Perezida Kagame yashishikarije abashoramari gushora mu mishinga y’ikoranabuhanga iri mu Rwanda

Yanditswe na Habimana James
Kuya 11 Ugushyingo 2019 saa 11:44
Yasuwe :
0 0

Perezida Paul Kagame witabiriye inama y’ishoramari muri Afurika y’Epfo izwi nka ‘African Investment Forum’, yashishikarije abashoramari kuza mu gihugu bagashora amafaranga yabo mu mishinga y’ikoranabuhanga.

Perezida Kagame yabivugiye mu Mujyi wa Johannesburg, aho we na Perezida wa Afurika y’Epfo, Cyril Ramaphosa, Perezida wa Ghana Nana Akufo Addo na Minisitiri w’Intebe wa Mozambique Carlos Agostinho do Rosário n’abandi, baganiye ku iterambere ry’ishoramari muri Afurika.

Ni inama yateguwe na Banki Nyafurika Itsura Amajyambere, igahuza ibigo by’ubwiteganyirize, ibigo bya leta bikora ishoramari, abashoramari bikorera ku giti cyabo, abafata ibyemezo n’abakuru ba za Guverinoma.

Perezida Kagame mu kiganiro yatanze muri iyo nama, yavuze hakurikijwe amahirwe ahari, iki gihe ari wo mwanya mwiza wa Afurika wo kwiyerekana mu iterambere.

Yagize ati “Nkunda gutekereza ko iki noneho aricyo gihe cya Afurika, kuko Abanyafurika ubwacu nitwe twisubije inyuma, ubu twamaze gusesengura ko ari igihe cyacu kandi dukeneye gukoresha buri mahirwe ahari kugira ngo tugere aho tugomba kuba turi.”

Perezida Kagame kandi yashimiye Perezida Cyril Ramaphosa kuba yaratanze umwanya, kugira ngo abantu baganire ibibazo nk’ibi, ashimira na Perezida wa Banki Nyafurika Itsura Amajyambere, Akinwumi Adesina.

Perezida Kagame yavuze ko nk’u Rwanda, rwashyize ingufu mu gufasha abantu gukora ubucuruzi, gushyiraho gahunda nziza n’ umutekano. Yavuze ko byaba mu karere ka Afurika y’i Burasirazuba, ubu ariko gace karimo kwihuta ku mugabane Afurika, u Rwanda narwo rukaba ari igihugu kirimo kubyungukiramo.

Umukuru w’igihugu ubwo yavugaga ku mahirwe y’ishoramari ari mu Rwanda, yagize ati “Twakoze ibintu bitandukanye, twashyizeho ahantu hakorerwamo ubucuruzi, turimo kugerageza gushyiraho igikorwa cyo kuhira imyaka ndetse no gufatanya n’abikorera mu bijyanye no gukora ubucuruzi bw’ibyoherezwa mu mahanga.”

Yagaragaje kandi umushinga wa Kigali Innovation City ugamije guteza imbere ikoranabuhanga, asaba abikorera kuza kuwubyaza umusaruro.

Kigali Innovation City ni umushinga ukomeye byitezwe ko uzafasha u Rwanda mu guteza imbere urwego rw’ikoranabuhanga, urimo kubakwa mu gice cyahariwe inganda mu Karere ka Gasabo, ukazatwara miliyari $2.

Uzaba ugizwe n’inyubako zizacumbikira kaminuza mpuzamahanga, ibigo by’ikoranabuhanga ryibanda ku buhinzi, ubuzima, serivisi z’imari; ndetse unatange umusanzu mu iterambere ry’ibikorwa remezo binyuze mu gutanga inzu z’ubucuruzi n’izo guturamo, ukazubakwa ku buso bwa hegitari 70.

Perezida Kagame yagize ati “Ikigega cyo guteza imbere imishinga y’ikoranabuhanga no guhanga udushya muri Kigali cyashyizweho ku bw’inkunga ya Banki Nyafurika Itsura Amajyambere, guverinoma nayo ishyiramo amafaranga, turifuza ko abikorera baza naho bagashoramo imari.”

Yavuze ko kuri ubu nta rwitwazo Afurika ifite mu kuba yahamagarira abantu kuhakorera ishoramari.

Kagame yavuze ko icy’ingenzi ari uguha urubuga abantu bose bagatanga umusanzu wabo, hatirengagijwe abagore.

Ati “Mureke dukore ibyo dushoboye, duhe n’umwanya abagore . Tujya tubona benshi b’abayobozi b’ibigo, hari benshi bashoboye, rero ntabwo twabasiga inyuma. Tugomba kugira ubuyobozi bubazwa ibyo bushinzwe, bwubahiriza amategeko.”

Umuyobozi wungirije ushinzwe ikigega cy’imari muri Afurika y’Epfo, Vuyelwa Vumendlini, mu kiganiro yahaye itangazamakuru yavuze ko mwaka ushize bageze ku rwego rwiza kuko babonye ishoramari rirenga miliyari 36 z’amadorali, ubu bakaba bizeye ko uyu mwaka ugiye kurushaho kuba mwiza cyane.

Inama African Investment Forum izarangira tariki 13 Ugushyingo 2019, ikaba ihuje abantu bagera ku bihumbi bibiri.


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza