Urugendo rwa Muhakwa, umusore watangije inzu idoda imyenda y’imbeho (Video)

Yanditswe na Mukahirwa Diane
Kuya 24 Ukuboza 2020 saa 07:31
Yasuwe :
0 0

Ubuhanzi bw’imideli ni umwuga ugenda utera imbere cyane mu Rwanda, bishyigikiwe na gahunda ya Made in Rwanda ishishikariza Abanyarwanda gukoresha iby’iwabo birimo n’imyenda bambara umunsi ku munsi.

Kuba hari isoko rinini ry’abashaka kwambara imyenda yakorewe mu Rwanda kandi ikorwa n’abana b’Abanyarwanda bituma abahanga imideli bagira umwete wo gukora cyane ngo barihaze.

Ibyo byatumye abakora imideli biyongera ndetse n’ubwiza bw’ibyo bakora bukomeza kuba indashyikirwa kuko usanga imyenda ikorerwa mu Rwanda nta tandukaniro riri hagati yayo n’ikorwa n’izindi nganda zikomeye zo ku Isi.

Kuba uyu mwuga ugenda utera imbere bigaragara byatumye Muhakwa Jean Octave, umusore w’imyaka 26 wavukiye mu Majyepfo y’u Rwanda mu Karere ka Ruhango afata umwanzuro wo kuwugana.

Uyu musore yinjiye mu byo gukora imideli mu 2016, ubwo yari arangije kwiga amashuri yisumbuye, ariko akabona atabona ubushobozi buhagije bwo kwibeshaho ahitamo gushakira amafaranga mu mideli.

Yabyinjiyemo ashaka amaramuko ariko aza kubona ko ari umwuga mwiza wamutunga kandi akagira n’umusanzu atanga mu kubaka igihugu ashyigikira gahunda ya Made in Rwanda ni uko aza guhitamo kubigira akazi ke ka buri munsi.

Mu kubigira umwuga yahisemo kwibanda ku budodo, imyenda yose akora iriho ikirango cya ‘Nyuzi’ bisobanuye ubudodo mu Giswahili.

Yahisemo gukora imyenda yo kwifubika akoresheje ubudodo bitewe nuko yabonaga hari icyuho mu myenda yo kwifubika ikoze mu budodo ahitamo gutanga umusanzu we.

Mu myenda akora higanjemo imipira yo kwifubika y’abagabo n’abagore idoze mu buryo butandukanye ndetse n’ibitambaro by’abagore byo kwifubika kandi n’ukeneye umwenda utandukanye n’iyi abasha kuwumudodera.

Muhakwa yasobanuye ko yahisemo gukora imyenda yo mu budodo kuko yabonaga abantu batitabira kuyikora we ahitamo kuyihuza n’umuco Nyarwanda kugira havemo ikintu cyiza.

Yagize ati “Iyo urebye ubona abantu badakangukira gukora imyenda yo mu budodo kandi iba ari myiza n’abantu barayikunda, njyewe nahisemo kuyikora nshyizemo umwihariko w’ibirango bigaragaza umuco Nyarwanda nk’agaseke.”

Nkuko yabyifuje koko hari umusanzu atanga mu gukora imyenda yo kwifubika dore ko ku munsi umwe ashobora kudoda imipira itatu yanatekereje n’indi azakoraho ubutaha.

Uyu musore wakuze afite inzozi zo kuzaba umuganga zikaza guhinduka agahitamo inzira yo kuba umunyamideli ari nabyo bimutunze muri iki gihe yemeza ko aticuza amahitamo yakoze.

Yavuze ko guhanga imideli byamufashije gukomeza amashuri ye ndetse abasha no kugira imishinga akora ku ruhande kandi igishoro cyayo agikesha ibyo yakuye mu mideli.

Yagize ati “Natangiye guhanga imideli ariko ngifite n’amasomo ngomba kwiga kandi nagombaga gutanga amafaranga y’ishuri imideli yabimfashijemo ndetse mbasha no kuba nakora indi mishinga iri ku ruhande ariko amafaranga nyakuye mu mideli.”

Nubwo hari icyo byamugejejeho ariko hari imbogamizi agihura nazo nk’umunyamideli ukiri muto cyane nko kubona ubushobozi bw’ibikoresho no kuba abantu bakwizera ubuziranenge bw’ibyo akora.

Ati “Buriya ntabwo biba ari byiza gukora ibintu byaguhenze binavunanye ariko ukabiburira umukiliya, kuko iyo abakiliya baguze nibo baguteza imbere ukagenda uzamuka.’’

Yavuze ko ku bantu bagitangira bakunda kugorwa no kubura igishoro cyo gutunganya ibyiza kurushaho.

Ati “Kandi usanga abantu batizera ko imyenda ikorerwa mu Rwanda ari myiza bikaba byatuma baba bakiliya babura ariko ni ukwibeshya imyenda ikorerwa mu Rwanda ni myiza cyane.”

Gusa zimwe muri izi mbogamizi ze zigenda zikemuka kuko ni umwe mu banyempano bitabiriye irushanwa rya Art Rwanda ndetse abasha gutsinda kuko yari afite umwihariko udasanzwe wo kudodesha ubudodo ibi byatumye ahabonera ubufasha.

Ati “Kuri ubu hari zimwe mu mbogamizi zakemutse nyuma yo gutsinda muri ArtRwanda nko kubona ibikoresho bigezweho nta kibazo kikirimo kuko Imbuto Foundation iradufasha cyane.”

Afasha n’abana b’abakobwa

Uyu muhanzi w’imideli kandi si ibyo gusa akora kuko yahisemo gutangira ubworozi bw’amatungo magufi ariko afite intego yo gufasha abana b’abakobwa bakomoka mu miryango itishoboye kubona ibyangombwa nkenerwa bataguye mu bishuko.

Nyuma yo kubona ko abana b’abakobwa cyane batishoboye bahura n’abagabo babashukisha utuntu duto iwabo batabasha kubabonera yahisemo gukora umushinga w’ubworozi bubafasha.

Ni umushinga ukorera mu Majyepfo y’u Rwanda mu Karere ka Ruhango aho kuri ubu amaze gufasha abana b’abakobwa 80 aho abahugura mu bijyanye no kudoda no kubumba amavaze ndetse akabaragiza n’itungo rigufi rizabafasha kwikura mu bukene.

Yasobanuye ko yagize iki gitekerezo mu rwego rwo kwinjiza urubyiruko rwinshi mu mideli rwazamufasha kugera ku ntego ze ndetse akaba yafasha n’abana b’abakobwa batishoboye.

Ati “Mu ntego mfite harimo gukora imideli mu buryo bwagutse, nifuje rero guhugura aba bana kugira ngo bazamfashe kuzigeraho nabo kandi bagire icyo bamenya u Rwanda rwunguke abanyamideli benshi.”

Kuba uyu munyamideli yisanga mu mirimo itandukanye si ibyizanye ahubwo ni uko yakurikije inama umubyeyi we yamugiriye zo kubyaza umusaruro amahirwe yose amwegereye.

Ibi byatumye agera ku ntego ze zitandukanye ariko kuri we abona ko urugendo aribwo rutangiye ko afite byinshi byo gukora biri imbere kugira arushesho gutera imbere no guteza imbere igihugu cye.

Muhakwa Octave yavuze ko afite inzozi zo gutera imbere mu bikorwa bye byose akabasha kugira ikigo gikomeye cyigisha gukora imyenda kizafasha kuzamura imibereho y’abantu batandukanye.

Muhwaka Jean Octave yavuze ko aka kazi kamaze kumugeza kuri byinshi
Octave afite inzozi zo kugira ishuri rikomeye ryigisha imideli
Octave avuga ko ntacyamukura mu mideli ko n'indi mirimo yakora yayikora nyuma yo guhanga imideli
Muhakwa Octave afite ubushobozi bwo gukora umupira umwe mu masaha atatu
Muri Nyuzi hakorerwa imipira yo kwifubika y'abagore
Muri Nyuzi hakorerwa imipira yo kwifubika y'abagabo
Octave akora imipira itandukanye irimo niyo yasabwe n'abakiliya be
Umuhanzi w'imideri Muhakwa Octave yahisemo gukora imyenda yo mu budodo kuko yabonaga abantu batitabira kuyikora

Amafoto: Niyonzima Moses & Igirubuntu Darcy


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .