00:00:00 IGIHE NETWORK KN KINYARWANDA EN ENGLISH FR FRANCAIS

Byiringiro Lague yasabye anakwa umukunzi we

Yanditswe na Umwali Zhuri
Kuya 7 Ukuboza 2021 saa 02:03
Yasuwe :

Rutahizamu w’Ikipe y’Igihugu ’Amavubi’ na APR FC, Byiringiro Lague, yasabye anakwa umukunzi we, Uwase Kelia kuri uyu wa Kabiri, tariki ya 7 Ukuboza 2021.

Byiringiro Lague na Uwase Kelia bagombaga gukora ubukwe ku wa Gatandatu tariki 4 Ukuboza 2021, ariko bwimurirwa kuri uyu wa 7 Ukuboza kubera umukino APR FC yahuyemo na RS Berkane tariki ya 5 Ukuboza.

Uyu mukinnyi w’imyaka 21, yinjije igitego kimwe kitari gihagije ngo APR FC igere mu matsinda ya CAF Confederation Cup kuko yatsinzwe ibitego 2-1 mu mikino yombi.

Nyuma yo kugera i Kigali ku wa Mbere, kuri uyu wa 7 Ukuboza ni bwo habaye umuhango wo gusaba no gukwa muri Luxury Palace guhera saa Tatu mu gihe saa Munani ari bwo basezerana imbere y’Imana mu rusengero rwa Philadelphia Rhema Church ruri ku Kimironko hafi y’Umurenge.

Nyuma y’iyo mihango yombi, abatumiwe barakirirwa muri Luxury Palace iri ahazwi nka Norvège.

Byiringiro Lague yambariwe na bamwe mu bo bakinana muri APR FC ndetse n’abayinyuzemo nka Butera Andrew.

Mu mpera za Nzeri uyu mwaka ni bwo Byiringiro na Uwase Kelia basezeranye imbere y’amategeko mu Murenge wa Nyarugenge mu Karere ka Nyarugenge.

Byiringiro yazamuwe mu Ikipe Nkuru ya APR FC muri Mutarama 2018 avuye muri Intare FC yagezemo avuye muri Vision FC.

Yatsinze ibitego bitandatu muri Shampiyona ya 2019/20 n’ibitego bitandatu muri 2020/21.

Kuri ubu, akunze gukina yambaye ‘casque’ imurinda umutwe kuko igufa ryo mu gahanga ryangiritse ubwo yakubitwaga inkokora n’umukinnyi wa Kenya ubwo yakinaga n’Amavubi muri Nzeri, byatumye amara amezi abiri adakina.

Byirigiro Lague yasabye anakwa Uwase Kelia
Ubukwe bwa Byiringiro na Uwase bwari kuba ku wa Gatandatu ariko burasubikwa kubera umukino APR FC yakiriwemo na RS Berkane
Nyuma yo gusaba no gukwa, Byiringiro na Uwase Kelia basezerana imbere y'Imana

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .