#Kwibuka24: AU yifatanyije n’Abanyarwanda bahisemo gukoresha ubumwe nk’umuti w’urwango

Yanditswe na Mukaneza M.Ange
Kuya 7 Mata 2018 saa 12:58
Yasuwe :
2 3

Umuryango wa Afurika Yunze Ubumwe, AU wifatanyije n’u Rwanda mu gutangiza iminsi 100 yo kwibuka ku nshuro ya 24 Jenoside yakorewe Abatutsi mu 1994, ushima cyane uburyo Abanyarwanda bahisemo ubumwe n’ubwiyunge nk’umuti wo guhashya urwango.

Kuri uyu wa 7 Mata 2018 nibwo u Rwanda rwatangije ibikorwa byo kwibuka Jenoside yakorewe Abatutsi mu 1994, igatwara ubuzima bw’abasaga miliyoni imwe.

Mu muhango wo gucana Urumuri rw’Icyizere wabereye ku cyicaro cy’uyu muryango i Addis Abeba muri Ethiopie, Umuyobozi wa Komisiyo ya AU, Moussa Faki Mahamat, yavuze ko kwibuka ari ngombwa kuko ari uguha icyubahiro abishwe no guharanira kutongera kugwa mu mutego w’iki cyaha kiruta ibindi.

Ati “ Twifatanyije n’u Rwanda n’abaturage barwo, tuzirikana ko uku kwifatanya nabo batabibonye igihe bari babikeneye cyane.”
Yakomeje avuga ko kunga ubumwe ari uguha icyubahiro abishwe, gufata mu mugongo abarokotse no kuzirikana uburyo bananiwe guhagarika Jenoside yakorewe Abatutsi, bongera kwiyemeza kutemera ko ibyabaye bisubira.

Mahamat kandi yavuze ko u Rwanda rwabashije kwikura mu bihe bikomeye rwanyuzemo kubera ko rwashatse ibisubizo by’ibibazo rwagombaga guhangana na byo by’umwihariko hongera gushyirwaho gahunda zari zaragaragaje guteza imbere kubana mu mahoro, gutanga ubutabera ndetse no kubiba ubwiyunge.

Ati “ Ndifuza guha icyubahiro guverinoma n’Abanyarwanda bahisemo kugira ubwiyunge intero yabo, ubumwe bw’igihugu bukagirwa umuti w’urwango. U Rwanda rwabashije gutera intambwe irenze iyari yitezwe.”

Insanganyamatsiko yo kwibuka ku nshuro ya 24 Jenoside yakorewe Abatutsi igira iti " Twibuke Twiyubaka".

Bafashe umwanya wo kunamira abasaga miliyoni imwe bishwe bahorwa ko ari Abatutsi
Moussa Faki Mahamat afatanya n'abandi bayobozi muri AU gucana urumuri rw'icyizere

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza