Coronavirus: Umuti wa Hydroxychloroquine watangiye kugeragezwa mu Bwongereza

Yanditswe na Habimana James
Kuya 21 Gicurasi 2020 saa 12:22
Yasuwe :
0 0

Imiti ibiri isanzwe ivura Malaria, yatangiye kugeragezwa mu Bwongereaza mu Mijyi ya Brighton na Oxford, harebwa ko yavura icyorezo cya Coronavirus.

Iyi imiti ya Chloroquine na Hydroxychloroquine izahabwa abaganga barenga 40 000 bo mu Burayi, Afurika, Aziya na Amerika y’Epfo. Abazahabwa uyu muti ni abakozi bahura n’abarwayi ba Covid-19.

Muri iki cyumweru, Perezida wa Leta Zunze Ubumwe za Amerika, Donald Trump, yanenzwe mu buryo bukomeye nyuma yo kuvuga ko yafashe Hydroxychloroquine, nubwo yari yaburiwe ko bishobora kuba bibi ku buzima.

Ubushakashatsi bwakorewe muri Leta Zunze Ubumwe za Amerika, bwo bwagaragaje ko abarwayi ba Coronavirus bafashe umuti wa hydroxychloroquine ntacyo byagabanyije ku burwayi bwabo, ahubwo ngo nibo benshi bapfuye abandi bagera ku cyiciro cyo kongererwa umwuka ugereranyije n’abatarafashe uwo muti.

BBC ivuga ko abazahabwa hydroxychloroquine, ibisubizo biteganyijwe kuzaboneka mu mpera z’uyu mwaka.

Iyi miti ishobora ngo guhabwa umuntu wese wita ku barwayi ba coronavirus mu Bwongereza, igihe cyose batigeze barwara Covid-19.

Nyuma nibwo bizamenyekana niba iyi miti ishobora kuvura.

Umwe mu bayobozi b’ubu bushakashatsi ukora muri Kaminuza ya Oxford, Prof Nicholas, yagize ati "Mu by’ukuri ntabwo tuzi niba chloroquine cyangwa hydroxychloroquine byavura Covid-19."

Iyi miti isanzwe ishobora kugabanya umuriro kandi ikoreshwa mu buryo bwo kwirinda no kuvura Malaria.

Uyu muti wamenyekanye cyane nyuma y’aho Perezida Donald Trump avugiye ko ushobora kuba ingirakamaro, muri iki cyumweru akanavuga ko afata hydroxychloroquine kugira ngo yirinde coronavirus.

Ishami ry’Umuryango w’Abibumbye ryita ku Buzima, OMS, ryavuze ko hari abantu bamwe na bamwe barimo kwivura bakoresheje iyi miti, ariko ko bishobora kubateza ibindi bibazo.

Ubu bushakashatsi burimo abashakashatsi baturutse mu Bwongereza, muri Thailand, muri Vietnam, Laos, Kambogdia n’u Butaliyani.

Icyorezo cya Coronavirus kimaze guhitana abarenga ibihumbi 300 ku Isi, naho abarenga miliyoni eshanu bamaze kwandura. Kuri uyu wa Gatatu gusa abantu barenga ibihumbi 106 baranduye, abandi hafi ibihumbi bitanu barapfa.

Ibihugu hirya no hino ku isi bikomeje gushaka umuti n’urukingo rw’iki cyorezo.


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Special pages
. . . . . .