Ku ikubitiro, inama y’i Paris yabaye igisubizo cy’imihindagurikire y’ikirere ku bihugu bikennye

Yanditswe na

Cyprien Niyomwungeri

Kuya 1 Ukuboza 2015 saa 11:28
Yasuwe :
0 0

Inama mpuzamahanga yiga ku mihindagurikire y’ikirere ibera i Paris (COP21),yatangiranye umuhigo wo gufasha ibihugu biri mu nzira y’amajyambere guhangana n’ingaruka ziyiturukaho.

Muri iyi nama, u Rwanda ruhagarariwe na Minisitiri w’Ububanyi n’Amahanga, Louise Mushikiwabo, Minisitiri w’Umutungo kamere, Dr. Vincent Biruta, Umuyobozi w’Ikigo cy’Igihugu gishinzwe kurengera ibidukikije (REMA), Dr. Rose Mukankomeje n’abandi.

Mu ijambo rye afungura iyi nama ya COP21, Umunyamabanga nshingwabikorwa w’ihuriro ry’umuryango w’abibumbye rifite mu nshingano imihindagurikire y’ikirere, Christiana Figueres, yavuze ko iyi nama ari umwanya wo kugirana amasezerano hagati y’ibihugu byose no gushyiraho ingamba zo guhangana n’imihindagurikire y’ikirere.

Yagize ati “Tugomba gushyiraho amasezerano atuma buri gihugu kigera ku nshingano zacyo zo guhangana n’imihindagurikire y’ikirere, binyuze mu gufasha ibihugu biri mu nzira y’amajyambere gukabya inzozi, bishyira mu bikorwa ibyo byiyemeje.”

Imwe mu ntego z’iyi nama ni ukwigira hamwe uko isi yahangana n’ubushyuhe buyugarije, ku buryo mu mwaka wa 2020, buzaba butari hejuru ya ‘degré Celcius’ ebyiri (soma dogere selisiyusi).

Umunyamabanga Mukuru w’Umuryango w’Abibumbye, Ban Ki Moon yavuze ko hakenewe amasezerano yo gufasha ibihugu bikennye n’ibikennye cyane.

Yagize ati “Hagomba kumenyekana uburyo buhagije kandi bungana bwo gufasha ibihugu biri mu nzira y’amajyambere, guhangana n’imihindagurikire y’ikirere.”

Ibihugu byateye imbere byiyemeje gushyigikira ibikennye mu ngamba byihaye zo guhangana n’ingaruka z’imihindagurikire y’ikirere.

Ku ikubitiro bifatanyije na Banki y’Isi, ibihugu by’u Budage, Norvege, Suède n’u Busuwisi, byatangaje ko bitanze miliyoni 500 z’amadorali y’Amerika, azifashishwa muri gahunda nshya zo kuzibira ibyuka byangiza ikirere, bituruka mu bihugu bikize.

Iyi gahunda izafasha ibihugu bikennye gushyira mu bikorwa imigambi yabyo yo guhagarika ibyuka bibi, binyuze mu kuvugurura ingufu, ubwikorezi, kubyaza imyanda umusaruro, no kugabanya imyuka mibi mu mijyi.

Nk’uko tubikesha The New Times, biteganyijwe ko iyi gahunda izatangira mu mwaka utaha wa 2016, aho miliyoni zisaga 250 z’Amadorali zizakoreshwa ziturutse mu misanzu y’ibihugu. Ikindi ni uko Banki y’isi izashora imari ya miliyari ebyiri z’amadorali mu mishinga ifite aho ihuriye no guhangana n’imihindagurikire y’ikirere.

Abagiraneza 11 nabo biyemeje gutanga hafi miliyoni 250 z’amadorali muri gahunda idasanzwe yo gufasha ibihugu bikennye cyane guhangana n’ingaruka z’imihindagurikire y’ikirere.

U Rwanda ruhagarariwe na Minisitiri w'Ububanyi n'Amahanga, Louise Mushikiwabo, Minisitiri w'umutungokamere, Dr Vincent Biruta n'abandi

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Special pages
. . . . . .