Madamu Jeannette Kagame yashishikarije urubyiruko kwitabira gahunda y’ubukorerabushake

Yanditswe na Cyprien Niyomwungeri
Kuya 11 Ukwakira 2019 saa 08:10
Yasuwe :
0 0

Madamu Jeannette Kagame yibukije urubyiruko rwaturutse hirya no hino muri Afurika n’ahandi ko rugize umubare munini w’abatuye Isi, bityo rukwiye kubyaza umusaruro aya mahirwe rukagirira abandi akamaro binyuze no mu bikorwa by’ubukorerabushake.

Yabyibukije urubyiruko mu kiganiro ’Pathways to Development: Civic Engagement & Volunteerism’, ku ruhare rwarwo mu bikorwa mboneragihugu n’akamaro k’ubukorerabushake ku iterambere rya sosiyete n’igihugu, cyatangijwe mu nama ya YouthConnekt Africa irimo kubera mu Rwanda kuva ku wa 9-11 Ukwakira 2019.

Ni ikiganiro cyahuje urubyiruko rwo mu bihugu bitandukanye bya Afurika n’ahandi, abayobozi muri za Guverinoma, imiryango itari iya leta n’abafatanyabikorwa mu iterambere, cyanitabiriwe n’icyamamare mu mupira w’amaguru Didier Drogba.

Madamu Jeannette Kagame yabwiye urubyiruko ko ari umutungo w’agaciro gakomeye Isi ifite kuko rungana na miliyari 1.8 z’abaturage bayo bose, kandi muri rwo harimo imbaraga zihagije, mu gihe rwitaweho ngo rube umuyoboro w’ibitekerezo n’ibisubizo kandi narwo rukabiharanira.

Yakomeje avuga ko abagera kuri 60% muri Afurika bari munsi y’imyaka 25, ibi bikaba bisobanuye ko ari umusemburo w’impinduka kuri uyu mugabane n’umuyoboro wo kugera ku mahoro arambye n’uburumbuke.

Ati “Muri iyi Si turimo, iyi mibare ifite icyo ivuze. Mu gisobanuro ivuze imibare y’amahirwe mufite, inasobanuye inshingano nyinshi ziri ku ntugu zanyu.”

Madamu Jeannette Kagame yavuze ko ubukorerabushake ari ikintu cy’agaciro kuko bufite umusaruro udasanzwe mu iterambere ry’abo bukorerwa, yibutsa urubyiruko ko hari imbaraga ziri mu bikorwa by’ubukorerabushake, hatitawe ku ngano yabwo.

Ati “Ubukorerabushake ntabwo ari bushya ku mugabane wacu. Ni imigirire yacu gakondo ifite umuzi ku kamaro ka sosiyete ndetse n’inshingano y’ingenzi buri wese afite ku wundi yo kurwanya ubusumbane ku Isi.”

“Ndabasaba gutekereza isegonda rimwe uko sosiyete zacu ziba zimeze iyo tutimakaza imyumvire Nyafurika y’’ubuntu’ . Isi yacu yaba imeze ite iyo tudashyira imbere ubumuntu”.

Yavuze ko ubukorerabushake bwahinduye urwego rw’ubuzima, uburezi, ubuhinzi, ubumenyi n’ikoranabuhanga n’izindi nzego nyinshi, bwongera ubushobozi n’ubumenyi bw’urubyiruko, ashimira ibigo n’imiryango bikora ubutitsa ngo bihe amahirwe urubyiruko yo gukorera ubushake muri iki gihe rwugarijwe n’ubushomeri.

Umukoro ku rubyiruko

Madamu Jeannette Kagame yabwiye urubyiruko ko abayobozi n’abafata ibyemezo muri Afurika ndetse no ku Isi yose barimo gushyira imbaraga mu gushyiraho ingamba zubaka ubushobozi bwarwo kuko ari nk’inkingi z’iterambere.

Ku ruhande rw’u Rwanda, yavuze ko Guverinoma yashyizeho gahunda zivoma mu ndangagaciro z’ubukorerabushake. Yongeyeho ko guverinoma yahisemo gushora imari mu rubyiruko kuko 70% by’abaturage bari munsi y’imyaka 35.

Ibi bikaba byarakozwe binyuze mu kubaka imyumvire yabo ku bumwe bw’igihugu, kubaka umwanya mu miyoborere no kubashyira mu mutima w’urugendo rw’impinduka. Ubu bushake bwa politiki bwatumye urubyiruko rushyira hamwe kandi rutanga umusanzu mu iterambere ry’ubukungu bw’igihugu.

Madamu Jeannette Kagame agendeye ku rugero rw’aho Minisiteri y’Urubyiruko ku bufatanye na Imbuto Foundation n’Umuryango w’Abibumbye mu Rwanda, bashimira urubyiruko rwabaye indashyikirwa mu guhanga udushya binyuze muri gahunda nka YouthConnekt na CYRWA Awards, yabwiye urubyiruko ko rushyigikiwe ariko rufite umukoro.

Ati “Rubyiruko, hariho gahunda zibashakira ibyiza, ariko intambwe z’ingenzi bikeneye ko ziterwa kugira ngo ubuzima bwanyu ndetse n’imibereho bihinduke. Amahitamo ya nyuma ni ayanyu ndetse no kugira uruhare ni ibyanyu”.

“Ndabashishikariza gufata igihe mugakora ubushakashatsi bwimbitse mukamenya intego yanyu. Mukikijwe n’abantu bazatuma muhaguruka bakabafasha kugira uruhare nk’icyitegererezo cy’impinduka muri sosiyete. Bazatuma kandi mubyaza umusaruro amahirwe atabarika mufite mube mugere ku nzozi zanyu”.

Mu kiganiro cyatanzwe na Tapiwa Karamuko, uyobora gahunda y’Ubukorerabushake ya Loni mu Karere, yabwiye urubyiruko ko gukorera ubushake bidakenesha ahubwo bigirira akamaro ababukora n’abandi muri rusange.

Ati “Mu bukorerabushake niho ho gufashiriza urubyiruko gutyaza ubumenyi, kumenyana n’abantu n’uburambe bityo bakamenya uko bakora akazi.”

Kamariza Isabelle washinze Umuryango Solid Africa ukorera ubushake mu kwita ku barwayi, yavuze ko urubyiruko rudakwiye kwiganyira gukorera ubushake kuko akantu gato wakorera umuntu gashobora guhindura ubuzima bwe.

Ati “Urubyiruko ni igisubizo cy’ibibazo bya Afurika, nta mpamvu yo kwiyumva ko nta musanzu watanga kuko ntabwo uri wenyine hari abiteguye kugufasha”.

Didier Drogba yasangije urubyiruko uko yavuye mu gihugu cye afite imyaka itandatu agakurira mu Bufaransa ariko mu guhitamo ikipe akinira agahora yumva ku mutima we Côte d’Ivoire.

Aha niho yasabye urubyiruko ko aho rwajya hose rukwiye kwibuka iwabo rukagaruka rugakora ibikorwa bifasha sosiyete muri rusange. Yatanze urugero rw’uburyo yakoresheje impano ye y’umupira w’amaguru agakangurira abarwanaga mu gihugu guhagarika imirwano.

Drogba kandi yanashinze Umuryango Drogba Foundation ukora ibikorwa bitandukanye by’ubugiraneza, akaba yarubatse ivuriro i Abidjan ndetse akagira n’uruhare mu bukangurambaga bwa UNICEF bwo gukingira abana.

Madamu Jeannette Kagame n'abayobozi batandukanye bitabiriye ikiganiro ’Pathways to Development: Civic Engagement & Volunteerism’ cyagarutse ku ruhare rwarwo mu bikorwa mboneragihugu n’akamaro k’ubukorerabushake mu iterambere
Madamu Jeannette Kagame yashishikarije urubyiruko kwitabira gahunda y’ubukorerabushake
Madamu Jeannette Kagame yavuze ko imibare y'urubyiruko ituma rugira inshingano nyinshi zirutegereje
Didier Drogba yasangije urubyiruko uko yavuye mu gihugu cye afite imyaka itandatu agakurira mu Bufaransa ariko agahora yumva ku mutima we Côte d’Ivoire
Drogba yashinze Umuryango Drogba Foundation ukora ibikorwa bitandukanye by’ubugiraneza
Madamu Jeannette Kagame yitabiriye ibiganiro byagarutse ku ruhare rw'urubyiruko muri gahunda z'ubukorerabushake
Minisitiri w'Uburinganire n'Iterambere ry'Umuryango, Nyirahabimana Solina, ari mu bitabiriye inama
Abakiri bato bahawe umwanya wo kwitabira ibi biganiro byibanze ku kugaragaza uruhare rwabo mu kubaka igihugu

Amafoto: Niyonzima Moïse


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza