Incamake ku birego 15 Amerika yashinje u Bushinwa ku gukwirakwiza Coronavirus ku Isi

Yanditswe na Habimana James
Kuya 31 Gicurasi 2020 saa 05:22
Yasuwe :
0 0

Kuva icyorezo cya Coronavirus cyakwaduka mu mpera za 2019, abanyapolitiki bakomeye ku Isi barimo na Perezida wa Leta Zunze Ubumwe za Amerika Donald Trump, bagiye bashyira mu majwi ubutegetsi bw’u Bushinwa ko aribwo nyirabayazana wacyo.

Coronavirus yagaragaye bwa mbere mu Mujyi wa Wuhan mu Bushinwa; ubu 6 175 290 bamaze kuyandura, barimo 371 228 yahitanye na 2 744 546 bamaze kuyikira ku Isi yose.

Amakuru ya mbere ya Coronavirus yabanje kuvugwa mu Mujyi wa Wuhan mu Ntara ya Hubei mu Bushinwa.

Nubwo amakuru yagiye hanze ko iki cyorezo cyatangiriye mu Bushinwa, Leta Zunze Ubumwe za Amerika ziri mu bihugu byugarijwe cyane ku buryo 1 818 983 bamaze kwandura mu gihe 105 611 bitabye Imana.

Perezida Trump ntareba neza u Bushinwa na OMS, abishinja kuba aribyo byatumye Isi iri mu kaga irimo uyu munsi kuko ngo bitatangiye amakuru ku gihe.

U Bushinwa nabwo buvuga ko nta gihugu cyagombye gushinja ikindi kuzana Coronavirus ahubwo ko hagomba kubaho ubufatanye mu kugitsinda.

Ibinyamakuru birimo Xinhuanet byakusanyije bimwe mu birego Abanyamerika bashinja u Bushinwa kuri iki cyorezo n’ibyo u Bushinwa butangaza.

1. COVID-19 ni “Virusi y’Abashinwa’

Ishami ry’Umuryango w’Abibumbye ryita ku buzima, OMS, ryatangaje ko iki cyorezo kitagomba kwitirirwa igihugu runaka cyangwa agace runaka.

Kwita COVID-19 virusi y’Abashinwa ni imvugo yakoreshejwe cyane na Perezida Trump ashaka kugaragaza ko ariho iki cyorezo cyaturutse.

2. Wuhan niyo yatangiriyemo COVID-19

U Bushinwa buvuga ko kuba Wuhan ariwo mujyi watangaje mbere ko habonetse COVID-19, bidakwiye kuvugwa ko ariho cyatangiriye. Buvuga ko kugira ngo hamenyekane bisaba ko bikorwa n’inzobere mu bya siyansi.

U Bushinwa buvuga ko “Tugiye mu mateka, ahantu ha mbere hagiye havugwa za virusi, siho zabaga zaraturutse. Urugero nka Virusi ya Sida yatangajwe bwa mbere na Amerika kandi bishoboka ko itakomotse muri iki gihugu.”

3. Ni virusi yakozwe n’Ikigo Wuhan Institute of Virology

U Bushinwa buvuga ko ibimenyetso byose bihari bigaragaza ko virus ya SARS-CoV-2 itakozwe n’abantu.

Tariki 19 Gashyantare 2020, ikinyamakuru cy’abaganga mu Bwongereza, The Lancet, cyavuze ko abaganga b’inzobere 27 bavuye mu bihugu umunani, bavuze ko iyi virusi yakomotse mu nyamaswa zo mu mazi.

Tariki 17 Werurwe, abahanga batanu bo mu Bwongereza, muri Amerika na Australia, bavuze ko SARS-CoV-2 itakorewe muri laboratwari.

Tariki 21 Mata uyu mwaka, Umuvugizi wa OMS, Fadela Chaib, na we yavuze ko ibimenyetso bafite ari uko iyi virusi bigaragara ko yavuye mu nyamaswa.

4. Virusi ntiyacitse abakozi ba Wuhan Institute of Virology mu Bushinwa

U Bushinwa buvuga ko iyo laboratwari buyihuriyeho n’u Bufaransa. Usibye kuba ihuriweho n’ibihugu byombi, ibihakorerwa byose bigenzurwa kandi bikaba bikurikiza amabwiriza mpuzamahanga.

5. U Bushinwa bwemereye abaturage kujya ari i Milan na New York buzi ko COVID-19 ihari

U Bushinwa buvuga ko bwafashe ingamba zikomeye kandi ku gihe ku buryo bwakoze uko bushoboye ngo iyi virus itava muri Wuhan. Imibare igaragaza ko abantu bake aribo bayivanye mu Bushinwa bayijyana mu mahanga.

U Bushinwa buvuga ko ikindi kibigaragaza ari uko bwahise bushyira Umujyi wa Wuhan mu kato muri Mutarama 2020, bisobanuye ko nta ngendo z’indege cyangwa gari ya moshi zagombaga kuhava tariki 24 Mutarama kugeza tariki 8 Mata.

Buvuga ko ubwo wahagarikaga ingendo tariki 23 Mutarama, umuntu umwe ari we wari umaze kwandura muri Amerika.

6. Coronavirus yavuye ko mu ducurama

U Bushinwa buvuga ko ubucurama atari indyo y’Abashinwa ndetse ko ahavugwa ko hacururizwaga uducurama mu isoko ry’ibiva mu mazi muri Wuhan, tutahagurishirizwa.

7. Isoko ry’inyama z’ibyavuye mu mazi ryafunguwe bidakwiye

U Bushinwa tariki 24 Gashyatare 2020, bwasohoye itegeko rikumira gucuruza ibicuruzwa by’agasozi ndetse no kubirya, mu kurengera ubuzima bw’abaturage.

8. U Bushinwa bwatinze gutanga amakuru ku buryo COV ID-19 yandura

U Bushinwa bwavuze ko bwabanje kwiga kuri virusi nshya yari igaragaye. Ni inyigo yatwaye igihe ariko ngo hamaze gukusanywa amakuru y’ibanze yatanzwe ku gihe.

Umuyobozi ushinzwe indwara zifata mu buhumukero mu Ntara ya Hubei, Dr. Zhang Jixian, ku wa 27 Ukuboza 2019, yatangaje bwa mbere ko hari indwara yafashe abantu batatu kandi itazwi.

Tariki 30 uko kwezi, ubuyobozi muri Wuhan bwatanze intabaza ndetse buvuga ko burimo kuvura indwara itazwi.

Tariki 31 Ukuboza, Umujyi wa Wuhan wavuze ko watangarije OMS ko hari indwara itazwi muri Hubei.

Kuva tariki 3 Mutarama 2020, u Bushinwa buvuga ko bwatangiye kuvuga umunsi ku wundi uko iki cyorezo kimeze kuri OMS na Amerika.

U Bushinwa buvuga ko hagati ya tariki 3 Mutarama n’iya 3 Gashyantare, bwabwiye inshuro 30 Amerika amakuru kuri iki cyorezo.

Tariki 20 Mutarama, Ikigo gishinzwe indwara mu Bushinwa, cyatangaje ko ari icyorezo cyandura. Nyuma y’umunsi umwe u Bushinwa bwaburiye Isi ko iri mu kaga, ndetse Wuhan ituwe na miliyoni 12 ishyirwa mu kato, nabwo muri Amerika nta murwayi wari uhari.

9. U Bushinwa bwafunze Dr Li Wenliang ngo hatagaragara Coronavirus

U Bushinwa buvuga ko Dr Li Wenliang atigeze atabwa muri yombi, ahubwo buri gihugu kigira amabwiriza yo gutangaza icyorezo icyo aricyo cyose.

Dr Li Wenliang wavuze bwa mbere iby’iki cyorezo nyuma y’igihe nawe cyaje kumuhitana.

U Bushinwa buvuga ko ku wa 30 Ukuboza 2019 ari bwo Dr Li Wenliang yohereje ubutumwa ku rubuga ahuriramo n’abandi baganga ababwira ko hari icyorezo cyadutse.

Tariki 3 Mutarama, Polisi ya Wuhan yahamagaje Dr Li imusaba ko atakomeza gukwiza ibihuha ku ndwara itaramenyekana.

Buvuga ko nyuma y’aho tariki 31 agaragaje ibimenyetso bya Coronavirus, tariki 7 Gashyantare yaje kwitaba Imana kandi igihugu cyababajwe n’urupfu rwe. Hahise hoherezwa abaganga b’inzobere, kugenzura iby’icyo cyorezo.

