Uburyo koza mu mutwe abamaze kogoshwa byateje imbere ababikora

Yanditswe na Thamimu Hakizimana
Kuya 19 Mutarama 2020 saa 10:30
Yasuwe :
0 0

Akazi ko koza mu mutwe abantu bamaze kwiyogoshesha muri Salons de Coiffure zitandukanye, ni kamwe mu gafatwa nk’agasuzuguritse mu gihe gatunze abatari bake mu Rwanda.

Ubusanzwe akazi ko gutunganya umusatsi n’inzara ndetse no koza mu mutwe ni imyuga abayikora bibasaba kubanza kuyiga ku buryo biba bitoroshye ko umuntu ayikora atarabanje kuyigishwa.

Nubwo bimeze bityo, si benshi b’abibona nk’umwuga mwiza bashishikariza ababo kujyamo.

IGIHE yaganiriye n’abakora akazi ko koza mu mutwe abamaze kwiyogoshesha banabyigiye, bagaragaza ko ari umwuga mwiza kandi ubatunze.

Bamwe mu bakobwa boza mu mutwe abamaze kogoshwa, bemeza ko bibatunze ndetse badashobora kubireka.

Mujawamariya Cynthia , umaze imyaka ine yoza mu mutwe abamaze kwiyogoshesha, yabwiye IGIHE, ko amaze kwizigamira miliyoni eshatu z’amafaranga y’u Rwanda abikesha uyu mwuga.

Ati “Nize kumesa mu mutwe no kudefiriza, gukora inzara no gusuka ariko byo ni impano yanjye ariko naje guhitamo koza mu mutwe kuko nibyo niyumvagamo cyane kandi aka kazi karantunze neza.”

Yavuze ko abasuzugura uwo mwuga ari abatawuzi kuko babanza kubyigishwa, bakamenya uko bita kuri buri mukiliya.

Muhimpundu Espérance, umaze imyaka 10 yoza abantu mu mutwe yabwiye IGIHE ko amaze kwiyubakira inzu abikesha ako kazi.

Ati “ Uyu mwuga wamfashije byinshi. Nubatse inzu, ndihira barumuna banjye amashuri kugeza ubwo barangije n’ayisumbuye nanikoreshereza ubukwe. Ubu mfatanya n’umugabo wanjye ntategereje ko hari amafaranga ari bumpe.”

Muhimpundu avuga ko ku munsi iyo byagenze neza atahana amafaranga ari hagati y’ibihumbi bitanu n’ibihumbi icumi ahabwa n’abakiriya nk’ishimwe ry’uko aba yabahaye serivisi nziza. Ku kwezi akorera amafaranga atari munsi y’ibihumbi 300.

Icyakora, yavuze ko babangamirwa n’ababafata nk’indaya bitewe no kumva ko koza umugabo mu mutwe bishobora kuganisha ahandi.

Ati “Urabona iyi mitsi y’aha mu misaya niyo duheraho kuko umuntu aba yiriwe ananiwe, tukongera tukazamuka hano mu gihorihori n’iyi mitsi yo mu gikanu kugira ngo ufashe uwakugannye kumererwa neza ariko ikibazo n’uko hari abadufata nk’indaya kandi tuba turi mu kazi.”

Bavuga ko hari n’abagore bagomba kwizanira n’abagabo babo bakaboza babareba mu rwego rwo kubereka ko nta kindi kiba kigambiriwe kitari akazi.

Koza mu mutwe abamaze kwiyogoshesha no serivisi zitamaze igihe kinini zitangirwa mu nzu zogosha imisatsi hirya no hino mu gihugu, cyane cyane mu mijyi. Nubwo imibare y’abo izo serivisi zahaye akazi itazwi neza, byatanze amahirwe menshi y’akazi ku rubyiruko kuko ni hake mu bice by’imijyi wabona inzu yogosha itagira izo serivisi.

Abakora akazi ko koza mu mutwe bavuga ko ari umurimo ubatunze
Mujawamariya Cynthia , umaze imyaka ine akora uyu mwuga wo koza bantu mu mutwe bikaba byaramufashije kwizigamira
Muhimpundu Esperance, umaze imyaka 10 yoza abantu mu mutwe amaze kubaka inzu abikesha aka kazi

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza