Imibereho yo mu Rwanda mu gihe cya Covid-19; gushyingura, gusura abarwayi...byahinduye isura

Yanditswe na Cyprien Niyomwungeri
Kuya 17 Mata 2020 saa 07:12
Yasuwe :
0 0

Tariki 29 Werurwe 2020, umwarimu wigishaga kuri Lycée Saint Alexandre Sauli de Muhura, yitabye Imana azize uburwayi. Imana ikomeze kumuha iruhuko ridashira.

Uyu muvandimwe yapfuye hashize icyumweru, hasohotse itangazo rya Minisitiri w’Intebe rivuga ko abantu bose bagomba kuguma mu rugo, ingendo n’utubari bigafungwa mu gukumira ikwirakwira rya Coronavirus, kuri uyu wa 17 Mata imaze kwandura abagera ku 2208373, ikica 148730 naho 558715 bakayikira.

Ni ingamba ziyongereye ku zindi zo gusubika amahuriro y’abantu benshi nk’imikino, ubukwe ndetse abitabira imihango yo gushyingura nabo basabwa kujyayo ari bake kandi hakubahirizwa nibura intera ya metero imwe hagati y’abantu.

Mu kubahiriza aya mabwiriza, abayobozi, abarimu n’abanyeshuri ba Lycée de Muhura, ntibabashije kujya guherekeza mugenzi wabo waguye mu rugo rwe i Nyamata mu Karere ka Bugesera, kuko ingendo hagati y’imijyi n’uturere tw’igihugu zitemewe.

Umwe mu nshuti z’uyu mwarimu, avuga ko “Abo bakoranaga ntabwo babashije kujya kumuherekeza kubera ingamba ziriho. Mu bantu barenga 30 bakoranaga nta n’umwe wamushyinguye. Barabiretse bafata icyemezo cy’uko bazasura abasigaye”.

Ubusanzwe bimenyerewe ko mu Banyarwanda iyo hari uwagize ibyago cyangwa ibirori bamushyigikira, bakifatanya na we ku buryo n’uri i Nyagatare adakangwa n’urugendo rujya i Rusizi, gutabara cyangwa gushyigikira umuvandimwe n’inshuti.

Nanone ariko umunyarwanda yaravuze ngo ‘amagara araseseka ntayorwa’. Abanyarwanda bazi agaciro k’ubuzima ari yo mpamvu muri iki gihe cy’icyago Coronavirus, bemera bakazasura abasigaye, Nyakwigendera agaherekezwa na bake.

Mu gihe cyo gushyingura nabwo amabwiriza yo kwirinda amahuriro y’abantu benshi yitabwaho cyane kandi yaba abagize ibyago, ubuyobozi n’inzego z’umutekano zikabibafashamo.

Urugero nko kujya gushyingura mu irimbi rya Rusororo, abantu ntabwo bagomba kurenga 10. Imihango itandukanye yaberaga mu nsengero ntikibaho ndetse no gusezera ku wigendeye mu rugo ntibirenza abantu nka 20, kandi gukaraba intoki no gusiga metero hagati y’abantu bikubahirizwa.

Mbere ya byose ariko, ubuyobozi bwihanganisha abagize ibyago, bukabasobanurira ko ibihe igihugu byo kwirinda icyorezo cya Coronavirus bidasanzwe, bukamenyesha umuryango wagize ibyago ko ‘utemerewe kurenza abantu 10 bajya gushyingura, mu kwirinda ko abantu benshi bahura hakagira uhandurira’.

Umuryango kandi ubwirwa ko no mu rugo abantu batagomba kuba benshi, ku buryo usanga atari nka kwa kundi buri wese wasangaga yicaye mu rugo rwagize ibyago yatabaye.

Muri iki gihe rero niho ikoranabuhanga ryerekanira ingufu zaryo kuko uri i Burayi, Amerika, Rwamashyongoshyo, i Nzega n’ahandi yifatanya n’abandi mu bikorwa bitandukanye byo gushyingura. Mu babashije guherekeza uwapfuye, hari abafata amaforo, amashusho (videos) bakoherereza abandi mu matsinda bahuriyemo cyangwa mu gikari (inbox).

Urugero rwa hafi ni igihe Karuranga Virgile wamenyekanye nka Dj Miller yashyingurwaga mu irimbi rya Rusororo riherereye mu Karere ka Gasabo. Buri wese yabashije gukurikira uyu muhango umunota ku wundi kuri sheni ya Youtube.

Kuri Whatsapp, Facebook, Twitter n’izindi mbuga nkoranyambaga, amafoto ya Dj Miller, n’umuhango wo kumuherekeza yaracicikanye cyane ku buryo uwavuga ko benshi bifatanyije n’umuryango we ataba akabije.

Kuba abantu bariyemeje kunywana n’amabwiriza yo kwirinda ikwirakwira rya Coronavirus, nta wakwirengagiza uruhare inzego z’umutekano n’ubuyobozi zibigiramo. Nk’iyo ugeze i Rusororo ubona uburyo inzego z’umutekano zifasha abantu mu kubahiriza amabwiriza. Mu muhanda hirya no hino naho ni uko.

Abadashaka kubahiriza amabwiriza nabo inzego z’umutekano ntiziborohera. Urugero ni abafashwe basenga bari hamwe ari benshi. Muri Karongi mu Murenge wa Rubengera ahari abantu 65 bitwa aba Tempérants batawe muri yombi barimo gusenga n’abandi bigometse ku mabwiriza babwiwe ko bidakwiye.

Gusura abarwayi byahawe umurongo

Mu muco nyarwanda iyo umuturanyi arwaye ntumusure wumva umufitiye umwenda, yabyara ntumushyire igikoma ukibaza aho uzaca ujya guterura umwana ukahabura.

Muri iki gihe cyo kwirinda ikwirakwira rya Coronavirus, imvugo y’uko ifuni ibagara ubucuti ari akarenge, yabaye yirengagijweho gato kuko ako karenge gashobora gukurura kabutindi kuri nyirako, abo yasuye n’abo babana bose.

Mu bitaro gusura abarwayi byabaye bihagaritswe. Nko mu bitaro bya Kaminuza bya Kigali (CHUK), abantu bagemuriraga ibiryo abarwariye muri ibi bitaro, babigeza aho abantu binjirira, umuntu umwe urwaje wa murwayi akaba ari we ujya kubyakira.

Uyu mwanzuro ugamije ko abantu bajyaga gusura abarwayi mu bitaro bagabanya urwo rujya n’uruza, mu rwego rwo gukumira ko icyorezo cya Coronavirus cyakomeza gukwirakwiza.

Kugeza ubu umurwayi agomba kuba afite umurwaza umwe gusa, niyo yagira umusimbura ariko na we agomba kuba ari umwe kandi urujya n’uruza mu bitaro rwaragabanutse. Ibi byose bigamije kugabanya ubucucike mu bitaro.

Buri munsi usanga muri CHUK hari abarwayi bari hagati ya 400-500 baba baharwariye. Kubera kandi serivisi nyinshi zitangirwamo, bituma mu gihe gisanzwe buri munsi hari abantu bari hagati ya 1000-1500 basura ibi bitaro.

Ufite uwe urwaye kandi ashobora no kwifashisha uburyo bw’ikoranabuhanga akamwoherereza amafaranga kuri telefoni akamufasha kubona ibyo yari kumushyira, na we agakomeza kuguma mu rugo, bityo twese tukazaririmba intsinzi twishimira ko twatsinze Coronavirus.

Mu gushyingura DJ Miller, abantu 10 nibo bemerewe kujya ku irimbi abandi bari bamuherekeje basabwa gusubira inyuma

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Special pages
. . . . . .