Uburemere bw’uruhare rw’abaganga n’abaforomo muri Jenoside yakorewe Abatutsi

Yanditswe na Dr Bizimana Jean Damascène
Kuya 14 Gicurasi 2020 saa 10:20
Yasuwe :
0 0

Kimwe mu biranga ubukana bwa Jenoside yakorewe Abatutsi muri 1994, nuko nta hantu na hamwe abicanyi batakoreye Jenoside, haba muri za Kiliziya, mu nsengero no mu mavuriro. Ikiremereye kurushaho nuko na bamwe mu bari bashinzwe kurengera ubuzima bw’abantu, harimo abaganga babirahiriye mu mwuga wabo, aribo babaye ku isonga yo gukora Jenoside, cyane cyane mu bitaro, mu bigo nderabuzima no mu mavuriro.

Benshi mu baganga n’abaforomo bishe Abatutsi bari bahungiye mu bitaro, abandi bagiye mu bitero no gutanga amabwiriza yo kwica. Ubu bwicanyi bwakorewe hose mu Rwanda. Bamwe muri bo barafashwe, baraburana, bahamwa n’ibyaha, barafungwa muri gereza zo mu Rwanda. Abandi barakidegembya aho bahungiye mu mahanga, hakaba harimo n’abashatse akazi mu bitaro n’amavuriro yo mu mahanga, hirengagijwe amahame y’umwuga wabo batatiye.

Muri aba baganga, harimo abageze mu mahanga batangiza ibikorwa byo gukomeza kubiba ingengabitekerezo ya Jenoside, gupfobya no guhakana Jenoside yakorewe Abatutsi, gusebya ubuyobozi bw’u Rwanda no gushinga, hirya no hino ku isi, imitwe yitwa ko ari iya politiki ishingiye ku ngengabitekerezo ya Jenoside harino FDLR, FDU-Inkingi, RUD URUNANA n’indi.

Kuri bamwe muri bo Urwego Rukuru rw’Ubushinjacyaha rwatanze impapuro zibafata, ubu bakaba bari mu bashakishwa na Interpol. Abaganga n’abaforomo bakoze Jenoside bahungiye mu bihugu bitandukanye birimo: Ubufaransa, Ububiligi, Ubuholandi, Ubwongereza, Ubutaliyani, Norvège, Leta Zunze Ubumwe z’Amerika, Canada, Afurika y’Epfo, Zambia, Kenya, Uganda, Malawi, Swaziland, Uburundi n’ahandi.

Mu gihugu hose, umubare w’abaganga n’abaforomo bamenyekanye bakoze Jenoside ni mirongo itanu n’icyenda (59), harimo makumyabiri na batanu (25) bakoreye Jenoside mu Mujyi wa Butare.

Naho umubare wose w’abaforomo bakoze Jenoside bashoboye kumenyekana ni mirongo irindwi na bane (74), harimo mirongo itatu n’umwe (31) bakoreye Jenoside mu Mujyi wa Butare.

Ibitaro bya kaminuza bya Butare (CHUB) ni byo byaciye agahigo mu kugira umubare munini w’abaganga bakoze Jenoside.

Iyi nyandiko irerekana uruhare rukomeye rw’abo bantu mu bwicanyi bwabereye mu Mujyi wa Butare, ikagaragaza ko abaganga makumyabiri na batanu (25), abanyeshuri batatu (03) bigiraga ubuganga muri Kaminuza y’u Rwanda n’abaforomo mirongo itatu n’umwe (31) babaye abicanyi.

Mu baganga harimo n’inzobere zo mu rwego rwo hejuru u Rwanda rwari rufite.

Komisiyo y’Igihugu yo kurwanya Jenoside irasaba ko abo baganga n’abaforomo bakoze jenoside bagahungira mu mahanga, imyaka ikaba ibaye makumyabiri n’itandatu (26), bahagarikwa mu mirimo yo kuvura, bakagezwa imbere y’ubutabera.

Kimwe mu bigaragaza ubukana bwa Jenoside yakorewe Abatutsi muri 1994, nuko nta hantu na hamwe abicanyi batakoreye Jenoside

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Special pages
. . . . . .