Ubuzima bushaririye bwa miliyoni zigera kuri 40 z’abanyamerika ziri mu bukene

Yanditswe na Iradukunda Serge
Kuya 27 Mutarama 2020 saa 09:43
Yasuwe :
0 0

Abenshi dufata u Burayi na Amerika nk’imigabane irimo ibisubizo gusa, itarangwamo inzara n’ubukene ku buryo duhora turota kugerayo ariko si ko biri. Uko waburara ni nako n’umunyamerika yaburara, akarara mu kiraro cyangwa mu muhanda yabuze inzu, uko wabura mutuelle de santé ni ko nawe yabura amafaranga yo kujya kwa muganga ngo yikuze iryinyo agategereza umugiraneza. Uko niko kuri.

Nka Leta Zunze Ubumwe za Amerika benshi barota kugeramo ifite abakene benshi, gusa uko ubukene bwabo bubarwa bitandukanye n’uko wabara ubw’iyo Ibuzinganjwiri cyangwa se mu kindi cyaro cyo mu Rwanda.

Ashobora kuba ari umukene atagira aho aba ariko afite imodoka akaba ariyo yifashisha nk’inzu ye nk’uko bimeze muri Leta ya California hafi ya San Diego Bay ahari parking iba irimo imodoka amagana buri munsi abantu baryamyemo kuko ntaho kujya bafite.

Ni nako bimeze muri leta zitandukanye nka Virginia ahari agace karimo abantu badashobora kubona uko bivuza, bisaba ko abagiraneza babagoboka bakabaha ubuvuzi ku buntu gusa icyo gihe nabwo usanga abantu baraye mu mahema aho icyo gikorwa kiri bubere.

Reka duhere aho. Leta Zunze Ubumwe za Amerika zifite abantu bageze kuri miliyoni 40 bari munsi y’umurongo w’ubukene. Ni ukuvuga ngo ni nk’abantu batuye u Rwanda inshuro eshatu gusa ariko ku rundi ruhande, ituwe na miliyoni zirenga 327 nk’uko imibare yo mu 2018 ibigaragaza.

Imibare y’Ikigo cya Leta Zunze Ubumwe za Amerika cy’Ibarurishamibare, United States Census Bureau, igaragaza ko muri iki gihugu ikigero cy’ubukene kiri kuri 11.8% aho muri leta zitandukanye z’iki gihugu habarwa Abanyamerika miliyoni 38.1 bari munsi y’umurongo w’ubukene barimo abagera ku 567,715 batagira aho kuba.

Kimwe n’ibindi bihugu byinshi bikennye, imibare yo mu 2018 yerekana ko Abanyamerika bagera kuri miliyoni 14.3 (11.1%) bafite ikibazo cyo kutabona ibyo kurya bihagije.

Ubukene ni ikibazo gisangiwe n’ubwoko bwose butuye muri Leta Zunze Ubumwe za Amerika, gusa abakene benshi ni Abanyamerika kavukire bangana na 25.4%, mu gihe abirabura bakennye bo ari 20.8%, naho 10.1% ni Abanya-Aziya.

Ikindi imibare y’iki kigo igaragaza ni uko ubukene bwiganje mu bakuze aho 11.3 % by’abanyamerika bafite imyaka 75 gusubiza hejuru kubera ko bagera mu myaka y’izabukuru batariteganyirije cyangwa se ngo babe barateganyirijwe n’abakoresha babo amafaranga y’izabukuru.

Abagabo miliyoni 158.7 nibo baba muri Leta Zunze Ubumwe za Amerika, muri bo abagera kuri miliyoni 16.8 bari munsi y’umurongo w’ubukene, mu gihe mu bagore miliyoni 165.1 baba muri iki gihugu, abagera kuri miliyoni 21.4 nabo bari munsi y’umurongo w’ubukene.

Aba bose muri Leta Zunze Ubumwe za Amerika babarwa nk’abakene kuko nibura buri umwe yinjiza amadorali ari hasi y’ibihumbi 12760 ku mwaka.

N’ubwo aya mafaranga ashobora kumvikana nk’aho ari menshi ku baturage b’ibihugu bikoresha amafaranga afite agaciro kari munsi y’idorali, muri iki gihugu ni nk’aho ntacyo amaze kuko atagukodeshereza inzu cyangwa ngo uyahahishe mu gihe cy’umwaka.

Raporo y’ikigo gishora imari mu kubaka no gukodesha inzu muri Amerika, UNISON, igaragaza ko tumwe mu duce tubamo inzu zihendutse ari Arizona na Phoenix, aho iy’icyumba kimwe wayikodesha amadorali 1,171 ku kwezi.

Iyi raporo ivuga ko umuryango muto, ubayeho mu buryo buciriritse udasesagura nibura ushobora gukoresha amadorali ari hagati y’ibihumbi 40 na 60 ku mwaka.

Iki giciro cyo kubaho kiri hejuru ni cyo gituma abarenga miliyoni eshanu batuye leta Zunze Ubumwe za Amerika mu gice cy’Amajyaruguru ashyira Uburasirazuba kibarizwamo leta nka Pennsylvania na New Hampshire bisanga munsi y’umurongo w’ubukene.

Naho mu gice cy’Uburengerazuba bwo hagati, kibarizwamo leta nka Kansas na Missouri ho mu baturage miliyoni 67.5 bahatuye, abasaga miliyoni zirindwi nabo bari munsi y’umurongo w’ubukene.

Uyu mubare munini w’abantu ubayeho mu buzima bugoye burimo kutabasha kwiyishyurira inzu zo kubamo, ibyo kurya ndetse na serivisi z’ubuvuzi zoroheje nko kwikuza iryinyo.

Umwe mu babaye muri ubu buzima bushaririye ni Mariya w’imyaka 54. Aba mu gace ka San Diego muri Leta ya California, amaze umwaka aba mu modoka kubera kunanirwa kwishyura inzu.

Mariya ubwo yasurwaga na Deutsche Welle yavuze ko mbere yo kwisanga muri ubu buzima bubi yari abayeho neza nk’abandi bose ariko nyuma yo gutandukana n’umugabo we byose birahinduka.

Ati “Yarantaye, naramubwiye nti nta kibazo ntibyagenze neza urabeho, ubu nta nzu, ndi umuntu utagira aho ataha, nta buriri, nta bikoresho byo mu nzu, ni njye n’imodoka yanjye gusa.”

Mariya iyo avuye ku kazi ke ko gukora isuku, aparika imodoka ye mu gace ahuriyemo n’abandi bantu bagera kuri 30 basangiye ubu buzima.

Muri aka gace Mariya abamo hagaragara n’abandi bantu babayeho ubuzima bushaririye n’ubwo bari mu gihugu abenshi bahora babona nk’indoto zabo.

Ikibazo cyo kutabasha kwishyura inzu gihangayikisha benshi muri Amerika kuko mu Mujyi wa Richmond uherereye muri Leta ya Virginia honyine habarurwa, abapangayi barenga 3000 buri mwaka basohorwa mu nzu kubera kubura ubushobozi bwo kuzishyura.

Eric wigeze kugira akazi keza kamuhemba amadorali ibihumbi birindwi ku kwezi ariko kubera uburwayi akaza kwirukanwa ataraniteganyirije, avuga ko imyumvire abantu bagira ko abadafite aho kuba ari abadashobotse atari yo.

Ati “Ikintu kimwe naje kumenya kuri ibi ni uko kumva ko abatagira aho baba ari abanebwe, badashaka gukora cyangwa baba barabaswe n’ibiyobyabwenge, wenda birashoboka ku bantu bamwe mu duce tumwe na tumwe gusa abantu baje muri iyi gahunda barakora cyane, ni abantu bashaka gutera imbere ariko bafite ibibazo by’uburwayi, amahirwe macye cyangwa indi mpamvu iyo ariyo yose, bamwe bashobora kuva muri ubu buzima byihuse abandi bigafata igihe.”

Zimwe muri Leta zigaragaramo abakene cyane ni Mississippi, New Mexico na Louisiana.

Reba imibereho ya bamwe mu bakene bo muri Leta Zunze Ubumwe za Amerika

Ibibazo byo kubura amafaranga yo gukodesha inzu bituma abakene barara ku muhanda. Muri Amerika iyo umaze iminsi itanu utarishyura ubukode bw'ukwezi uhita usohorwa mu nzu
Mu Mujyi wa San Francisco hari aho ugera ugasanga abatagira aho baba baryamye ku muhanda
Abenshi babura aho kuba bakihinira mu mahema mu gihe ijoro riguye
Mu Mujyi wa New York hari ikibazo cy'ubwiyongere bw'abatagira aho baba n'abasabiriza

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Special pages
. . . . . .