugabo Cyprien, mu kiganiro ‘Kubaza bitera kumenya’ cyatambutse kuri Radiyo na Televiziyo Rwanda ndetse na Radiyo z’abaturage, nawe yatanze urugero rw’ubutumwa umuyobozi ageza ku baturage bagasigara bibaza icyo avuze, aho kumva ubutumwa bwe bagasigara mu rujijo.

Yagize ati “ Umuyobozi akavuga ati ‘iyo ushaka kwihutisha iterambere udafite commitment [Soma: komitimenti] ntabwo bishoboka’. Icyo gihe gihe hari abaturage batangira kwibaza itafari ryo mu myubakire, bakibaza bati ‘ ayo matafari yitwa commitment twayabona gute ngo tuyagure.”

Yahereyeho asaba abayobozi kubaha ababateze amatwi babagezaho imbwirwaruhame ikwiye bakirinda kuvanga indimi kabone n’iyo baba batabikoreye ubushake, ahubwo bakajya bafata umwanya uhagije wo gutegura ubutumwa bagenera abo bashinzwe.

Umunyamabanga Nshingwabikorwa w’Inteko Nyarwanda y’Ururimi n’Umuco, Dr Vuningoma James, yavuze ko bimwe mu bitera bamwe mu bayobozi kuvanga indimi harimo amateka y’ubuhunzi Abanyarwanda bagiye banyuramo ariko ko imyaka 21 ishize igihugu cyiyubatse buri wese yakagombye kuba yarize Ikinyarwanda azi kugikoresha neza.

Dr Niyomugabo yatanze urugero rwa Perezida Kagame ko nawe yabaye mu mateka y’ubuhunzi ariko akaba avuga Ikinyarwanda mu buryo butomeye.

Yagize ati “Ayo mateka na Perezida wa Repubulika yayabayemo, ariko avuga Ikinyarwanda cyiza gitomoye, ni indangagaciro yiyubatsemo zo kumva ko ari Umunyarwanda, ni cyo ndi Umunyarwanda bivuga , gukunda igihugu.”

Yakomeje avuga ko bituma Abanyarwanda babona aho barebera mu kwita no guha agaciro Ikinyarwanda.

Yongeyeho ati “Ni umwe mu badufasha mu bukangurambaga bwo guteza imbere Ikinyarwanda, turamushmira.”

Ku badaha Ikinyarwanda agaciro uko bikwiye, Niyomugabo ati “Bigire kuri Perezida wa Repubulika, utabishoboye yige kuko n’izindi ndimi baraziga.”

Mu rwego rwo guha agaciro ururimi rw’ikinyarwanda kaminuza y’u Rwanda igiye gutangiza amasomo yacyo mu cyiciro cya gatatu cya kaminuza mu Rwanda, kandi gisanzwe kigwa hirya no hino ku Isi.

Muri icyo kiganiro, abagikurikiranaga hirya no hino batanze ibitekerezo bashimye Perezida Kagame uburyo abagezaho ubutumwa bwiza kandi buri mu Kinyarwanda cyiza bakanyurwa ndetse na Minisitiri w’Ububanyi n’Amahanga Louise Mushikiwabo, bose bashimirwa ko batibagiwe umwimerere w’ururimi kavukire.

Mu gihe Isi yose yiteguye kwizihiza umunsi mpuzamahanga w’ururimi kavukire (gakondo) u Rwanda rukomeye ku rurimi rw’Ikinyarwanda n’indimi shami zigikomokaho zirimo Olukiga, amashi, Ikirera, Ikigoyi, Ururashi, n’urusobyo ruvugwa ku Nyundo, kandi ko zizakomeza kurindwa.

Gutekereza mu ndimi kavukire nibyo byagejeje kugera ku rwego rw’ubuhangange abahanga bose ku Isi, baba mu mibare, ubutabire n’ubugenge. Ikinyarwanda nacyo kugitekerezamo byafasha abashaka kuba ibihangange niyo mpamvu Guverinoma y’u Rwanda yafashe umwanzuro w’uko kugeza mu mwaka wa gatatu w’amashuri abanza amasomo yose agomba gutangwa mu Kinyarwanda.

Insanganyamatsiko y’uwo munsi urimo kwizihizwa uyu munsi iragira iti “Ikinyarwanda kinoze, ishingiro ry’uburere n’ubumenyi.”

Dr Niyomugabo, Umunyamakuru wa RBA hagati na Dr Vuningoma mu kiganiro

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza