Zimwe mu mvugo n’amagambo byigeze gukundwa mu Rwanda

Zimwe mu mvugo n’amagambo byigeze gukundwa mu Rwanda


Yanditswe kuya 2-05-2012 - Saa 17:44'

Hari amwe mu magambo waba warahoze wumva ariko hanyuma ugasanga atacyumvikana cyangwa se atakinavugwa ukibaza aho yaba yararengeye ukahayoberwa.

IGIHE yagerageje gushakisha amwe muri ayo magambo iyashyira hamwe kugira ngo ibafashe kongera kwiyibutsa amwe muri ayo hamwe n’uko yagendaga akoreshwa. Hano hakaba hagaragaramo amagambo 65 yaba yarigeze gukoreshwaho cyane, ariko akaba atakivugwa henshi.

Ushobora kwibaza igihe waba uherukira kumva umuntu avuga ijambo “Icyarahani” ubwo wenda ashaka kuvuga imashini ikoreshwa mu kudoda imyambaro, ukumva hashize igihe kitari gito.

Si iri rero gusa kuko mu nzego zitandukanye z’ubuzima mu Rwanda rwo hambere ariko bitari kera cyane, hari n’izindi mvugo zagiye zamamara cyane ariko zikagenda zirangira muburyo umuntu atamenye cyangwa ugasanga zisigaye zikoresha gake. Izi mvugo ntibyari ngombwako ziba ari ikinyarwanda cy’ukuri kuko hari nkizo wasangaga ari izituruka mu zindi ndimi ahubwo wenda ugasanga zivugwa mu buryo wumva budahuye neza n’indimi z’umwimerere zikomokamo.

Ijambo “le tariki” basomaga lotariki aka kakaba ari akajambo kakoreshwaga kenshi bashaka kuvuga amatariki ntikakibaho ariko n’ubundi wenda koko ugasanga byari bikwiye ko gakurwaho mu mvugo nyarwanda.

Izindi ngero ni nka “murare aharyana ahataryana harare umwanzi!” ijambo wasangaga akenshi rikoreshwa mu gusezeranaho mu ijoro.
“bwakeye" byaba indamukanyo cyangwa kuvuga ko izuba ryarashe.

Muribuka za “kazaroho”, ubwo zabaga ari utubari tw’inzagwa ahenshi turimo umuziki mwinshi wabaga uva muri “za Bande cassette double micro” cyangwa iradiyo ivugira mu kibindi ubundi abantu bamara gushira inyota bakibyinira cyane.

“Amataratara, amadarubindi”: Bashaka kuvuga indorerwamo z’amaso cyangwa “Lunette” mu rurimi rw’igifaransa.

“Takataka”: Ni ubucuruzi bw’ubuconsho bwakorerwaga muri za gare bategeramo amamodoka cyangwa mu masoko ariko ahanini umucuruzi wese atwikiriza ibicuruzwa bye umutaka.

“Ubuconsho”: Ibicuruzwa byinshi bivanze bidahuje amoko ariko biciriritse.

“Ikomoni”: ingurube.

“Utubuye two kwica amaga”: Amabuye bakubisha ku birenge boga, kugira ngo bacye, bacyire imyate n’amaga. Hacye cyane mu byaro aracyakoreshwa.

“Impyisi yarongoye!”: Imvura igwa izuba riva.

“Mpagaze bwuma, mfuze bukwasi”: kuba wumva umeze neza udafite ikibazo.

“Igicugutu (igitogotogo)”: ikinyabiziga gikozwe mu biti kitakiboneka henshi uretse muruhengeri.

“Amangazine”: Iduka.

“Mangaze (Magasin)”: Ibicuruzwa bitari caguwa byaguzwe ari bishyashya mu iduka.

“Gupfira ifiyeri”: kwihangana nyugaragaze ikibazo ufite utinya kugawa.

“Mbatanze umushi”: Gutanga abandi kubona ikintu.

“Umudiho/kuwuceka”: Kubyina cyane uryohewe.

“Kujya muri boom”: Ubu byiswe kujya muri fête, ikirori, party n’ibindi.

“Ububingwa”: Kuba intyoza cyangwa umunyabwenge ahantu hake ushobora kuryumva kuri ubu ni mu ijambo “ikoranabubingwa” bashaka kuvuga ikoranabuhanga.

“Umukoboyi”: Umubingwa umujama kuri ubu.

“Indara”: Ikirara.

“Nyirakamurari”: Urusenda rwabaga ari udusenda tw’ubwoko buto cyane ariko bukora cye twaribwga mu byaro cyane mu mijyi ho baburyaga ari ifu.

“Pilipili-mbuzi”: Urusenda runini rw’umuhondo rukiboneka henshi mu masoko.

“Urunyogwe”: Amashaza atumye kandi adakomeye yakundaga gutekanwa n’igitoki.

“Umuramburo”: (w’urupapuro).

“Kwikuruza”: Kwihanaguza hasi mu byatsi kubikuta by’ubwiherero n’ukundi kwihanagura kwinshi kutari gufututse. Kera benshi isuku yarabagoraga kwikuruza bikaba nk’umuco, ariko uteri mwiza.

