Inama za Nteziyaremye uba mu Bushinwa ku buryo bwiza bwo guhashya Coronavirus

Yanditswe na Habimana James
Kuya 24 Werurwe 2020 saa 08:19
Yasuwe :
0 0

Mu mpera z’umwaka wa 2019 nibwo mu Mujyi wa Wuhan hadutse indwara yica abaturage babanje kurwara umusonga, ikiwuteye gikomeza kuba amayobera.

Iyo ndwara yiswe COVID-19 nyuma, yaje gukwira u Bushinwa bwose n’Isi muri rusange. Imibare ya vuba yerekana ko muri icyo gihugu abayanduye ari 81,171, muri uwo mubare 3.277 yarabishe, naho abarenga 73,159 barayikize basezererwa mu bitaro.

Kugeza ubu iki cyorezo kimaze kwandurwa n’abarenga ibihumbi 380 ku Isi, naho abarenga ibihumbi 16 bamaze gupfa.

Intara ya Hubei yatangiriyemo iki cyorezo mu Bushinwa, nta bwandu bushya buyigaragaramo.

Amakuru mashya ava mu Bushinwa ni uko leta yatangaje ko nyuma yo guhangana n’iki cyorezo, imijyi imwe yo muri Hubei igiye kuvanwa mu kato ku buryo ingendo zitangira gukorwa.

Kuva kuri uyu wa Gatatu hari ingendo ziri butangire gusubukurwa mu Mujyi wa Wuhan, ariko hari indi mijyi aho bo bazemererwa gukora ingendo kuva tariki 8 Mata uyu mwaka.

Visi Perezida wa Diaspora nyarwanda yo mu Bushinwa, Nteziyaremye Beneyo Emerance, utuye mu Mujyi wa Dalian mu Ntara ya Liaoning, yabwiye IGIHE ko umujyi atuyemo 19 aribo banduye, ariko ubu bose bavuye mu bitaro kandi nta muntu n’umwe wapfuye.

Yavuze ko nta Munyarwanda wigeze ahura n’iki cyorezo mu Bushinwa.

Yagize ati “Uyu munsi uko bimeze ni uko mu mijyi hafi ya yose mu Bushinwa nta bwandu bushya bugihari, amakuru ahari ni uko mu mijyi 338, igera kuri 45 muri yo niyo yonyine igisigayemo abantu bafite ubwandu.”

“Ku byerekeye n’ubwandu bushya ni uko birimo kugaragara ko burimo kuva mu bantu barimo kuva hanze y’igihugu ariko abantu bari imbere mu gihugu nta bwandu bushya bwongeye kugaragara. Abantu barimo kuva hanze nk’Abashinwa barimo gutaha cyangwa abandi barimo kuza mu kazi abo ni bo barimo kuzana ubwandu bushya.”

Nteziyaremye yavuze ko nyuma y’aho bigaragaye ko abantu binjira mu gihugu aribo barimo kuzana ubwandu bushya, byatumye u Bushinwa bufata ingamba zikomeye.

Yagize ati “Ubu buri wese urimo kwinjira mu Bushinwa agomba kumara iminsi 14 ari mu kato. Mbere barakurekaga bakavuga ko wowe ubwawe wiha akato mu rugo, ubu siko bimeze, ntabwo bareba ngo ufite umuriro cyangwa aho wanyuze mu mahanga, umuntu wese winjiye mu Bushinwa uyu munsi bamushyira mu kato mu minsi 14.”

Yavuze ko mu Mujyi wa Wuhan aho iki cyorezo cyatangiriye, abantu bemerewe gusohoka, ariko bigusaba kuba ufite icyangombwa kigaragaza uko umubiri wawe uhagaze.

Umujyi wa Wuhan uzatangira gufungura ingendo hagati yawo n’indi mijyi tariki 8 Mata uyu mwaka, ariko indi Mijyi yo mu Ntara ya Hubei, yo izatangira gukurirwaho akato tariki 25 uku kwezi.

Nubwo abandura ari bake, Nteziyaremye avuga ko abantu batadamaraye ngo icyorezo cyarashize, bakomeje kwitwararika nk’uko amategeko abiteganya.

U Bushinwa bwakoresheje izihe ngufu ngo buhashye iki cyorezo?

Nteziyaremye yavuze ko ibi byatewe n’ubufatanye bwabaye hagati y’ubuyobozi bw’u Bushinwa n’abaturage.

Ati “Abatutage bashoboye kubahiriza amategeko n’amabwiriza bahabwaga, cyane ko urebye amategeko yahabwaga abaturage yabaga akomeye cyane, kukubwira ngo ugume mu nzu ni ibintu abantu batari bamenyereye. Abantu babaga bamenyereye kujya ku kazi, kwishima n’ibindi, ariko ibi byose byarahindutse kandi turabyubahiriza.”

Imibare ya Minisiteri y’Ubuzima mu Rwanda, igaragaza ko abantu 36 aribo bamaze kwandura iki cyorezo kuva tariki 14 uku kwezi.

Ibi byateye impungenge igihugu, bituma hafatwa ingamba zikomeye harimo guhagarika ingendo zitari ngombwa, gufunga imipaka no guhagarika ibyo guhurira hamwe.

Nteziyaremye yavuze ko intwaro ya mbere yo gutsinda icyorezo nka COVID-19 ari ukubaha ubuyobozi kandi ukabwizera.

Yagize ati “Nk’umuntu umaze amezi abiri mba mu nzu ndetse nubahiriza amategeko, nabwira Abanyarwanda ko bakwiye kubaho nk’uko nabayeho kandi byaramfashije. Ikintu cyamfashije cyane ni ukugirira ubuyobozi icyizere, uba ugomba gutegereza ko bakubwira amakuru kandi ukayakurikiza uko ari, muri ayo makuru niba hari icyo ubonyemo udasobanukiwe, aho kujya gushakiriza ahatari ho ndetse harimo n’ibihuha, baza aho ugomba kubariza.”

Minisiteri y’Ubuzima isaba abaturarwanda kwita ku gukaraba intoki, kwirinda kujya ahantu hateraniye abantu benshi, gusiga intera byibura ya metero imwe hagati y’abantu no kwirinda ingendo zitari ngombwa.

Ibimenyetso bya Coronavirus birimo kugira umuriro, ibicurane, umunaniro n’inkorora ijyana no kubabara mu mihogo, guhumeka nabi bishobora kugera aho bitera umusonga nawo ushobora kubyara urupfu.


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza