Algeria yakuwe ku rutonde, u Rwanda ruguma mu bihugu abaturage babyo bashobora kujya i Burayi

Yanditswe na Rabbi Malo Umucunguzi
Kuya 31 Nyakanga 2020 saa 01:27
Yasuwe :
0 0

Umuryango w’ubumwe bw’u Burayi wakoze amavugurura mu bihugu bifatwa nk’ibitekanye bijyanye n’icyorezo cya COVID-19, ku buryo abaturage babyo bakwiye kwemererwa kwinjira mu bihugu biwugize, Algeria ivanwa ku rutonde.

Ni urutonde ruvugururwa buri byumweru bibiri, rufatwa nk’inama ibihugu bigize EU bishobora kugenderaho mu gihe bifata icyemezo cyo gukomorera ingendo ibihugu byo hanze y’umuryango, hagendewe ku bukana bwa COVID-19.

Nyuma y’inama yabaye kuri uyu wa Kane hagasuzumwa uburyo icyorezo cya COVID-19 gihagaze mu bihugu bitandukanye, urutonde rwagabanyijwe havanwaho Algeria, bituma ibihugu bitatu gusa bya Afurika aribyo bishobora kwemererwa gukorera ingendo muri EU guhera kuri uyu wa 31 Nyakanga. Ni u Rwanda, Maroc na Tunisia.

Ibyo bihugu byose hamwe ni Australia, Canada, Georgia, u Buyapani, Maroc, New Zealand, u Rwanda, Koreya y’Epfo, Thailand, Tunisia, Uruguay n’u Bushinwa, ariko bwo busabwa kubanza gufungurira amarembo ibihugu bya EU.

Ni inkuru nziza ku bwikorezi bw’indege mu Rwanda, kuko kuri uyu wa 1 Kanama ingendo z’indege zitwara abagenzi zisubukura, nyuma y’igihe zifunzwe kuva muri Werurwe. Imipaka yo ku butaka yo izakomeza gufungwa, mu gukumira ikwirakwira rya Coronavirus.

Algeria ivanywe ku rutonde nyuma y’uko kuva mu minsi ishize, abanduye Coronavirus barimo kwiyongera cyane, ubu bamaze kurenga 29,000 nk’uko bitangazwa n’Ishami ry’Umuryango w’Abibumbye ryita ku Buzima, OMS.

EU yatangaje ko mu gushyira ibyo bihugu ku rutonde hagenderwa ku “buryo icyorezo gihagaze n’ingamba zashyizweho mu kugikumira, kuba abantu bahana intera n’zindi ngamba zafashwe mu bjyanye n’ubukungu n’imibanire.”

Ku bihugu bigikumiriwe mu ngendo zigana muri EU, hashyirwa umwihariko gusa ku baturage baturuka mu bihugu biyigize n’imiryango yabo, abantu bamaze igihe batuye muri EU n’imiryango yabo, cyangwa abagenzi bafite impamvu zikomeye.

EU ivuga ko iyo bihugu bishyizwe kuri uru rutonde biba atari itegeko ko igihugu kiyigize gihita kibifungurira imipaka, gisigarana ijambo rya nyuma ariko
kikarugenderaho mu gufata icyemezo.

Gusa ngo "igihugu kinyamuryango ntabwo gikwiye gufata icyemezo cyo gukomorera igihugu kiri hanze y’umuryango kitari kuri urwo rutonde, mbere y’uko bifatwaho icyemezo mu buryo buhuriweho.”

Urutonde rw’ibihugu bifite ibyago bike mu gukwirakwiza COVID-19 ubu rusigayeho ibihugu 12 muri 15 byatangiriyeho ubwo rwatangazwaga bwa mbere ku wa 30 Kamena 2020. Ibihugu bitatu bimaze kuvaho ni Serbia, Montenegro na Algeria.

Ubwo uru rutonde rwatangazwaga bwa mbere, gahunda yari uko rwagenda rwaguka uko icyorezo gicogora mu bihugu binyuranye, nyamara ahubwo rurimo kugabanuka bitewe n’ubwandu bushya burimo kugaragara.

Indege za RwandAir zizatangira kugurukana abagenzi kuri uyu wa Gatandatu

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .