Nkomezi Alex uheruka gusinyira Mukura VS yasezeranye n’umukobwa uba muri Amerika

Yanditswe na Eric Tony Ukurikiyimfura
Kuya 7 Ugushyingo 2020 saa 09:59
Yasuwe :
0 0

Uwahoze ari umukinnyi wa APR FC, Nkomezi Alex, uheruka gusubira muri Mukura Victory Sports, yasezeranye n’umukunzi we, Murinda Claudine, bamaze imyaka ibiri bakundana.

Ubukwe bwabo butigeze buvugwa cyane, bwabaye ku wa Kane, aho basezeranye mu mategeko mu Murenge wa Kigabiro mu Karere ka Rwamagana.

Nkomezi Alex ukina mu kibuga hagati, rimwe akifashishwa mu mutima w’ubwugarizi, amaze imyaka ibiri akundana na Murinda Claudine, we wari umaze imyaka 13 aba muri Leta Zunze Ubumwe za Amerika.

Mu mpera z’ukwezi gushize nibwo uyu mukinnyi yongeye kugurwa na Mukura Victory Sports, ku masezerano y’imyaka ibiri, ni nyuma y’uko yari amaze amezi atatu atandukanye na APR FC yamazemo umwaka umwe, ariko ntabone igihe gihagije cyo gukina.

Nkomezi yasubiye muri Mukura Victory Sports yavuyemo mu 2019, ari mu bakinnyi ngenderwaho, by’umwihariko akaba yari umwe mu bakapiteni bayo.

Nkomezi Alex wakiniye amakipe arimo Sunrise FC na AS Kigali, yageze muri Mukura Victory Sports bwa mbere mu 2017, ayikinira imyaka ibiri imbere yo kwerekeza muri APR FC.

Ni umwe mu batwaranye n’iyi kipe y’i Huye igikombe cy’Amahoro cya 2018, bakayihesha kwitabira irushanwa rya CAF Confederation Cup ya 2018/19, aho yasezerewe mu cyiciro cya nyuma kigana mu matsinda y’iryo rushanwa Nyafurika.

Nkomezi Alex yasezeranye n'umukunzi we, Murinda Claudine, ku wa Kane mu bukwe bwabereye i Rwamagana
Mu mpera z'ukwezi gushize, Nkomezi Alex yongeye gusinyira Mukura Victory Sports
Nkomezi Alex yakiniye APR FC umwaka umwe

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .