Impinduka mu bikorwa byo kwibuka ku nshuro ya 26 Jenoside yakorewe Abatutsi: Ikiganiro na Dr Bizimana

Yanditswe na Karirima A. Ngarambe
Kuya 29 Werurwe 2020 saa 09:49
Yasuwe :
0 0

Harabura iminsi mike ngo Abanyarwanda binjire mu bihe byo kwibuka ku nshuro ya 26 Jenoside yakorewe Abatutsi, mu gihe isi n’u Rwanda muri rusange bikomeje guhangana n’icyorezo cya coronavirus.

Ni mu gihe kandi Guverinoma y’u Rwanda yafashe ingamba zikomeye zo kwirinda icyo cyorezo zirimo gusaba abaturage kuguma mu ngo zabo birinda ikwirakwizwa rya coronavirus, guhagarika ibikorwa bihuza abantu benshi, gufunga imipaka n’ibindi.

IGIHE yagiranye ikiganiro cyihariye n’Umunyamabanga Nshingwabikorwa wa Komisiyo y’igihugu yo kurwanya Jenoside (CNLG), Dr Bizimana Jean Damascène, asobanura birambuye uko kwibuka Jenoside yakorewe Abatutsi ku nshuroya 26 bizakorwa muri ibi bihe bidasanzwe.

IGIHE: Muri iki gihe isi yugarijwe na coronavirus, kwibuka ku nshuro ya 26 Jenoside yakorewe Abatutsi bizakorwa bite?

Dr Bizimana: Icya mbere nababwira nuko igikorwa cyo Kwibuka Jenoside yakorewe Abatutsi ari ihame ubuyobozi bw’igihugu cyacu bukomeyeho, niyo mpamvu Kwibuka 26 bizakorwa ariko abanyarwanda bazibuka hubahirizwa amabwiriza yatanzwe na Guverinoma y’u Rwanda yo kwirinda no kurwanya icyorezo kitwugarije.

Abaturage bazibukira mu ngo zabo babifashijwemo n’ibiganiro bizahita mu itangazamakuru: Radiyo, Televiziyo n’imbuga nkoranyambaga kandi hazakorwa ibishoboka kugira ngo ibikorwa byo Kwibuka bigere no mu mahanga hakoreshejwe uburyo bw’iyakure. Hari ibikorwa byahagaritswe kubera ibihe bidasanzwe turimo. Nta biganiro bizatangwa mu midugudu no mu bigo bya Leta n’abikorera nkuko byari bisanzwe.

Urugendo rwo Kwibuka ruba tariki 7 Mata buri mwaka ntiruzaba kimwe n’umugoroba wo kwibuka wakorwaga tariki ya 7 Mata n’ahandi hose wakorwaga ku yandi matariki. Kwibukira ahantu hatandukanye hirya no hino mu gihugu nkuko byari bisanzwe bikorwa mu gihe gisanzwe cyo kwibuka birahagaritswe kugeza igihe cyose amabwiriza yatanzwe na Guverinoma y’u Rwanda yo kwirinda no gukumira icyorezo cya coronavirus atarahinduka.

Igihe habaye ikibazo cy’ihungabana abantu bari mu ngo, hazakoreshwa kwiyambaza umujyanama w’Ubuzima cyangwa guhamagara umurongo wa telefoni utishyurwa kuri numero 114.

IGIHE: Tariki 7 Mata hazaba ibihe bikorwa?

Dr Bizimana: Hateganyijwe ko tariki ya 7 Mata, saa yine za mu gitondo, ku Rwego rw’Igihugu, ku Rwibutso rwa Jenoside rwa Gisozi hazabera igikorwa cyo kunamira abazize Jenoside kizarangwa no gushyira indabyo ku mva, kwenyegeza urumuri rutazima, gufata umunota wo Kwibuka bikurikirwe n’Ijambo nyamukuru rizanyuzwa kuri za Radiyo, Televiziyo no ku mbuga nkoranyambaga. Mu gihe ku Rwibutso rwa Gisozi hazaba hubahirizwa umunota wo Kwibuka, abaturage nabo bazawubahiriza mu ngo zabo batekereza abacu bishwe muri Jenoside bazizwa gusa ko ari Abatutsi. Iki gikorwa dukangurira abanyarwanda kuzakurikira no kwifatanya n’aho kiriho kibera, tuzirikana abacu bishwe muri Jenoside nubwo tuzaba tudashobora kujya aho biciwe cyangwa ku nzibutso baruhukiyemo.

IGIHE: Mu turere dutandukanye hari ibikorwa byo gutangiza icyunamo bizahabera ?

Dr Bizimana: Saa yine za mu gitondo mu Turere tw’u Rwanda mu gihe ku rwibutso rwa Gisozi hazaba hariho habera umuhango wo gutangiza icyunamo, buri Karere kazagena itsinda ry’abantu batarenze icumi, ariko uyu mubare ukaba ushobora kuzagabanywa kubera ibihe turimo, iri tsinda rikazajya ku rwibutso rw’Akarere cyangwa Urwibutso rwo ku Rwego rw’Igihugu ruri muri ako Karere mu Turere tuzifite, bakore umuhango mugufi wo kunamira abazize Jenoside no gushyira indabyo ku mva.

Abazajya ku Rwibutso bazaba ari abahagarariye ibyiciro harimo Meya w’Akarere, Umuyobozi wa Njyanama, Perezida wa IBUKA, Perezida wa AVEGA, Umuyobozi wa Polisi, Umuyobozi w’Ingabo, Uhagarariye urubyiruko n’Uhagarariye amadini n’amatorero kugira ngo avuge isengesho nkuko bisanzwe biba mu gikorwa cyose cyo Kwibuka. Abanyamakuru bari mu Turere bazoroherezwa gukurikira ibi bikorwa kugira ngo bashobore kubigeza ku Banyarwanda hakoreshejwe uburyo bwose.

n’Umunyamabanga Nshingwabikorwa wa Komisiyo y’igihugu yo kurwanya Jenoside (CNLG), Dr Bizimana Jean Damascène yavuze ko kwibuka ku nshuro ya 26 Jenoside yakorewe Abatutsi habazamo impinduka

IGIHE: Ku gicamunsi cya tariki 7 Mata hazakorwa iki ko hari hamenyerewe urugendo rwo Kwibuka?

Dr Bizimana: Hari ibikorwa biteganyijwe ariko ku buryo budasanzwe bukoreshwa kubera ibi bihe turimo byo guhangana n’icyorezo cy’indwara kandi tukaba tugomba kugitsinda. Guhera saa cyenda z’amanywa, hazaba ikiganiro ku mateka ya Jenoside yakorewe Abatutsi kinyuzwe kuri za Radiyo na Televiziyo no ku mbuga nkoranyambaga. Ikiganiro kizarangwa no gusangira ijambo no kungurana ibitekerezo n’abantu batuye mu bice bitandukanye by’igihugu no mu mahanga. Ubu buryo buzakoreshwa mu cyumweru cyose cy’icyunamo buri munsi saa cyenda kugeza saa kumi n’igice z’amanywa.

Ibiganiro bizatangwa bizibanda ku mateka ya Jenoside yakorewe Abatutsi no ku ngamba zikoreshwa n’izikenewe mu gukomeza kuyabungabunga, uruhare rw’urubyiruko mu guhangana n’ingaruka za Jenoside no kurwanya ingengabitekerezo ya Jenoside, guha umwanya abacitse ku icumu tubakomeza no guhangana n’ikibazo cy’ihungabana, kugaruka ku ruhare rw’amahanga muri Jenoside no ku rugendo amahanga yakoze mu kwemera uruhare rwayo muri Jenoside no gufatanya n’u Rwanda mu rugendo rwo kwiyubaka, gutekereza ku ruhare rw’itangazamakuru mu bukangurambaga bwa Jenoside n’uruhare rwaryo mu kubaka igihugu, ndetse hanaganirwe ku ruhare rw’amashyaka ya politiki muri Jenoside n’uruhare rwayo nyuma ya Jenoside mu kubaka igihugu cyashegeshwe n’amateka ya Jenoside.

Mu minsi y’icyumweru cy’icyunamo kandi, hazakomeza kuri Radiyo na Televiziyo ibikorwa bitandukanye bifasha Kwibuka Jenoside, birimo ubuhamya bw’abayirokotse, filime zerekeye amateka ya Jenoside n’ukwiyubaka k’u Rwanda, imivugo ijyanye no Kwibuka Jenoside, n’amateka yose ya Jenoside bikazanyuzwa mu itangazamakuru ku buryo bworohereza abaturage n’abanyarwanda baba mu mahanga n’inshuti z’u Rwanda kwibuka.

IGIHE: Muvuze ko tariki ya 7 Mata 2020 nta mugoroba w’ikiriyo, haba hari ikizawusimbura ?

Dr Bizimana : Tariki ya 7 Mata nimugoroba, guhera saa kumi n’ebyiri, hazatangwa ubutumwa bwo guhumuriza no kwiyubaka buzayoborwa na Perezida wa Ibuka ku Rwego rw’Igihugu afatanyije na bamwe mu bayobozi b’Imiryango y’abacitse ku icumu bari mu Rwanda no mu mahanga. Twatekereje guha umwanya wihariye abacitse ku icumu rya Jenoside yakorewe Abatutsi aho bari hose ku isi dukoresheje ikoranabuhanga kugira ngo bahumurizanye, bakomezanye, baganire ndetse n’abandi banyarwanda n’inshuti z’u Rwanda bashobore kubaba hafi no kubatera imbaraga muri ibi bihe bazaba badashobora guhura ngo bafatanye kwibuka.

Jenoside yatugizeho ingaruka mu buryo bwose, ariko ntawakwirengagiza ko uwacitse ku icumu muri 1994 wamaze biriya bihe byose yihishahisha, abicanyi bamuhiga amanywa n’ijoro, uwo muntu afite umwihariko we adahuje n’abandi. No mu ruhande rw’abahagaritse Jenoside, abasilikare ba RPA-Inkotanyi bahanganye n’abicanyi bahagarika Jenoside, uko babatsinze bagasanga aho bafashe hari imirambo y’abatutsi bamaze kwicwa, harimo n’inkomere zikomeye, bagashakashaka mu mirambo abagihumeka, bagira amahirwe yo kubabona bakabavura mu buryo bwose bashoboye kandi bugoranye kubera amikoro atari ahari n’ibihe bibi by’icyo gihe ; abo basilikare bacu bafite umwihariko ukomeye w’amateka udasangana abandi banyarwanda.

Usanga bibabaje kubona hari abibagirwa ababarokoye mu bihe bibi cyane by’icuraburindi, bakajya mu murongo w’abarwanya Leta bakesha icyo ubu bari cyo. Numva ko Kwibuka26 bikwiye kuzaba umwanya wo kugaruka ku mateka yo kurokoka Jenoside n’igihango abanyarwanda bafitanye n’abarokoye u Rwanda, bigatuma twarongeye kubaho tukiyubaka, tukaba tugeze heza hashimishije.

IGIHE: Gusoza icyumweru cy’icyunamo ku itariki 13 Mata byo biteganyijwe gute?

Dr Bizimana: Uyu mwaka igikorwa cyo gusoza icyunamo gikorerwa ku rwibutso rwa Rebero nacyo kizaba kigufi kubera ibihe turimo. Tariki 13 Mata saa yine za mu gitondo, ku rwibutso rwa Rebero hazajyayo itsinda rito riyobowe na Perezida wa Sena rizakora igikorwa cyo kunamira no gushyira indabyo ku mva zishyinguyemo abanyapolitiki bashyinguye ku i Rebero bishwe muri Jenoside yakorewe Abatutsi bazizwa kutemera umugambi wa Jenoside, indabyo zinashyirwe ku mva zishyinguyemo imibiri irenga ibihumbi cumi na bine y’Abatutsi bishwe muri Jenoside ishyinguye ku Rwibutso rwa Rebero.

IGIHE: Mu Turere ho nta kintu kizahakorerwa?

Dr Bizimana: Tariki ya 13 Mata nyuma ya saa sita, guhera saa cyenda hazaba ikiganiro kizanyuzwa kuri za radiyo, Televiziyo no ku mbuga nkoranyambaga kizaganira ku ruhare rw’amashyaka ya politiki muri Jenoside no ku kamaro ka politiki nziza mu kubaka igihugu no guhangana n’ingengabitekerezo ya Jenoside.

IGIHE: Kwibuka mu gihe cy’iminsi 100 byo biteganyijwe gute?

Dr Bizimana: Tuzakomeza kugendera mu murongo wo Kwibuka twiyubaka kandi twubahiriza amabwiriza yo kwirinda iki cyorezo duhanganye nacyo. Niyo mpamvu ibikorwa byo kwibuka bisanzwe bibera ahantu hatandukanye mu gihugu n’ahiciwe abatutsi muri Jenoside bitazahabera. Abantu bazibukira mu ngo zabo.Nitugira amahirwe icyorezo kigacika kandi turabyizeye ko tuzagihashya, Kwibuka mu minsi 100 byakorwa mu gihe amabwiriza yaba ahindutse, ibikorwa byose byo mu gihugu bisubukuwe. Icyo gihe hazakurikizwa icyo amabwiriza mashya azaba ateganya. Bigenze bityo, byatuma nko mu kwezi kwa Gicurasi na Kamena, dushobora kureba uko muri buri Karere hatoranywa ahantu hamwe hafite amateka akomeye hakabera igikorwa cyo kwibuka Jenoside yakorewe Abatutsi, hakibukwa Abatutsi bose biciwe muri ako Karere.

IGIHE: Hari ubutumwa bwihariye mwatanga bujyanye no kwibuka ku nshuro ya 26 Jenoside yakorewe Abatutsi?

Dr Bizimana: Jenoside yakorewe Abatutsi yashegeshe igihugu muri rusange, ariko by’umwihariko abayirokotse yabagizeho ingaruka ziremereye. Bararokotse kandi bariho ni nacyo cy’ingenzi. Kuva muri Nyakanga 1994 abajenosideri batsindwa, Leta ikora ibishoboka ikaba hafi y’abacitse ku icumu rya Jenoside mu buzima bwabo bwa buri munsi. Muri iyi minsi tuzibuka mu buryo budasanzwe abacu bishwe muri Jenoside, ndatekereza by’umwihariko abagifite intege nke mbakomeza mu izina rya Komisiyo y’Igihugu yo Kurwanya Jenoside, mbasubiriramo ko bakwiye gukomezwa no kuba bafite ubuyobozi bw’igihugu cyabarokoye kandi giharanira iteka kububaka no kubaka ubumwe bw’abanyarwanda ngo Jenoside ntizongere kubaho mu Rwanda.

Mu gihe cyo Kwibuka abacu bishwe hakaba hashize imyaka 26, tuzibuke aya mahirwe yo kuba abarokotse bararokotse koko kubera Inkotanyi, bakaba bariho babikesha FPR yubatse Leta nziza ikomeje guharanira ko icyo abishwe bazize kitazongera kubaho ukundi ari imbaraga zigomba guha abacitse ku icumu icyizere cyo kudahungabana. Mu gihe tuzaba twibukira iwacu mu ngo, abazumva bacitse intege bazatekereze ko muri 1994 abacu bicwaga kandi bakicishwa na Leta, ariko ubu abarokotse n’abagarutse mu Rwanda bari barambuwe na Leta y’abajenosederi, bariho kubera ubuyobozi bwiza bwa FPR-Inkotanyi burangajwe imbere na Nyakubahwa Perezida wa Repuburika Paul Kagame; ubuyobozi bwabarokoye bukaba bububatse. Iki ni icyizere kigomba kubaka buri wese ufite intege nke muri ibi bihe bikomeye byo kwibuka abacu bishwe bazizwa ko ari Abatutsi. Nibwo butumwa numva nabaha kandi nsaba ko buri wese abuha agaciro bukwiye.

Karirima @igihe.com


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Special pages
. . . . . .