Ubutumwa bw’abagabo ku byo abagore bakwiye kwitwararika byatuma ingo ziramba

Yanditswe na Uwiduhaye Theos
Kuya 12 Ugushyingo 2020 saa 10:00
Yasuwe :
0 0

Umunyarwanda yarateruye ati ‘ukurusha umugore mwiza aba akurusha urugo’. Biba akarusho iyo we n’umugabo we bajya inama kuko ngo abo Imana ibasanga.

Hari n’abajya batera urwenya bagaragaza ko urugo rwiza ruba rumeze nk’ijuru rito, bashaka kumvikanisha ko iyo umugabo n’umugore bumvikana urugo rwabo rwuzuramo umunezero.

Ibi ntabwo abaruriwe n’urushako babyumva kuko ari kimwe mu bintu ahura nacyo akajya aterwa n’inzozi mbi z’uwo bashakanye wamubereye umutwaro.

Mu kiganiro cyateguwe n’Umuvugabutumwa akaba n’umwanditsi w’ibitabo Jackie M Nirere, abagabo bagaragaje ibyo bifuza ku bagore babo byatuma urugo rugira urufatiro ruzima.

Iki kiganiro cyanyujijwe ku ‘Irere TV’ cyibanda ku kurebera hamwe igikwiriye gukorwa mu kubaka no gukomeza umuryango ndetse n’ivugabutumwa.

Abagitumiwemo bagaragaje ko bakeneye ko abagore babubaha ariko bitavuze kwiremereza kandi bakaganirira hamwe ibyafasha ingo gutera imbere.

Uwimana Emmanuel yavuze ko abagabo bakenera abagore kugira ngo babuzuze mu iterambere ryabo.

Yatanze urugero rw’umusore ushobora kuba amaze imyaka 10 mu kazi ahembwa neza, ariko akazajya gushaka nta n’ikibanza aragura, agitega moto, ndetse ngo nta na televiziyo agira mu nzu.

Yagize ati “Ariko reba umwaka umwe nyuma yo gushaka, ubuzima buhita buhinduka. Nubwo twakwigira bande, abagore turabakeneye.”

Yongeye gutanga urugero rw’igihe umugore yavuye mu rugo umunsi umwe hari nk’akazi yagiyemo, ugasanga ibintu byacitse, umugabo ahamagara umugore buri kanya amubaza ibintu byose.

Ati “Mudufatiye runini rwose, mufite impano nyinshi, mufite ibintu byinshi bibarimo.”

Pasiteri Uwimana na bagenzi be bavuga ko ari ngombwa ko umugore yubaha umugabo nk’umutwe w’urugo, ariko hakaba aho biba imbogamizi iyo umugore ari we usa n’utunze urugo kuko arusha umugabo kwinjiza byinshi.

James Nirere washakanye na Nirere M. Jackie wayoboye ikiganiro, we yagize ati “Uwo mudamu nubwo yahembwa ibya mirenge, iyo yageze muri urwo rugo, aba ari ay’uwo muryango. Ibyo umugore azanye ni iby’urugo, icyubahiro cyose yaba afite, mu rugo akwiye kugandukira umugabo.”

Arongera ati “Twagiriwe ubuntu bwo kuba umutwe, ariko itari iyo gukandamiza. Amafaranga uko yaba angana kose umugore ayo akorera ni ay’urugo. Iyo ageze mu rugo bafatanya kuyapangira, bagamije kwiteza imbere, nta kwiremereza.”

Ku kibazo cy’uko hari abagabo bataganiriza abagore babo cyangwa ngo bababwire amagambo y’urukundo, Nirere avuga ko ibyo bitagakwiye kuba intandaro yo gusenya urugo, kuko hari abafite muri kamere yabo kutavugisha amagambo, ahubwo bagakora ibikorwa.

Nirere Mukabaramba Jackie wari uyoboye ikiganiro na we yasabye abagore kugerageza kugandukira abagabo, bagaha ibyishimo imiryango yabo kandi batibagiwe gusenga Imana.

Uyu muvugabutumwa yanditse igitabo cyakunzwe yise ‘Izahabu ihishe mu muryango’. Asanzwe ari Umuyobozi w’Umuryango wa Gikirisitu utanga Ubujyanama n’ubundi bufasha mu ngo zibanye mu makimbirane n’abana bagizweho ingaruka n’ubwo buzima wa a The River Ministries.

Nirere w’abana bane afite intego yo gukora ibiganiro bigamije kubaka no gukomeza umuryango n’ivugabutumwa. Mu biganiro bye atumira abantu batandukanye bagasangiza abandi ubutumwa n’ubuhamya bwubaka buganisha ku iterambere ry’umwuka, ubugingo n’umubiri.

Jackie M Nirere ni Umuvugabutumwa akaba n’umwanditsi w’ibitabo, yanditse ibirimo ico yise ‘Izahabu ihishe mu muryango’
Abagabo barimo n'abavugabutumwa batanze ubutumwa ku byo abagore bakwiye kwitwararika byatuma ingo ziramba
James Nirere n'umugore we Jackie M Nirere bafatanya umurimo wo gutanga ubujyanama bwo kubaka ingo
Uhereye ibumoso: Pasiteri Rubangura Patrick wo muri Healing Center; Uwimana Emmanuel; James Nirere n'umuvugabutumwa Jackie M Nirere nyuma yo kuganira

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .