Kalinganire Charles wari umunyamakuru yangiwe kujya kwiga muri Amerika kubera ubwoko bwe

Yanditswe na

Olivier Muhirwa

Kuya 11 Mata 2012 saa 09:58
Yasuwe :
0 0

Kalinganire Charles yavutse mu 1963, avukira mu Murenge wa Gitovu ahahoze ari Komini Ntongwe, Perefegitura Gitarama. Amashuri abanza yayize i Gitovu, ayisumbuye ayiga mu mu ishuri ryisumbuye (Collège) i Gitwe aho yakurikiranye ishami ry’imibare n’ubugenge (Maths- Physics).
Arangije yigishije mu ishuri ribanza rya Rwamwata muri Nyanza, yagiye gukora muri LABOPHAR (Laboratoire Pharmaceutique du Rwanda) i Butare.
Nk’uko bigaragara mu nyandiko yashyizwe ahagaragara n’Inama Nkuru y’Itangazamakuru (...)

Kalinganire Charles yavutse mu 1963, avukira mu Murenge wa Gitovu ahahoze ari Komini Ntongwe, Perefegitura Gitarama. Amashuri abanza yayize i Gitovu, ayisumbuye ayiga mu mu ishuri ryisumbuye (Collège) i Gitwe aho yakurikiranye ishami ry’imibare n’ubugenge (Maths- Physics).

Arangije yigishije mu ishuri ribanza rya Rwamwata muri Nyanza, yagiye gukora muri LABOPHAR (Laboratoire Pharmaceutique du Rwanda) i Butare.

Nk’uko bigaragara mu nyandiko yashyizwe ahagaragara n’Inama Nkuru y’Itangazamakuru mu Rwanda, nyuma Kalinganire yabonye bourse yo kujya kwiga muri Leta Zunze ubumwe z’Amerika muri Leta ya Mishigan. Mu gihe yari arangije kwiyandikisha no gusezera ku kazi, uwari Minisitiri w’Uburezi Colonel Nsekarije Aloys, yamuvanye ku rutonde rw’abagombaga kujya kwiga avuga ko nta mututsi ukwiye kujya kwiga hanze.

Ubwo nibwo yahise atangira kwandika mu Kinyamakuru Kanguka ari nako yiga muri Kaminuza i Mburabuturo, aho yakurikiranye ibijyanye n’amategeko. Muri Kanguka yakoranaga na Rwabukwisi Vincent, Bazimaziki na Rangira Adrien.

Nyuma baje gushaka uko batandukana bitewe n’uko bamwe mu bayobozi bakuru b’igihugu bari batangiye kwibasira ikinyamakuru Kanguka, maze Rwabukwisi na Bazimaziki baguma muri Kanguka, Kalinganire, Adrien na Assumpta Seminega wakoraga kuri Radio Mubura yitwa Umunyana Jeanine, bajya gushinga ikinyamakuru bacyita « Le Flambeau ».

Kanguka yarwanyijwe cyane na Ferdinand Nahimana , Gahigi Gaspard bakoresheje Hassani Ngeze wacuruzaga ibinyamakuru bya Kanguka ku Gisenyi akanohereza inkuru zo muri ako karere. Bahise bashinga ikindi kinyamakuru kijya gusa neza na Kanguka maze bacyita « Kangura », Ngeze aba umuyobozi wacyo.

Ikinyamakuru Kanguka
Ikinyamakuru Kangura

Muri icyo kinyamakuru niho ubuyobozi bwa MRND na CDR bwacishaga inkuru n’amatangazo byayo cyasaga na Kanguka kugirango batere urujijo. Abayobozi ba Kanguka barafunzwe ndetse birukanwa mu nzu bakoreramo. Kalinganire yakomeje kwandika muri Le Flambeau, ntiyatinyaga no kujya ku Murindi kuzana amakuru y’inkotanyi.

Kalinganire yashakanye na Bacuminkindi Pélagie mu 1991, babyarana abana 2. Umukuru yavutse muri Kamena 1993, se apfa afite amezi 9, yitwa Kayitankore Holly Happiness. Undi yitwa Kalinganire JMV, yavutse 1994 mu kwezi kwa cyenda se yapfuye bamutwite afite amezi 5.

Mu nkuru Kalinganire yanditse, harimo “Utanyise inkotanyi” yatumye afungwa bucyeye bwaho inkuru isohotse. Yafungiwe muri Gereza y’i Nyanza amaramo amezi 8 arinda afungurwa ataburanye. Mu myandikire yabo basohoraga inkuru zamaganaga akarengane basaba ingoma ya Habyarimana ko yakunamara icumu.

Jenoside itangiye, Kalinganire yavuye aho yari azwi cyane, aho yari atuye muri Segiteri Rugenge ajya ahari Hotel Impala agirango arebe ko yarokoka ajya mu nshuti ze, ariko kubw’amahirwe make yaje kwicwa ku Cyumweru tariki ya 24 Mata 1994, Saa moya za mu gitondo. Umurambo we ntiwabonetse kuko imodoka za MINITRAPE zatwaye iyo imirambo, ntihagira ushobora kumenya aho bayishyize.


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza