IGIHE.com > Umuco > Umurage
Kwizihiza Umuganura bishushanya ibikubiye mu nkingi enye za Guverinoma

Kwizihiza Umuganura bishushanya ibikubiye mu nkingi enye za Guverinoma


Yanditswe kuya 5-08-2012 - Saa 00:06' na IGIHE

Ku munsi w’Umuganura wizihirijwe mu rugo rw’Umwami Mutara III Rudahigwa mu Rukali, mu Karere ka Nyanza, Intara y’Amajyepfo. Ku wa 3 Kanama 2012 Minisitiri w’Intebe Dr Pierre Damien Habumuremyi yabwiye abari bawitabiriye, ko kwizihiza umunsi w’Umuganura bishushanya kwizihiza ibikubiye mu nkingi 4 Guverinoma y’u Rwanda igenderaho, arizo Imiyoborere myiza, Ubukungu, Ubutabera n’Imibereho myiza.

Minisitiri w’Intebe yagize ati“Umunsi w’Umuganura warangwaga n’umuhango w’ubusabane n’ubumwe by’Abanyarwanda, hagati y’Umwami, abatware, abiru ndetse n’abaturage, ariko muri iki gihe ubusabane burangwa n’umuhango w’ubumwe n’ubusabane hagati y’abayobozi n’abaturage, abana n’ababyeyi, inshuti n’umuryango.”

Dr. Habumuremyi yakomeje avuga ko indangagaciro zarangaga uyu munsi zari nyinshi, zikaba zaragiye zitakara kubera ubuyobozi bubi, ati “ariko muri iki gihe Abanyarwanda bagomba kuzigarura.”

Mu rwego rwo gusubiza agaciro u Rwanda n’Abanyarwanda, byaba mu gihugu imbere cyangwa ku rwego mpuzamahanga, Minisitiri w’Intebe yasabye Abanyarwanda gukomera ku muco wabo kuko ari abavandimwe, ibyo kandi bikaba byaragarariye mu ngero nyinshi nk’Inkiko Gacaca, Ubudehe, gahunda ya Girinka, umuganda rusange n’izindi gahunda zijyanye no gushyira mu bikorwa intego z’ikinyagihumbi n’iz’icyerekezo 2020.

Ku ruhande rwe, Minisitiri w’Umuco na Siporo, Protais Mitali avuga ko umuganura w’iki gihe ugomba guhuzwa n’umusaruro uriho, ndetse ujyanye n’iterambere, ntibushingire ku myaka gusa n’ubwo ahanini Abanyarwanda batunzwe n’ubuhinzi-bworozi. Ati “Utagize icyo ukora ngo usarure, ntiwagira icyo uganura.”

Ni muri urwo rero, Mitali asanga kwizihiza umuganura ari inzira yo kwishimira no kwizihiza uburumbuke bw’umusaruro, bityo hakaba ubusabane hagati y’imbaga y’Abanyarwanda.

Mu kiganiro ikinyamakuru Izuba Rirashe cyagiranye n’Umuyobozi w’Ishami ry’Indimi n’Ubuvanganzo (Faculty of Arts and Languages) mu Ishuri Nderabarezi rya Kigali (KIE), akaba na Perezida w’Intebe y’Inteko ya RALC (Rwanda Academy of Languages and Culture), Dr Cyprien Niyomugabo yasobanuye ko Umuganura ugomba kujyana n’umusaruro uboneka muri iki gihe mu rwego rw’iterambere.

Ku bavuga ko umuco wacitse muri iki gihe, Dr Niyomugabo yibukije ko umuco ushingira ku bintu 3, ari byo indangagaciro dukomora ku bakurambere bacu, ibyo abantu bahanga n’ibyo batira mu yindi mico.

Kubera izo mpamvu, Dr Niyomugabo asanga hari abazajya baganura imyaka, abandi baganure ubumenyi bagezeho, n’ibindi byose bizaba bishingiye ku musaruro bahuriyeho.

Uyu munsi w’umuganura waranzwe n’umwiyereko w’Inyambo, kumasha, inanga n’imbyino bijyanye n’umuco mu mateka y’umuganura, imurika ry’umusaruro w’imyaka inyuranye, kimwe n’amagambo y’abayobozi banyuranye.

Inararibonye zivuga ko uyu munsi watangiye kwizihizwa kuva u Rwanda rwabaho, ariko ko ubwo uheruka kwizihizwa ku mugaragaro byari mu mwaka wa 1925, kuko nyuma y’aho ingoma y’abakoloni yawuciye, ndetse na nyuma y’ubwigenge ntiwahabwa agaciro na za Repubulika zasimburanye.

Abafashe ijambo bose basabye ko uyu munsi wakwandikwa mu minsi mikuru Guverinoma yemera, bityo ugasubizwa agaciro ukajya unizihizwa buri mwaka.

Izuba Rirashe

TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!

IBITEKEREZO