“Kwihagarika”: N’ubu gake riracyakoreshwa, ni ukunyara.

“Kugenda nka nyomberi”: Kugenda ugahera.

“Gukwepa”: Guhunga cyangwa kwihisha.

“Umunyoni”: Umujura.

Nko kuri ubu ni gacye wakumva umuntu agira ati; “Enda hano Kajyungu ( ‘Kajyunguri’ ni akazina bakundaga kwita abana b’igara rito hambere), fata iriya mbegeti (indobo) nini ushyiremo ka gafu k’amasaka ushake na ka gapira/ agapipiri (akabido) ka 7 ushyire ya nzoga y’umwikamire (inzoga y’ibitoki itarimo amazi) unshyirire Nyokorome Uncle/oncle) uti" mbifurije noheli nziza n’umwaka mushya muhire "Muzawurye Ntuzabarye!!”

“Teyatere”: Ikinamico yo kuri radio.

“Giswi”: Byeri ya primus.

“Bazooka”: Shikareti.

“Mushikacye”: Burusheti(brochette).

“Isitimu”: Itoroshi(torch).

“Amakote”: Sambusa.

“Injanga”: Indagara.

“Kwidumbaguza/kwidumba”: Kujya koga mubizenga imigezi n’imigende. Byakundaga gukorwa n’abana bagiye kuragira, n’ubungubu hakeya biracyabaho.

"Amajyari"/amavunja/imvuja/amajyanjyari.

“Abaforodeli”: Abacururizaga mu mihanda mu Mujyi wa Kigali bataratangira kubuzwa iyo mikorere. Akenshi bacuruza ibikinisho by’abana, imitako ibisokozo, amalunette yijimye cyangwa y’izuba, n’utundi ducogocogo.

“Amajyambere”: Ubu imvugo yabaye iterambere.

“Mobayilo (mobile)”: Uku niko telefoni zigendanwa zakundaga kwitwa zikiza muri za 1998.

“Gongaho mwana, teraho, Cegera”: Amacensi , yo n’ubu agikoreshwa aho ari ugukubitanaho ibipfunsi murwego rwo gusuhuzanya.

“Zirye/Zikonke”: Ni ubundi buryo bwo gusuhuzanya bwigeze kwamamara.

“Ikizungerezi”: Umukobwa w’ubwiza budasanzwe.

“Inzego”: Umukobwa, akenshi byakoreshwaga ku bakobwa beza b’abanyamujyi, ni irya vuba aha.

“Icyana”: Umukobwa ariko ukundana na runaka kuri ubu bavuga umwana.

“Gusharama/kwâka ndetse no kuba kumicyo”: Gusa neza kwambara neza ukaberwa.

“Kujya hoolo/swingi/free”: Kumva uguwe neza wishimye ahanini ubukesha inzoga cyangwa n’ibindi abenshi bakwita ibiyobyabwenge.

“Kubaza ngo “agaki?”: Gutangara.

“Urufito”: Amafaranga menshi.

“Publi-phone international”: Telefoni rusange zari iza rwandatel ntizikiboneka cyane.

“Gushona”: Kubona gutera imboni.

“Ku buzima bwacu!!!mugakomanya ibirahuri birimo inzoga!”: murabyibuka cyane mu makwe.

“Amweretse igihandure!”: Kwiruka ugasiga umuntu cyane iyi mvugo nayo ntikoreshwa cyane.

“Arabarya!”: Kurusha abantu cyane muri byinshi cyangwa byose.

“Icyana ninde ukurya?”: Iri jambo washoboraga kuryumva cyane nka Jenoside ikirangira aho ubwo babaga bashaka kubaza ngo umuntu yuzura nade cyangwa akundana nande kuburyo banaryamana.

“IFANKI/ funk”: Imbyino yamamaye muri za 1991-93 yabaga imeze nka rap/Hip hop ariko yihuta cyane.

“Umumbunda”: Umwe ni kwa kundi tubona bategaga ibitambaro mu mutwe ariko ukabona bisongoje mu mafoto y’abakera turabibona cyane muri za 70. n´umumbunda bashyira ku mbabura bayifatisha . Ibi byose iyo urebye ubona bifite iforomo imwe.

Hari n’imvugo zitagikoreshwa cyane kuko zimwe zaciwe cyangwa zimeze nk’aho zaciwe, harimo nk’"impumyi, ikimuga, ikiragi”, n’andi kubwo guha agaciro batahabwaga ababa baravukanye cyangwa babana n’ubumuga kuri ubu.

Karere, umupira wakinwe na benshi hambere
Nyonganyonga yakoreshwaga na ba kimyozi
Agatsinsino kamazwe n'amavunja, asa n'aho yacitse burundu
Kwidumbaguza cyangwa kwidumba

Menshi muri aya magambo tukaba twayiyibukije twifashishije urubuga rwa facebook http://www.facebook.com/groups/122934761067074/

TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!

IBITEKEREZO