10. U Bushinwa bwabeshye imibare y’abanduye n’abapfa

U Bushinwa buvuga ko bwatanze amakuru y’ukuri ku mibare y’abicwa n’abanduye Coronavirus.

Iki gihugu kivuga ko kuva tariki 21 Mutarama 2020, Ikigo gishinzwe iby’ubuzima cyatangiye gutangaza umunsi ku munsi uko icyorezo gihagaze mu gihugu, imibare igatangazwa mu binyamakuru n’ahandi hose.

Iki gihugu kandi kivuga ko kuva tariki 27 Mutarama, abayobozi mu nzego za leta bakoresheje ibiganiro n’abanyamakuru birenga 3000.

U Bushinwa buvuga ko nta gitangaza gihari kuba hari imibare y’abantu bamwe bagaragaye barishwe na Coronavirus kuko ubwo yari yugarije Wuhan, hari abaturage bamwe batageraga kwa muganga ku buryo bapfaga bakiri mu ngo.

11. Ibinyoma kuri Coronavirus

U Bushinwa butangaza ko kuva na mbere bwakoreye mu mucyo mu gutanga amakuru yizewe. Bitandukanye n’ibyo abanyapolitiki muri Amerika n’ibinyamakuru bimwe ngo byakomeje gukwiza ibihuha bibwibasira.

U Bushinwa buvuga ko ibyo buregwa ari ibihuha kuko amakuru bwagiye butanga yashimwe n’umuryango mpuzamahanga.

Tariki 27 Mata uyu mwaka, Umuyobozi w’ikinyamakuru, The Lancet, Richard Horton, yabwiye CNN ko u Bushinwa bukibona amakuru kuri iki cyorezo, bwahise bubimenyesha OMS tariki 31 Ukuboza 2019.

Yagize ati “Tugomba gushimira ubuyobozi bw’u Bushinwa na OMS kubera ko bwakoze ibyo bushoboye ngo Isi imenye iki cyorezo cyari gitangiye.”

12. U Bushinwa bwirukanye abanyamakuru b’Abanyamerika ngo buhishe ukuri

U Bushinwa buvuga ko ibyo bwakoze byari ugusubiza ku buryo Amerika nayo yari imaze igihe yibasiye abanyamakuru b’Abashinwa bari muri Amerika.

Iki gihugu kivuga ko hari n’abanyamakuru b’Abashinwa bagera kuri 60 birukanwe muri Amerika.

13. U Bushinwa bwahaye ruswa OMS

U Bushinwa bwatangaje ko mu gihe cyose bwakomeje gufatanya na OMS, ariko nta munsi n’umwe bwigeze bugerageza gukorera muri uyu muryango.

Buvuga ko ugereranyije n’umwanya buriho mu gutera inkunga OMS, udashobora kubuha ingufu zo kuyivugiramo kurenza ibindi bihugu bitangamo amafaranga menshi [byarimo na Amerika].

14. U Bushinwa ku kwirengera ingaruka za Coronavirus

U Bushinwa bwasabwe kwirengera ingaruka no kwishyura igihombo Coronavirus yateye ku Isi.

Iki gihugu cyatangaje ko ibyo bidakwiye kuko mu 1980, ubwo virusi ya Sida yagaragaraga bwa mbere muri Amerika umuryango mpuzamahanga utayitegetse kwishyura ibyo yangije ku Isi.

15. U Bushinwa bwakumiriye ko ibikoresho bivura Coronavis bijyanwa muri Amerika

U Bushinwa buvuga ko uretse kuba bwarakoze uko bushoboye ngo buhangane na Coronavirus mu gihugu, ntako butagize ngo butange ibikoresho byifashishwa mu mahanga.

Buvuga ko kuva iki cyorezo cyaduka ku Isi, bumaze kohereza ibikoresho mu bihugu birenga 150. Ku wa 6 Gicurasi 200, bwahaye Leta 30 za Amerika udupfukamunwa miliyoni 9.6, ibikoresho bipima 500 000 n’ibindi.

Perezida wa Leta Zunze Ubumwe za Amerika, Donald Trump (ibumoso) asuhuzanya na mugenzi we w'u Bushinwa, Xi Jinping. Ibihugu byombi bimaze igihe birebana ay'ingwe kubera Coronavirus

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Special pages
. . . . . .