Bwa mbere ku Isi habonetse umubare munini w’abanduye Coronavirus ku munsi umwe

Yanditswe na Habimana James
Kuya 21 Gicurasi 2020 saa 09:38
Yasuwe :
0 0

Ishami ry’Umuryango w’Abibumbye wita ku buzima, OMS, watangaje ko abandura icyorezo cya Coronavirus ku Isi bageze kuri miliyoni 5 090 642 ariko abandi 2 025 716 na bo bamaze kuva mu bitaro mu gihe 329 754 bamaze gupfa.

OMS yagaragaje ko kuri uyu wa Gatatu gusa abantu ibihumbi 106, banduye, n’aho abandi hafi ibihumbi bitanu barapfa. Ni ubwa mbere handuye abantu bagera kuri uriya mubare mu masaha 24 gusa.

Umuyobozi wa OMS, Tedros Adhanom Ghebreyesus, yagaragaje ko biteye impungenge kuba ubwandu bukomeje kwiyongera mu bihugu biri mu nzira y’amajyambere n’ibifite ubukungu buciriritse.

Ati “Mu masaha 24, hari abantu 106 000 banduye, nibo benshi babayeho mu munsi umwe kuva icyorezo cyatangira. Hafi bibiri bya gatatu ni abo mu bihugu bine”.

Muri Leta Zunze Ubumwe za Amerika, kuri uyu wa Gatatu bapfushije abantu barenga 1400, abandi barenga ibihumbi 22 barandura.

Ibi byatumye abamaze kwandura Coronavirus muri iki gihugu baba 1 593 039, naho abandi ibihumbi 94 941 bamaze gupfa.

Leta Zunze Ubumwe za Amerika nizo zikomeje kuza imbere mu kugira umubare w’abanduye n’abamaze gupfa ku Isi, u Burusiya buri ku mwanya wa Kabiri mu banduye kuko ari 308 705 , hamaze gupfa 2 972.

Brésil iza ku mwanya wa gatatu kuko bufite abanduye 293 357 hamaze gupfa 18 894 , muri Espagne handuye 279 524, hamaze gupfa 27 888, mu Bwongereza handuye 248 293, hamaze gupfa 35 704.

Ku mugabane wa Afurika wose hamaze kugaragara abantu 97 404 banduye Coronavirus, abamaze gupfa basaga 3 020 naho abakize ni 39 425.

Afurika y’Epfo iri imbere mu kugira abafite ubwandu benshi kuko ari 18 003, abamaze gupfa ni 339, ikurikirwa na Misiri ubu ifite abamaze gupfa benshi kuri uyu mugabane, kuko bageze kuri 680 naho abamaze kwandura ni 14 229.

Muri Afurika y’Iburasirazuba, kugeza ubu igihugu kiza imbere mu bwandu bwinshi ni Kenya kuko hamaze kwandura 1 029 hapfuye 50, Tanzania iza ku mwanya wa kabiri, kuko handuye 509 hapfuye 21.

U Rwanda rufite abanduye 314 abamaze gukira ni 216, muri Uganda hamaze kwandura 264, mu Burundi handuye abantu 42 hapfa umwe naho muri Sudani y’Epfo hamaze kwandura abantu 290 hamaze gupfa bane.

Abanduye Coronavirus ni ibihumbi 106 kuri uyu wa Gatatu

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Special pages
. . . . . .