Kayonza: Abarimu batangiye gahunda yo kuvurira abanyeshuri ku ishuri

Yanditswe na Hakizimana Jean Paul
Kuya 8 Ugushyingo 2019 saa 02:13
Yasuwe :
0 0

Abarimu bo ku bigo by’amashuri biherereye mu Karere ka Kayonza batangiye ibikorwa by’ubuvuzi bw’ibanze ku bana baba bafatiwe n’indwara runaka ku bigo by’amashuri hagamijwe kubaha ubufasha bw’ibanze hakiri kare no kubarinda gusiba kubera uburwayi.

Iki gikorwa kibera mu bigo by’amashuri 15 byatoranyijwe kikaba kigirwamo uruhare n’abarimu babarizwa mu amatsinda (Clubs) Ubuzima bwiza zibarizwa kuri ibyo bigo, mu mwaka wigerageza kimaze ngo cyagabanyije isiba ry’abana ku mashuri.

Aba barimu bahawe amahugurwa yibanze n’Ikigo cy’Igihugu cy’Ubuzima,RBC ku bufatanye n’Umuryango Partners in Health ku bijyanye no kuvura abana malaria n’izindi ndwara nk’umutwe, inkorora, ibicurane n’izindi zikunda kwibasira abana.

Bagira kandi umujyanama w’ubuzima ukorana nabo bya hafi ngo kuburyo iyo umwana akeneye ubundi bufasha bwisumbuyeho ahita ahabwa urupapuro rumwohereza kwa muganga mu buryo bwihuse.

Niyonizera Egide, umwe mu barimu bigisha ku rwunge rw’amashuri rwa Ndego II akanaba umuyobozi w’itsinda Ubumwe avuga ko indwara bakunda kuvura abana cyane ari indwara ya malaria. Ngo abanyeshuri bose barabakira udafite ubwisungane mu kwivuza bakamuvura ubundi akazishyura amafaranga 500.

Nyirahabimana Julliette ufite umwana wiga mu mwaka wa kabiri w’amashuri yisumbuye yabwiye IGIHE ko iyi gahunda yo kuvurira abana ku ishuri bayishimiye cyane bitewe nuko akenshi abana barwariraga ku ishuri bigatuma ababyeyi bahagarika imirimo kugira ngo bajye kubavuza.

Ati “Umwana wanjye avurirwa ku ishuri kenshi ariko inshuro ntazibagirwa ni imwe ubwo yageraga ku ishuri agafatwa n’umutwe hamwe n’umuriro mwinshi, bahise bamusuzuma bamuha imiti ataha ayifite, icyo gihe byandinze kumusubiza kwa muganga ahubwo nkurikirana uko afata ya miti nta gihe byatwaye yahise akira.”

Umuyobozi w’Urwunge rw’amashuri rwa Ndego II, Kagari Meshach avuga ko bataratangira iyi gahunda mu bana barenga 2800 babarizwa kuri iki kigo nibura abarenga 500 basibaga ishuri mu cyumweru kubera kurwara ariko ngo ubu abasiba ni nk’ijana.

Umuyobozi w’Akarere ka Kayonza wungirije ushinzwe imibereho myiza y’abaturage Harerimana Jean Damascène, yabwiye IGIHE ko iyi gahunda yatanze umusaruro mu buryo bugaragara, ngo barateganya no kuyagurira ku bindi bigo.

Yagize ati “Mbere umwana yasibaga umunsi umwe, ibiri, itatu wamubaza akakubwira ko yari arwaye none ubu iyo arwaye by’umwihariko malaria ntabwo bituma asiba , agera ku ishuri abarimu bakamusuzuma basanga arwaye bakamuha imiti bakanamukurikiranira ku ishuri ku buryo kuri biriya bigo twatangiriyeho imibare y’abana basibaga yagabanutse mu buryo bugaragara.”

Uyu muyobozi yakomeje avuga ko nyuma yo kubona umusaruro mwiza iyi gahunda yatanze, barateganya kuyigeza no ku yandi mashuri.

Mu mwaka wa mbere w’igerageza abanyeshuri barenga ibihumbi 31 nibo bavuwe bahabwa imiti. Muri bo 54% bari barwaye malaria.

Aba barimu bahawe amahugurwa yibanze n’Ikigo cy’Igihugu cy’Ubuzima,RBC ku bufatanye n’Umuryango Partners in Health ku bijyanye no kuvura abana malaria n’izindi ndwara nk’umutwe, inkorora, ibicurane n’izindi
Iyi nzu niyo ikoreshwa n'abarimu mu kuvuriramo abana ikaba yaruzuye itwaye miliyoni 15 zirimo miliyoni eshatu zatanzwe n'abarimu 46 bibumbiye muri Club Ubuzima Bwiza
Niyonizera Egide avuga ko abanyeshuri benshi bakira ari abarwaye malaria
Umuyobozi w'Akarere ka Kayonza wungirije ushinzwe imibereho myiza y'abaturage, Harerimana Jean Damascene yavuze ko bifuza gutangiza iyi gahunda no mu yandi mashuri

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza