IGIHE.com > Umuco
Kigali: Ababana bahuje ibitsina barasaba kurengerwa n’amategeko

Kigali: Ababana bahuje ibitsina barasaba kurengerwa n’amategeko


Yanditswe kuya 4-02-2013 - Saa 17:05' na Thamimu Hakizimana

N’ubwo hamwe na hamwe ku isi hari ibihugu biha uburenganzira abafite ibitsina biteye kimwe gushinga ingo bakabaho nk’abandi bashakanye, mu Rwanda si ko bimeze ariko abateye batyo bavuga ko bakwiye kurengerwa cyane cyane mu mategeko hakajyaho abarengera.

Nduwawe Eric uzwi ku izina rya Bebe

Nduwawe Eric uzwi ku izina rya Bebe n’‘umugabo’ we Niyomfura Didier, batuye mu Kagari ka Kabuguru ya mbere mu Murenge wa Rwezamenyo mu Karere ka Nyarugenge. Bombi ni abagabo bamaze umwaka babana rwihishwa nk’abashakanye n’ubwo amategeko atabibemerera. Abvuga ko byaba byiza habaye hari amategeko abarengera, bakareka kubana bihishahisha.

Bavuga ko babana mu byishimo ariko mu buryo buruhije, ku buryo bumva bava mu Rwanda.

‘Umugabo’ we aba i Kampala mu kazi, agataha muri ‘weekend’. Kuba mu Rwanda nta tegeko ryemerera abantu kubana bahuje ibitsina Bebe avuga ko bibabangamira mu rukundo n’’umugabo’ we.

Avugana na IGIHE, yavuze ko umubyeyi we atazi ko afite umugabo kandi atanateganya kubimubwira kuko nyina azi ko ari umuhungu usanzwe. Ati “Mama arankunda kandi ndamwubaha. Iyo ambonye mbona ko atanyishimiye, kandi ibyo bamumbwiraho ni byinshi ku buryo ahora atishimye. Narimutse kugira ngo batazajya bantereta yambona akababara mpitamo kujya gukodesha kure yo mu rugo.”

Nduwawe Eric uzwi nka Bebe avuga ko abangamirwa n'abamwita umuhungu

Mugenzi we witwaga Hirwa ubu akaba yitwa Bobette, we yatubwiye ko ubu yibana [yikodeshereza inzu] kuko uwari ‘umugabo’ we yamwerekaga abantu benshi bikamutera isoni. Avuga icyakora ko umubyeyi we witwa Maman Safi utuye mu Gitega amufata nk’umusazi.

Nyina wa Bobette yatangarije IGIHE uburyo umwana we yagiye ahinduka, ati “Umwana wanjye ni uko yavutse. Yakuze akunda gukora imirimo y’abakobwa nko gukubura, guteka, akunda no kwisiga ibintu ku munwa.”

Yakomeje atubwira ko nyuma yaje kubona umuhungu we yarapfumuye amatwi, kandi ngo ntiyigeze akunda gukina n’abahungu bagenzi be. Ngo yatangiye kujya akina na bo agiye mu mashuri yisumbuye, ari na bwo yahise ava mu ishuri. Uyu mubyeyi avuga ko bimubabaza cyane nk’umubyeyi kubona umwana we ateye uko.

Uyu mubyeyi avuga ko hari abamubwira ko umuhungu we abana n’uwo bahuje igitsina, ariko ngo ntabizi icyakora arashaka kuzabimubaza nibabonana kuko asigaye [umwana we] akodesha inzu yo kubamo wenyine.

Bobette avuga ko yabuze aho ahera abwira nyina ko akora imibonano mpuzabitsina n’abasore bagenzi be kubera kumutinya, ikaba ari yo mpamvu yimutse akajya kuba ukwe. Avuga ko we ubu nta nshuti afite, uwo yari afite batanye kuko yabonaga agira isoni z’uko bamenya ko ari inshuti ye. Ubu ngo ni indaya yishakira abagabo.abajijwe uburyo abona Abagabo yavuzeko bafite imbuga(web site) babashakiraho.

Umuco nyarwanda ntiwemera ko hari umuhungu wabana n’umuhungu wundi bagakora imibonano mpuzabitsina cyo kimwe no ku bakobwa. Nta n’itegeko rishyigikira iyo mibereho, ariko mu bihugu bimwe ku isi biremewe.

Kugeza ubu Minisiteri ifite ubusugire bw’umuco mu nshingano ivuga ko amatekeko arengera abantu nk’aba mu Rwanda nta yahari, kandi ko nta na gahunda yo kuyashyiraho ihari kuko byaba ari ukuvuguruza umuco nyarwanda. Makuza Lauren ushinzwe umuco muri Minisiteri y’Umuco na Siporo, ati “Kugeza ubu ibyo ntibyemewe mu muco nyarwanda.”

Makuza yadutangarije ko kuva kera umuco nyarwanda utigeze wemera ko umugabo abana n’umugabo cyangwa umugore akabana n’umugore mugenzi we, kandi ngo kugeza ubu nta gahunda ihari yo kuvuguruza indangagaciro z’umuco nyarwanda.

TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!

IBITEKEREZO